එම සන්ධානයේ සභාපති විශේෂඥ වෛද්‍ය චමල් සංජීව සහ සමගි ජන බලවේගයේ පාර්ලිමේන්තු මන්ත්‍රී මුජිබර් රහුමාන් ඖෂධ නියාමන අධිකාරිය වෙත පැමිණ චෝදනා පත්‍රයක් සහ පැමිණිල්ලක් ඉදිරිපත් කළහ.
මුල්ලෙරියාව ජාතික සෞඛ්‍ය ආයතනයේදී ‘ඔන්ඩස්ට්‍රෝන’ ඖෂධය ලබාදීමෙන් පසු සිදුවූ රෝගී මරණ දෙක සම්බන්ධයෙන් මාස තුනක් ගතවී ඇතත් නිසි වාර්තාවක් ඉදිරිපත් නොකිරීම රජයේ සහ බලධාරීන්ගේ අසමත්කමක් බව ඔවුන් එහිදී පෙන්වා දුන්හ.
ඖෂධ නියාමන අධිකාරියේ පවතින දුර්වල පරිපාලනය හේතුවෙන් රට පුරා ෆාමසිවල අනුමැතිය නොමැති ඖෂධ අලෙවි වන බවත්, ඖෂධ මිල පාලනය බිඳ වැටීම නිසා ඖෂධ කාණ්ඩ 600කට ආසන්න ප්‍රමාණයක් ගෙන්වීමට නොහැකි වී ඇති බවත් වෛද්‍ය චමල් සංජීව මෙහිදී අනාවරණය කළේය.
එමෙන්ම, මිල පාලන කමිටුවල සිටින ඇතැම් විශේෂඥ වෛද්‍යවරුන් සහ මහාචාර්යවරුන් ඖෂධ සමාගම් සමඟ සෘජු ගනුදෙනු පවත්වන බවට ද ඔහු මෙහිදී බරපතළ චෝදනාවක් එල්ල කළේය.
රටේ ආර්ථික අර්බුදයක් නොමැති බව රජය පැවසුවද, වෛද්‍යවරුන් ඇතුළු වෘත්තිකයන්ගේ වැටුප් දීමනා සම්බන්ධයෙන් අවධානය යොමු නොකිරීම කනගාටුදායක බව පැවසූ විශේෂඥ වෛද්‍ය චමල් සංජීව, ඖෂධ මිල අඩු කරන බවට රජය පවසන ප්‍රකාශ හුදු ප්‍රෝඩාවන් පමණක් බවත් රජයේ ප්‍රසම්පාදන පටිපාටිය යටතේ එවැනි අඩු කළ මිලට ඖෂධ ගෙන්වීමට රාජ්‍ය ඖෂධ සංස්ථාව අසමත් වී ඇති බවත් වැඩිදුරටත් අවධාරණය කළේය.
