ඕනෑම මොහොතක නැවත නැගිටීමේ සංවිධානාත්මක ශක්තියක් තම පක්ෂයට ඇති බව
ශ්‍රී ලංකා පොදු ජන පෙරමුණේ නායක හිටපු ජනාධිපති මහින්ද රාජපක්ෂ පවසයි.
ජනතාව වෙනුවෙන් බලය ලබා ගන්නට වගේම ජනතාව වෙනුවෙන් බලය අත්හැරීමටත් හැකි දේශපාලන අත්දැකීමක් තම පක්ෂයට ඇති බව ද හෙතෙම කියා සිටියි.
හිටපු ජනාධිපතිවරයා එබව කියා සිටියේ, අද (01) කොළඹ කැම්බල් පිටියේ පැවති එම පක්ෂයේ මැයි දින රැලිය අමතමිනි.
ශ්‍රී ලංකා පොදුජන පෙරමුණේ මැයි රැළිය අද පස්වරු 3ට කොළඹ කැම්බල් පිටියේදි ආරම්භ වුණි.
මෙවර එහි තේමාව වූයේ ''අභියෝග බිඳ අභිලාෂ ජයගමු'' යන්නය.
ශ්‍රී ලංකා පොදුජන පෙරමුණේ ජාතික සංවිධායක බැසිල් රාජපක්ෂ ගේ පැමිණීමෙන් පසු රැලිය ආරම්භ වූ අතර අග්‍රාමාත්‍ය දිනේෂ් ගුණවර්ධන ද ඊට එක්වුණි.
{gallery}SLPP May day 2023{/gallery}
සැබෑ කම්කරු නායකයෝ සටන් කරන්නේ පටු දේශපාලන වාසිතකා නොව කම්කරු ජනතාවගේ අයිතිවාසිකම් වෙනුවෙන් බව ශ්‍රී ලංකා පොදුජන පෙරමුණේ නායක සහ හිටපු ජනාධිපති මහින්ද රාජපක්ෂ රැළිය අමතමින් ප්‍රකාශ කළේය.
කිසිදු වෘත්තීය සමිති සාමාජිකයෙකු තනිකරන්නේ නැතැයි පැවසු මහින්ද රාජපක්ෂ, බටහිර අධිරාජ්‍යවාදීන්ගේ රූකඩ බවට පත්නොවී දේශීය චින්තනයකට අනුව වැඩ කිරීමට යාම හේතුවෙන් අපට එරෙහිව විවිධ රාජ්‍ය නොවන සංවිධාන මෙන්ම දේශපාලන සංවිධාන කුමන්ත්‍රණ කළ බවද ඒ අයට අවශ්‍ය වූයේ දේපලවලට පමණක් නොව අපේ ජීවිතවලට හානි කිරීමට බවද කියා සිටියේය.
එහිදී වැඩිදුරටත් අදහස් පළකළ මහින්ද රාජපක්ෂ මෙසේද සඳහන් කළේය.
''අද මේ කැම්බල් පිටියට රැස්වෙලා ඉන්න ආදරණීය වැඩකරණ ජනතාව මේ රටට ඉතා වැදගත් පණිවුඩයක් දෙනවා. ඒ තමයි රටේ පොදුජන අභිලාෂය තවමත් ශ්‍රී ලංකා පොදුජන පෙරමුණ සමඟය කියන අපේ බැඳීම ඔබ නැවත තහවුරු කර තිබෙනවා. ඒ සඳහා ඔබට අපේ ආචාරය පළමුවෙන්ම පුද කරනවා. අපි දන්නවා 1995 වෙනකම්ම කම්කරු ජනතාව වෙනුවෙන් ඔවුන්ගෙ විපතක දි පිහිටවෙන්න රජයේ මුදලක් වියදම් කරන ක්‍රමයක් තිබුනෙ නැහැ. කම්කරු ඇමතිවරයා විදියට කම්කරු නායකයන් එක්ක කතා කරලා ඔබේ සුබසාධනය වෙනුවෙන් පළමු වතාවට එදා අපි ස්ථිර වැඩපිළිවෙලක් සකස් කළා. ඒ අනුව තමයි ශ්‍රම වාසනා අරමුදල බිහිවුණේ. අද වගේම එදත් අපේ දේශපාලන සටන් සියල්ල කම්කරුවන් එක්ක බැඳිලයි තිබුණේ. බොහෝ කම්කරු නායකයන් හොඳ මිත්‍රයන් ලෙස අපට ඇසුරු කරන්න ලැබුණා. ඒ කාලේ ඉඳන්ම මැයි දිනයට විතරක් නෙමෙයි අපි හැමදාමත් කම්කරුවගෙ අයිතින් වෙනුවෙන් පෙනී සිටියා. ඒ නිසා ඔබේ සාධාරණ ඉල්ලීම් ගැන හොඳ වැටහීමකින් ප්‍රතිචාර ලබාදෙන්න අපට හැකියාව ලැබුණා. සමහරු අපව විවේචනය කරනවා.
''අපි අවශ්‍ය වෙලාවට ඔබත් එක්ක ඒ තීන්දුව ගන්නවා''
හැබැයි ඒ ඔවුන්ගේ දේශපාලන ව්‍යාපාරයට. මතක ඇති අද වගේම 2004 දිත් ආණ්ඩු රිමෝට් එක අපේ අතේ තියෙන්නෙ කියලා කියපු අය හිටියා. අවසානයේ මොකද වුණේ ? ඒ අයම තමයි අපට බලයට එන්න උදව් කළේ. ඒ නිසා ශ්‍රී ලංකා පොදුජන පෙරමුණ කලබල වෙන්නෙ නැහැ. අපි අවශ්‍ය වෙලාවට ඔබත් එක්ක ඒ තීන්දුව ගන්නවා.
අපේ රටේ ආර්ථිකයේ ගාමක බලවේගය කම්කරු ජනතාව. අපි ආර්ථිකය සැළසුම් කරනකොට මේ කම්කරු ජනතාවගේ අභිලාෂයන්ට ප්‍රමුඛ තැනක් දිය යුතුයි. අපි කම්කරු ඇමතිකම ගත්ත දවසෙ ඉඳන්ම ඔබ වෙනුවෙන් ඒ යුතුකම ඉටුකර කළා. ඒ වගේමයි එදා ඉඳන් ඔබත් බලය තිබුණත් නැතත් අපි එක්ක ඉඳලා රට වෙනුවෙන් අපිව බලයට ගේන්න අවශ්‍ය කැප කිරීම් කළා. වැඩබිමේ කම්කරු අයිතින් වෙනුවෙන් පෙනි ඉන්න අපේ සහෝදරයෝ ඒ අයිතින් වෙනුවෙන් හඬ නගන්නෙ සමාජ සාධාරණත්වය වෙනුවෙන් කියලයි අපි විශ්වාස කරන්නෙ. ඒ බව තේරුම්ගෙන තමයි ආණ්ඩුව වැඩ කරන්න ඕනි. අපි ඉතිහාසය පුරා වැඩකළේ ඒ විදියට. ඒ නිසා කම්කරු ජනතාව සමඟ අපි සාකච්ඡාවෙන් බොහෝ ප්‍රශ්න විසඳගත්තා. ඔවුන්ගේ ඉල්ලීම් දිනා දුන්නා. ජිවත්වෙන්න සුදුසු සමාජ පරිසරයක් ඇති කළා.
ශ්‍රී ලංකා පොදුජන පෙරමුණ පටන් ගන්න කොට අපට මොනවද නොකිවුවේ. මේක අලුත් පක්ෂයක් කිවුවා. මේ වගේ පක්ෂවලට ඡන්ද දිනන්න බැහැ කිවුවා. හැබැයි ඒ හැමදේටම ඔබ උත්තර දුන්නා. ඉතිහාසයේ වාර්තාගත ඡන්ද ප්‍රතිඵලයක් දීලා අපිව දිනෙව්වා. ඒ වගේ ගත්ත බලය වෙනුවෙන් අවශ්‍ය සාධාරණය කරන්න අපට බැරිවුණා. අපට පටන් ගන්න උනේම කොවිඩ් එක්ක ආර්ථිකය බිඳ වැටුණ තැනකින්. සමහර වැරදි තීන්දුත් ඊට හේතු වුණු බව අපි පිළිගන්න අවශ්‍යයයි. හැබැයි වැරදුණු තැනත් දැන් අපට තේරෙනවා. ඒ නිසා ඒ අත්දැකිමත් අපට තියෙන එක තවත් ශක්තියක්.
ඔබට මතක නම් මේ හැම වෙලාවෙම අපි රට භාරගත්තෙ අමාරුම වෙලාවේ. එක වෙලාවක යුද්ධයක්. අනෙක් වෙලාවේ ආර්ථිකය පහළටම වැටිලා තිබුණා. මේ එක වෙලාවකවත් අපි පස්ස ගැහුවේ නැහැ. අපිට පුළුවන් සාධාරණය මේ රට වෙනුවෙන් ඉටු කරන්න අපි ඉදිරිපත් වුණා. ඒ වගේ තීන්දු ගන්න අපේ පක්ෂයේ තියෙන ශක්තිමත් වෘත්තිය සමිති ජාලයත් හේතුවුණා. ඒ අය දවසින් දවස වැඩබිමේ තමන්ගෙ ශක්තිය පෙන්වමින් අපට ජනතාවගේ අදහස් ඉදිරිපත් කළා.
ඔවුන්ගේ බලාපොරොත්තු පෙන්වා දුන්නා. මෑතක දී සිදුවුණු ඇතැම් වෘත්තීය ක්‍රියමාර්ග හේතුවෙන් අපේ සහෝදර වෘත්තීය සමිති නායකයින්ටත් ප්‍රශ්න ආවා මේ වෙලාවේ කියන්න ඕනේ ඒ කිසිදු වෘත්තීය සමිති සාමාජිකයෙක් අපි තනිකරන්නේ නැහැ. ඒ අය වෙනුවෙන් අපි හැමදාමත් පෙනී සිටිනවා. ඔබට ශක්තියක් වෙන්න අපට අදත් හැකියාව තියෙන බව මතක් කරන්න ඕනි. හැබැයි අපි දන්නවා සමහර දේශපාලන පක්ෂවලට සම්බන්ධ වෘත්තීය සමිති කරන්නේ බළලුන් ලවා කොස්ඇට බාවන එක. ඒවට අපේ අය අහුවෙන්න හොඳ නැහැ. නැති ප්‍රශ්න ඇතිකරල කෙටි පාරවල් වලින් බලයට එන්න සමහරු කරන වැඩ රටේ පැත්ත හිතලා ගන්න තිරණ නොවන බව අපි කාටත් පැහැදිලියි.
දැන් බලන්න ගෝල්ෆේස් අරගලයේ හිටියෙ කවුද කියලා. රටම දන්නවා ඒ අය දැන් මොනවද කරන්නෙ කියලා. ජනතාවට මේවා ඇගිල්ලෙන් ඇනලා පෙන්නන්න ඕන දේවල් නෙමෙයි. හොරු හොරු කියලා ලේබල් අලවලා මඩ ගහලා, කොතරම් අවලාද නැගුවත් අපි දන්නවා අපි ජනතාව වෙනුවෙන් මොනවද කරේ කියලා. රට භාර ගන්න කිවුවම පස්ස ගහලා, ඊට පහුවදා ඉඳන් භාරගත්ත අයට විරුද්ධව කෑ ගහලා වැඩක් නැහැනේ.
''දැන් මේ විපක්ෂෙට මාතෘකා නෑ. ඒ නිසා රටට හොඳ දේටත් විරුද්ධ වෙනවා.''
එතනැදි තමයි මිනිස්සු තීරණය කරන්නෙ මේ කෑ ගහන අයගේ කැරැට්ටුව මොකද්ද කියලා. එක කට්ටියක් නම් 71 බැලුවත්, 88-89 බැලුවත් ඕකම තමයි කළේ. ප්‍රජාතන්ත්‍රවාදිව නොවන ක්‍රමවලින් බලය ගන්න ගියාම අවසානයේ මොකුත් ලැබෙන්නෙ නෑ. දැන් මේ විපක්ෂෙට මාතෘකා නෑ. ඒ නිසා රටට හොඳ දේටත් විරුද්ධ වෙනවා. අපි සද්ද නොකර හිටියත් මේ අය කියන කතා අහලාම ජනතාව ඔවුන්ට විරුද්ධ වෙනවා. ඒ බව ඔලුවේ තියාගෙනයි අපි වැඩකරන්න ඕනේ. ඒ නිසා ඒ අයගේ රූකඩ නොවී හොඳ දේට හොද කියන්නත් නරක දේට නරකයි කියල විරුද්ධ වෙන්නත් අපේ වෘත්තිය සමිති නායකයන්ට ශක්තියක් තියෙන්න ඕනි.
උසස් පෙළ දරුවන්ගේ ප්‍රශ්න පත්‍ර ඇගයීමේ ගැටලුව තාම අවසන් නැහැ. විභාගෙ ලියපු දරුවෝ විශ්ව විද්‍යාලවලට ඇතුලත් වෙන්න උසස් අධ්‍යාපනය ලබන්න බලාගෙන ඉන්නවා. මේ ප්‍රශ්නය නිසා සාමාන්‍ය පෙළ විභාගයත් කල් ගියා. ඒ දරුවොත් මේ නිසා ඉන්නේ පීඩනයකින්. ඊටත් වඩා පීඩනයකින් ඉන්නේ දෙමවුපියන්. ඒක වෘත්තීය සමිති සටනක් කීවට ඒක වෘත්තීය සමිති සටනක් හැටියට අපි දකින්නේ නැහැ. හැබැයි මේකට හැම ගුරුවරයෙක්ම සම්බන්ධ නැහැ. ඔවුන්ට කරන්න දෙයක් නැතිව ඉන්නෙ. ඉතිහාසයේ කොතනකවත් දරුවන්ව ප්‍රාණ ඇපයට තියල සටන්කරල දිනාගත්ත ඉල්ලීමක් නැහැ. එහෙම දිනාගෙන වැඩකුත් නැහැ. අපි වෘත්තීය සටනක් කරනකොට මේ දේවලුත් හිතන්න ඕනි.
සැබෑ කම්කරු නායකයෝ සටන්කරන්නේ පටු දේශපාලන වාසි තකා නෙමෙයි. අපේ රටට නිදහස ලබා ගැනීමේ සටනේ දී ඉදිරියෙන්ම හිටියෙත් කම්කරු නායකයින්. ඒ අය නිදහස් සටන වෙනුවෙන් විශාල කැප කිරීමක් කළා. එදා කම්කරු ව්‍යාපාරය තමයි රටේ නිදහස දිනා ගන්න සටනේ බලවේගය වුණේ. ඔබට මතක නම් ඒ.ඊ.ගුණසිංහ, ආචාර්ය එන්. එම්. පෙරේරා, කොල්වින් ආර්. ද සිල්වා, පීටර් කෙනමන්, දොස්තර එස්.ඒ. වික්‍රමසිංහ, පිලිප් ගුණවර්ධන වගේ නායකයෝ කවදාවත් කම්කරු සටන් රට අරාජික කරන්න මෙහෙයවුයේ නැහැ. එයාල සටන් කළේ කම්කරුවන්ගේ අයිතිවාසිකම් වෙනුවෙන්.
''එදා ඒ කියපු කතාව ඇත්තක් නොවුන නිසයි රට ලේ විලක් නොවී බේරුණේ''
බලය ගන්න කලින් හිට්ලර් කෙනෙක් බලය ගන්නවා කියලා ජනතාව කුපිත කරවපු අය අවසානේ කිවුවේ මොකද් ද ? එදා ඒ කියපු කතාව ඇත්තක් නොවුන නිසයි රට ලේ විලක් නොවී බේරුණේ. ජනතාව වෙනුවෙන් බලය ගන්නවා වගේම ජනතාව වෙනුවෙන් බලය අත්හරින්නත් හැකි දේශපාලන අත්දැකීමක් අපටත් අපේ පක්ෂයටත් තියෙනවා. ඒ වගේම ඕනැම මොහොතක කවුරුත් නොහිතන තරම් සංවිධාන ශක්තියකින් නැගිටින්නත් අපට පුළුවන්. ඒ නිසා දේශපාලනික විවේචන කොතරම් කළත් මඩ දේශපාලනයට ඔබ වැටෙන්න එපා. මඩ ගහන අයට තමයි මුලින්ම මඩ ගා ගන්නෙ වෙන්නෙ.
