නීති විරෝධි ක්‍රම යොදාගෙන මුලතිව් මුහුදේ මසුන් මැරීම කටයුතු නතර කිරීමට ආණ්ඩුව දී ඇති උපදෙස් අනුව කටයුතු නොකරන බවට ශ්‍රී ලංකා නාවික හමුදාවට චෝදනා එල්ල වී තිබේ.
මුලතිව් වට්ටුවාකල් ගෝඨාභය නාවික හමුදා කඳවුර ඉදිරිපිට අප්‍රේල් 17 වැනි සදුදා විරෝධතා දියත් කළ ප්‍රදේශයේ ධිවරයන් සිය ගණනක් නාවික හමුදාවෙන් ඉල්ලා සිටියේ නීති විරෝධි ධිවර කටයුතු පාලනය කිරීමට වහාම මැදිහත් වන ලෙසයි.
"අපේ මුහුදේ නීති විරෝධි මසුන් ඇල්ලීම නවත්තන්න, අපේ ජීවනෝපායට බාධා කරන්න එපා, අපේ මුහුදේ නිදහසේ මාළු අල්ලන්න අපට ඉඩ සලසා දෙන්න" යැයි නාවික හමුදාවෙන් ඉල්ලා සිටි ධිවරයන් පෙන්වා දුන්නේ නීති විරෝධි ක්‍රම ඔස්සේ සිදු කරන මසුන් මැරීමේ කටයුතු නිසා මුලතිව් මුහුදේ ධිවර කර්මාන්තයේ යෙදී සිටින ධිවර පවුල් 5000 ක් පමණ දැඩි අසීරුතාවකට පත්ව ඇති බවයි.
ලයිට් කෝස් හා සුරුක්කු දැල් ඇතුළු තහනම් ක්‍රම ඔස්සේ සිදු කරන ධිවර කටයුතු නිසා කුඩා මත්ස්‍ය විශේෂ මහා පරිමානයෙන් විනාශ වන බවද එහිදී ඔවුන් පෙන්වා දී තිබේ.
වට්ටුවාහල් පාලම ඔස්සේ ගෝඨාභය නාවික හමුදා කඳවුර දක්වා විරෝධතා පා ගමනින් පැමිණි ධිවරයන් එහිදී වැඩි දුරටත් පෙන්වා දී ඇත්තේ ඊසාන දිග මුහුදු තීරයේ සාලෙයි සිට කෝකිලායි දක්වා ප්‍රදේශයේ දේශීය ධීවරයන් නීතිවිරෝධී ධීවර කටයුතු සිදුකරන බවයි. ඒවා වැලැක්වීම සඳහා ධීවර කටයුතු භාර අමාත්‍යවරයා දී ඇති උපදෙස් ක්‍රියාත්මක නොකරන බවට නාවික හමුදාවට චෝදනා එල්ල විය.
ධීවරයන් හමුවීම සඳහා ගෝඨාභය කඳවුරේ ගේට්ටුව අසලට ආ නාවික හමුදා නිලධාරියකු නිදහසට කරුණු දක්වද්දී ධීවරයන් ඔහුගේ පැහැදිලි කිරීම යුක්ති සහගත නොවන බවට තර්ක කරනු දකින්නට ලැබුණි.
“අපි මුහුදට යනවා. ඒත් ඔය මුහුදේ තියෙන ඔක්කොම බෝට්ටු අපිට අල්ලන්න බෑනේ,” යි නාවික හමුදා නිලධාරියා කියා සිටියේය.
“ලයිට් දාලා මාළු අල්ලන එක නීති විරෝධීයි. ඒක නැවත්තුවොත් සුරුක්කු දැල් දාන එකත් නැති කරන්න පුළුවන්,” යයි ධීවරයෝ කරුණු දැක්වූහ.
ධීවරයන්ගේ ජීවනෝපාය ආරක්ෂා කිරීම වෙනුවෙන්, ශ්‍රී ලංකා නාවික හමුදාව විසින් නීතිවිරෝධී මසුන් මැරීම් පාලනය කළ යුතු බවට ධිවර අමාත්‍යවරයාගේ ප්‍රධානත්වයෙන් මීට මාස කිහිපයකට ඉහත දී දිස්ත්‍රික් ලේකම් කාර්යාලයේ පැවති සාකච්ඡාවේදී ගත් තීරණය අනුව ශ්‍රී ලංකා නාවික හමුදාව කටයුතු කළ යුතු යැයි ධීවරයන් එහිදී දැඩිව අවධාරණය කර ඇත.
සිය ඉල්ලීම් ඇතුලත් සන්දේශයක් නැගෙනහිර කලාපයේ නාවික විධානය භාර ආඥාපතිට සහ වට්ටුවාහල් ගෝඨාභය නාවික හමුදා කඳවුරේ ආඥාපති වෙත භාරදීමටත් විරෝධතාවය දියත් කළ ධිවරයන් කටයුතු කළ බව පළාත් බද වාර්තාකරුවෝ වැඩි දුරටත් පවසති.
කඩිනමින් විසඳුමක් ලබා දීමට කඳවුරු ප්‍රධානීන් පොරොන්දුවූ බව ධීවර නායකයන් විසින් දැනුම් දීමෙන් අනතුරුව විරෝධතා කරුවන් විසිර ගොස් තිබේ.
ඉන්දීය ධීවරයන් උතුරු මුහුදේ සිදු කරන අනවසර මසුන් මැරීමේ කටයුතු නතර කිරීමට නිසි පියවර නොගැනීම සම්බන්ධයෙන්ද පසුගිය සමයේ ශ්‍රී ලංකා නාවික හමුදාවට දිගටම චෝදනා එල්ල වී තිබුනි.
............................
