ජාතික ආරක්ෂාව වෙනුවෙන් විශාල මුදලක් වෙන් කර තිබියදීත් අනවසර ඉන්දීය ට්‍රෝලර් යාත්‍රා ලංකා මුහුදට පැමිණීම වැලැක්වීමට නොහැකි වීම ගැන නාවික හමුදාව දෝෂ දර්ශනයට ලක්වී සිටී.
'' පසුගිය අයවැයෙන් සියයට විස්සක මුදලක් ජාතික ආරක්ෂාවට වෙන් කර තියෙනවා. ඒත් වෙනත් රටක බෝට්ටු ඇවිත් අපේ මුහුද ආක්‍රමණය නතර කරන්න නාවික හමුදාවට බැරිව ඉන්නවා, '' යැයි දෙමළ ජාතික ජනතා පෙරමුණේ නායක, පාර්ලිමේන්තු මන්ත්‍රී ගජේන්ද්‍ර කුමාර් පොන්නම්බලම් යාපන දිස්ත්‍රික් සංවර්ධන කමිටු රැස්වීමට එක්වෙමින් නාවික හමුදාවට චෝදනා කළේය.
ධීවර ඇමැති ඩග්ලස් දේවානන්දා ගේ ප්‍රධානත්වයෙන් දිස්ත්‍රික් සංවර්ධන කමිටුව යාපන කච්චේරියේදී පැවැත්විණි.
'' කොච්චර සල්ලි වෙන් කළත් නාවික හමුදාව ජාතික ආරක්ෂාව ගැන ක්‍රියාත්මක වෙලා නැහැ. යුද්ධය පැවති කාලේ උතුරේ ධීවරයෝ නිදහසේ මාළු ඇල්ලුවා. යුද්දෙන් පස්සේ තමයි ඉන්දීය ට්‍රෝලර් යාත්‍රා අපේ මුහුදට එන්න ගත්තේ. ඒ නිසා ධීවරයන්ට ප්‍රශ්න මතුවෙලා. නාවික හමුදාව ජාතික ආරක්ෂාව අනුව ක්‍රියා කරලා මේ ඉන්දීය ට්‍රෝලර් නවත්වන්න මැලි වෙන්නේ ඇයි දැ'' යි TNPF නායකයා මෙහිදී නාවික හමුදා නිලධාරීන්ගෙන් ප්‍රශ්න කළේය.
මන්ත්‍රීවරයා කියා සිටියේ තමන් මේ ගැන පාර්ලිමේන්තුවේදීත් ප්‍රශ්න කරන බවයි.
අනවසරයෙන් ලංකා මුහුදු සිමා පනින ඉන්දීය ට්‍රෝලර් යාත්‍රා නැවත්වීමට අවශ්‍ය පිරිස් බලය නොමැති නම්, ඒ ගැන පැහැදිලිව ප්‍රකාශ කළ යුතු යැයි ශ්‍රී ලංකා නිදහස් පක්‍ෂය නියෝජනය කරන පාර්ලිමේන්තු මන්ත්‍රී අන්ගජන් රාමනාදන් පෙන්වා දෙයි.
''වෙනත් රටක බෝට්ටු අපේ මුහුදට පැමිණීම ජාතික ආරක්ෂාවට තර්ජනයක්. ඒවා නවත්වන්නේ නැති එකෙන් නාවික හමුදාව කරන්නේ අපේ ධීවරයන්ගේ ජීවනෝපායට හානි කිරීමක්,'' යැයි පාර්ලිමේන්තු මන්ත්‍රී රාමනාදන් නාවික හමුදා නිලධාරීන්ට කියා සිටියේය.
'' නීති විරෝධිව පැමිණෙන මේ බෝට්ටු නවත්වන්න නාවික හමුදාවට කරන්න පුළුවන් මොනවාද කියල සවිස්තර වාර්තාවක් ලබන කමිටු රැස්වීමට ඉදිරිපත් කරන්න ඕනා.'' මන්ත්‍රීවරයා නාවික හමුදා නිලධාරීන්ගෙන් ඉල්ලා සිටියේය.
ලංකා මුහුදේ අනවසරයෙන් මසුන් අල්ලන ඉන්දීය ට්‍රෝලර් යාත්‍රා පිළිබද ගැටලුව ගැන රාජතාන්ත්‍රික මට්ටමින් මෙන්ම දෙරටේ ධීවර සංගම් අතර ද සාකච්ජා පැවති මුත් මෙතෙක් ඒ සදහා තිරසාර විසදුමක් ඇති කර ගැනීමට සමත්වී නොමැත.
