ලිංගික දිශානතිය මත වෙනස්කොට සැලකීම් සිදුකිරීම මත 23 හැවිරිදි කාන්තාවක් ශ්‍රී ලංකා පොලීසියට එරෙහිව ශ්‍රේෂ්ඨාධිකරණය හමුවේ ඓතිහාසික මූලික අයිතිවාසිකම් පෙත්සමක් ගොනුකර තිබේ.
තම ලිංගික දිශානතිය මත වැලිසර මහබාගේ පොලීසිය විසින් තම මූලික අයිතිවාසිකම් උල්ලංඝනය කළ අවස්ථා කිහිපයක්ම ඇය සිය පෙත්සමේ සඳහන් කර ඇත.
මහජන ආරක්ෂක අමාත්‍ය ටිරාන් අලස්, පොලිස්පතිවරයා සහ නීතිපතිවරයා ද මෙම පෙත්සමේ වගඋත්තරකරුවන් ලෙස නම්කර ඇත.
ශ්‍රී ලංකාවේ ශ්‍රේෂ්ඨාධිකරණය හමුවේ මෙවන් නඩුවක් ගොනුවන පළමු අවස්ථාව මෙයයි. තිෂ්‍ය වේරගොඩ, පුලස්ති රූපසිංහ සහ ස්ටෙෆානියා පෙරේරා යන නීතීඥවරු පෙත්සම්කාරිය වෙනුවෙන් පෙනී සිටිති.
වින්දිත කාන්තාව සති ගණනක් නිවසේ සිරකර අපයෝජනයට ලක්කරලා
තම ලිංගික දිශානතිය සිය දෙමාපියන්ට හෙළිදරව් කිරීම මත, වෘත්තිකයකු සහ වැඩිහිටියකු වන මෙම කාන්තාව ඇගේ දෙමාපියන් විසින් බලහත්කාරයෙන් නිවාස අඩස්සියේ තබා ඇති අතර, මේ අන්දමින් සති ගණනක් සිරකර ඈ අපයෝජනයට ලක්කළ බව වින්දිත කාන්තාව අනාවරණය කර සිටියි.
තමා බලහත්කාරයෙන් නිවාස අඩස්සියේ තැබීම සහ දිගින් දිගටම අපයෝජනයට ලක්කිරීමට අදාළව වැලිසර මහබාගේ පොලීසියට පැමිණිල්ලක් ගොනු කිරීමට ගිය විට, පැමිණිල්ල භාරගනු වෙනුවට පොලීසිය විසින් තම ලිංගික දිශානතිය පරීක්ෂා කිරීමට විමර්ශනයක් දියත් කළ බවත්, ඒ නයින් ඇගේ “සමලිංගිකත්වය තහවුරු කිරීමට සාක්ෂි සොයා ගැනීමට” තම ජංගම දුරකතනය සහ ලැප්ටොප් පරිගණකය පොලීසිය භාරයට ගත් බවත් පෙත්සම්කාරිය වැඩිදුරටත් සඳහන් කර සිටියි.
“සමලිංගිකත්වය තහවුරු කරන සාක්ෂි” සෙවීමේ අරමුණින් මහබාගේ පොලීසිය වින්දිත කාන්තාව වෛද්‍ය පරීක්ෂාවකට ලක්කිරීමට අධිකරණ වෛද්‍යවරයකු වෙත යොමුකිරීමට තැත් කරලා
ඉන් අනතුරුව, පොලිස් ස්ථානාධිපතිවරයාගේ පෞද්ගලික මැදිහත්වීම මත පෙත්සම්කාරිය බලහත්කාරයෙන් මනෝවෛද්‍යවරයකු වෙත යොමුකිරීමටත්, ඉන් අනතුරුව ශාරීරික පරීක්ෂාවක් සිදුකිරීමට අධිකරණ වෛද්‍ය නිලධාරියකු (JMO) වෙත යොමුකිරීමටත් මහබාගේ පොලීසිය තැත්කර තිබේ.
ශ්‍රී ලංකාවේ සමරිසි (LGBT+) පුද්ගලයන් බලහත්කාරයෙන් මනෝවෛද්‍ය පරීක්ෂාවලට යොමුකිරීම සුලභ සිදුවීමක් වන අතර, අධිකරණ වෛද්‍ය නිලධාරීන් විසින් සිදුකරනු ලබන ශාරීරික පරීක්ෂා අතර බලහත්කාරයෙන් ගුද මාර්ගය හෝ යෝනි මාර්ගය පරීක්ෂාවට ලක්කිරීම ඇතුළත් වේ. එසේ සිදුකරනුයේ, සමලිංගිකත්වය “තහවුරු කිරීම සඳහා සාක්ෂි” සොයා ගැනීම යැයි කියාගත් පදනමක් මත ය.
බලහත්කාරයෙන් ගුද සහ යෝනි මාර්ග පරීක්ෂා සිදුකිරීම
සමරිසි (LGBT+) ප්‍රජාවට එරෙහි වෙනස්කොට සැලකීම ව්‍යවස්ථා විරෝධීයි
සමරිසි (LGBT+) පුද්ගලයන්ට එරෙහි වෙනස්කොට සැලකීම ව්‍යවස්ථා විරෝධී බවත්, පවතින නීතිය සමරිසි (LGBT+) ප්‍රජාවට වෙනස්කොට සැලකීම් සිදුවන අන්දමින් යොදාගත නොහැකි බවත් නීතිපති දෙපාර්තමේන්තුව විසින් 2014 වර්ෂයේ සිට පිට පිට අවස්ථා ගණනාවකම ප්‍රකාශ කර තිබේ.
කෙසේවෙතත්, එක්සත් ජාතීන්ගේ සමළු හමුවේ නීතීපති දෙපාර්තමේන්තුව විසින් මෙය අවස්ථා ගණනාවකදී ම සපථ කර සිටිය ද, සමරිසි (LGBT+) ශ්‍රී ලාංකිකයන්ට සිදුවන මෙවන් බිහිසුණු මානව හිමිකම් උල්ලංඝනයන් ආමන්ත්‍රණය කිරීමට නීතිපති දෙපාර්තමේන්තුව පියවර ගෙන නැත.
ඉකුත් වර්ෂයේදී ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී ප්‍රේම්නාත් දොළවත්ත විසින් දණ්ඩ නීති සංග්‍රහයේ 365 සහ 365අ වගන්ති සංශෝධනය විය යුතු බවට යෝජනා කරමින් පෞද්ගලික මන්ත්‍රී යෝජනාවක් ඉදිරිපත් කර තිබිණි. මෙම යෝජනාව පාර්ලිමේන්තුවේ තවමත් විවාදයට ගෙන නැත.
සහනයක් බලාපොරොත්තුවෙන්
