"වියදම් විස්තර, විගණන ක්‍රමවේද සහ පාලන මණ්ඩල ගැන අපි දන්නේ නැහැ; මුදල් අමාත්‍යාංශයෙන් අහන්න" - දිට්වා සුළි කුණාටුවේ වන්දි ලේඛන සඟවමින් වගකීමෙන් ලිස්සා යාමක
ශ්‍රී ලංකාව නැවත ගොඩනැඟීම සඳහා දෙස් විදෙස් පරිත්‍යාගශීලීන්ගෙන් රුපියල් බිලියන 13කට අධික (දේශීය හා විදේශීය) දැවැන්ත මුදලක් ලැබී ඇති "Rebuilding Sri Lanka" ජාතික සංවර්ධන අරමුදල නීත්‍යානුකූලව ස්ථාපිත කිරීමට අදාළ පනත් කෙටුම්පත මාස 8කට අධික කාලයක් තිස්සේ තවමත් සම්පාදනය කරමින් පවතින බව ජනාධිපති කාර්යාලය නිල වශයෙන් පිළිගෙන තිබේ.
'අනිද්දා' පුවත් වෙබ් අඩවිය වාර්තා කර ඇති පරිදි, මෙම අරමුදල ස්වාධීන ආයතනයක් ලෙස පාර්ලිමේන්තුව හරහා සම්මත කරගන්නා නිශ්චිත කාලරාමුවක් හෝ ඊට අදාළ නීතිමය ව්‍යුහය පිළිබඳව කිසිදු පැහැදිලි තොරතුරක් ලබාදීමට ආණ්ඩුව අපොහොසත් වී ඇත.
RTI බලයෙන් මාස දෙකකට පසු හෙළි කළ බිලියන ගණනක දත්ත
මාධ්‍යවේදිනි රේඛා නිලුක්ෂි විසින් 2026 මැයි 06 වැනිදා යොමු කළ තොරතුරු ඉල්ලීමට නියමිත කාලය තුළ පිළිතුරු නොදීම නිසා, තොරතුරු පනත යටතේ ඉදිරිපත් කළ දැඩි අභියාචනයකින් පසුව ඉකුත් ජූලි 07 වැනිදා ජනාධිපති කාර්යාලය මෙම දත්ත නිකුත් කර තිබේ.
ගිණුමේ ඇති මුදල:
2026 අප්‍රේල් 30 වන විට අරමුදලට ලැබී තිබූ දේශීය ප්‍රදාන එකතුව රුපියල් 10,015,741,459.07 කි. විදේශීය මුදල් ප්‍රදානය රුපියල් 3,389,102,370.54 කි. (සමස්තය රුපියල් බිලියන 13.4ක් ඉක්මවයි).
භාණ්ඩාගාරයේ රඳවා තැබීම:
මෙම මුළු මුදලම "Rebuilding Sri Lanka තැන්පත් ගිණුම" නමින් භාණ්ඩාගාර නියෝජ්‍ය ලේකම්වරයා යටතේ පවත්වාගෙන යනු ලබයි.
දැනට කළ එකම වියදම:
දිට්වා සුළි කුණාටුවෙන් සිදු වූ හානි හේතුවෙන් ලේඛනාරක්ෂක සංරක්ෂණ කටයුතු වෙනුවෙන් ජාත්‍යන්තර ලේඛනාගාර කවුන්සිලය දුන් රුපියල් ලක්ෂ පහක (500,000.00) මුදලක් 2026 අප්‍රේල් 22 වැනිදා ජාතික ලේඛනාගාර දෙපාර්තමේන්තුවට නිදහස් කර ඇත.
වගකීම මුදල් අමාත්‍යාංශයට පවරා ලිස්සා යාම
අරමුදලේ ප්‍රධාන අරමුණ ජාතික සැලසුම් දෙපාර්තමේන්තුව සමඟ එක්ව ජාතික සංවර්ධන ප්‍රමුඛතා සඳහා මූල්‍ය පහසුකම් සැපයීම බව ජනාධිපති කාර්යාලය ප්‍රකාශ කළද, එහි විනිවිදභාවය පිළිබඳ තීරණාත්මක ප්‍රශ්න රැසකට පිළිතුරු දීම මඟහැර තිබේ.
දිට්වා සුළි කුණාටුවෙන් හානියට පත් නිවාස හෝ වින්දිතයන්ට වන්දි ලබා දුන් ආකාරය සහ වෙනත් වියදම් පිළිබඳව ඉල්ලා තිබූ තොරතුරු ලබාදී නොමැත.
අරමුදලේ කළමනාකරණ ව්‍යුහය, පාලන මණ්ඩලය, විගණකාධිපතිවරයා සිදුකරන විගණන ක්‍රමවේද, පාර්ලිමේන්තු අධීක්ෂණය සහ පාලන යාන්ත්‍රණය පිළිබඳ ප්‍රශ්නවලට පිළිතුරු දීම ප්‍රතික්ෂේප කර ඇති ජනාධිපති කාර්යාලය, ඒ සඳහා තොරතුරු "මුදල් ක්‍රම සම්පාදන සහ ආර්ථික සංවර්ධන අමාත්‍යාංශයෙන්" විමසිය යුතු බව පවසා වගකීමෙන් බැහැර වී ඇත.
නීතිමය පදනමක් (Act of Parliament) නොමැතිව රුපියල් බිලියන 13කට අධික මහජන සහ විදේශීය ආධාර මුදල් පරිපාලනය කිරීම සහ ඊට අදාළ නීති කෙටුම්පත් කැබිනට් මණ්ඩලයට හෝ පාර්ලිමේන්තුවට ඉදිරිපත් කිරීම දිගින් දිගටම ප්‍රමාද වීම ආයතනික පාලනය පිළිබඳ බරපතළ ප්‍රශ්නාර්ථයක් මතු කරයි.
(මූලාශ්‍රය: anidda.lk)
