දූෂණ විරෝධි පනත් කෙටුම්පතට පාර්ලිමේන්තුවේදී අනුමැතිය ලබාදීම මඟින් මෑත යුගයේදී ඉතාමත්ම වැදගත්
වූ කාර්යභාරයකට සහය ලබා දුන් සියළුම පාර්ලිමේන්තු මන්ත්‍රීවරුන්ට කෘතඥතාවය පළ කර සිටින බව හිටපු කතානායක කරු ජයසුරිය පවසයි.
එමෙන් ම මෙම පනත සම්මත කරගැනීම පිණිස උපදෙස් ලබා දුන් ජනාධිපතිවරයා ප්‍රමුඛ රජයටත්, ඒ සඳහා ඉමහත් වෙහෙසක් දරමින් කටයුතු කළ අධිකරණ අමාත්‍ය විජයදාස රාජපක්ෂ වෙතද ස්තූතිය හා ගෞරවය පළ කර සිටින බව හිටපු කතානායකවරයා කියා සිටියි.
ඔහු එබව සඳහන් කර ඇත්තේ, 'සාධාරණ සමාජයක් සඳහා වන ජාතික ව්‍යාපාරය' සභාපති ලෙස නිවේදනයක් නිකුත්කරමිනි.
දූෂණ විරෝධී පනත් කෙටුම්පත පිළිබදව පාර්ලිමේන්තුව තුළ මෙන්ම එයින් පරිබාහිරවද සිදු කරන ලද සංවාද හා විවාදයන්හිදී ඇතැම් පාර්ශව පෙන්වා දී ඇති ආකාරයට එය සර්ව සම්පූර්ණ එකක් නොවිය හැකි නමුත් ශ්‍රී ලංකාවේ අනාගත යහපත උදෙසා අත්‍යවශයෙන්ම තහවුරු කරගත යුතු දූෂණය තුරන් කිරීමේ දැඩි අවශ්‍යතාවය සැළකීමේදී ගෙන ඇති මෙම පියවර අගය කළ යුතුව ඇතැයි 'සාධාරණ සමාජයක් සඳහා වන ජාතික ව්‍යාපාරය' අවධාරණය කර සිටියි.
එමෙන් ම සමස්ත රටම අපේක්ෂා කර සිටින ආකාරයට මෙම පනතෙහි අරමුණ සාර්ථක කර ගැනීම උදෙසා එය සම්මත කරගැනීම පමණක් ප්‍රමාණවත් නොවනු ඇති බව පවසන එම සංවිධානය, එකී අරමුණ සම්පූර්ණ කරගැනීමේදී රජයට බරපතල මැදිහත්වීමක් සිදුකල යුතුව ඇති අතර එය සම්පූර්ණ කිරීම රජයේ වගකීමද වනු ඇතැයි පෙන්වා දෙයි.
ඒ අනුව ප්‍රථමයෙන්ම දූෂණ විරෝධි කොමිසම ස්ථාපිත කිරීමේදී එය කාර්යක්ෂම අදීන හා නිවහල් ආයතනයක් බවට තහවුරු කල යුතුව බවත්, ඒ සඳහා පත් කරගන්නා කොමසාරිස්වරුන් පටු දේශපාලන ළැඳියාවන්ගෙන් තොර පුද්ගලයන්ගෙන් විය යුතුම වන අතර සමාජයේ පිළිගැනීමට හා ගෞරවයට හේතු වන ආකාරයේ පුද්ගලයන්ගෙන් ද සමන්විත විය යුතුව ඇති බවත් කරු ජයසුරිය තවදුරටත් කියා සිටියි.
එමෙන්ම එම පත්වීම් කල් නොයවා වහාම සිදු කල යුතුව ඇති බවද ඔහු පවසයි.
එයට අමතරව මෙම කොමිසම යටතේ නීතිය ක්‍රියාත්මක කිරීමේදී පූර්ණ වශයෙන් ස්වාධීනත්වය තහවුරු වන ආකාරයට පොලීසීයේ හැසීරීම ඉතාමත්ම වැදගත් වන අතර ශ්‍රී ලංකා රේගුව හා අනෙකුත් ආයතන තුළින් ද එකී අපක්ෂපාතීභාවය පිළිබිඹු විය යුතු බව එම නිවේදනයේ සඳහන් වේ.
එමෙන්ම නව අල්ලස් හෝ දූෂණ කොමිසම් සභාව ඔවුන්ගේ විමර්ශනයන්ගෙන් අනතුරුව සිදු කරන සියළුම නඩු කටයුතු ඉතාමත්ම කඩිනමින් අවසන් කිරීමට සියළු පියවර ගත යුතුව ඇති අතර ඒ හරහා අල්ලසට හා දූෂණයට එරෙහිව සැබෑ කැපවීමක් රටට මෙන්ම සමස්ත ලෝකයටද ප්‍රදර්ශනය කල යුතුව ඇතැයි හිටපු කතානායකවරයා අවධාරණය කර සිටියි.
විශේෂයෙන් ම එක් එක් ආණ්ඩුවල වෙනස්වීම් අනුව විමර්ශනය කරමින් සිටින චෝදනාවන්ට අදාළව කොමිසමේ ස්ථාවරයන් හා ක්‍රියාමාර්ග වෙනස් නොවිය යුතුව ඇතැයිද ඔහු අවධාරණය කරයි.
එම නිවේදනයේ මෙසේද සඳහන් වේ.
මීට මාස කිහිපයකට පෙර යෙදුණ දූෂණ විරෝධී අන්තර්ජාතික දිනයේදී අපි මෙවැනි පනතක අවශ්‍යතාවය පිළිබඳව සිවිල් සමාජ සංවිධාන සමඟ එකට එක්ව පෙනී සිටීමක් සිදු කළ අතර එයට අධිකරණ අමාත්‍යවරයාටද ආරාධනා කරමින් සංවිධානයක් ලෙස වන අපගේම වූ යෝජනාවලියක් ද ඉදිරිපත් කරනු ලැබුවෙමු. අප ඒ මඟින් අපේක්ෂා කරන ලද්දේ අප රටට අත්ව ඇති වර්තමාන ඛේදනීය කළදසාව අපගේ අනාගත පරම්පරාවට හෝ උරුම කර නොදීමට අද අප සතුව ඇති වගකීම නොපිරිහෙලා ඉටු කිරීමටය.
ඒ අනුව (2023.07 19 දින) පාර්ලිමේන්තුවේදී සම්මත කර ගත් පනත ඇතැම් පාර්ශ්ව පෙන්වා දෙන ආකාරයේ යම් අඬු ලුහුඬුකම් තිබිය හැකි වුවත් ඉදිරියේදී ඒවා යථාවත් කරගන්නා තුරු මේ වන විට බලාත්මක කරගත් පනත මඟින් උපරිම දායකත්වයක් රටට ලබාදීමට සියළුම පාර්ශ්ව නොපිරිහෙළා කටයුතු කල යුතුව ඇතැයි අප අපේක්ෂා කරන්නෙමු.''
සබැඳි පුවත් :
