ඉන්දීය සාම සාධක හමුදාවේ යාපන ශික්ෂණ රෝහල් සංහාරයේ 38 වැනි අනුස්මරණය 2025 ඔක්තෝබර් 21 වැනි අගහරුවාදා රෝහලේදී පැවැත් වු අතර මිය ගිය පිරිස අනුස්මරණය කරමින් මලින් පහනින් ඔවුන්ට උපහාර දැක්වීමට රෝහල් කාර්ය මණ්ඩලය ඇතුළු පිරිස කටයුතු කර තිබේ.
ඝාතනයට ලක් වු නිරායුද වැසියන්ගේ පවුල් වල සාමාජිකයන් කිහිපදෙනකුද එම අවස්ථාවට එක්ව සිටියේ හැඬු කඳුලින් යුතුවයි.
සාම සාධනය සඳහා යැයි රජයේ ආරාධනයෙන් පැමිණ උතුරේ වාඩිලා සිටි ඉන්දීය භටයන් විසින් සමූහ ඝාතන මාලාවක්ම සිදු කර ඇත්තේ 1987 ඔක්තෝබර් මාසයේය.
1987 ඔක්තෝබර් 21 වැනිදා ලුතිනන් ජෙනරාල් දිපේන්ද්‍ර සිං ගේ ප්‍රධානත්වයෙන් යුත් ඉන්දීය සාම සාධක හමුදා භට පිරිස් යාපනය ශික්ෂණ රෝහලට කඩා වැදී සිදු කළ වෙඩි ප්‍රහාරයෙන් රෝහල් කාර්ය මණ්ඩලයේ 21 ක් සහ ප්‍රතිකාර ලබමින් සිටී රෝගීන් 47 ක් ඇතුළු 68 දෙනකු මරා දැමිණි.
ඉන්දීය හමුදා විසින් මරා දැමුවන් අතර ඒ. සිවපාදසුන්දරම්, එම්.ජේ.ගනේෂරත්නම් සහ කේ. පරිමලර් වෛද්‍යවරු තිදෙනාත්, ආර්. රාමනාදන්, සිවපාතියම් සහ ලීලාවතී හෙදියන් තිදෙනාත්, දුරකථන ක්‍රියාකරු කනගලිංගම්, වැඩ සුපරික්ෂකයන් වූ ආර්.ක්‍රිෂ්නරාජ්, කේ. සෙල්වරාජ් සහ වී. ෂන්මුගලිංගම් නම් ගිලන් රථ රියදුරා ද වුහ.
රෝහල් ප්‍රහාරය ඇතුළු ඉන්දීය සමූහ ඝාතන සම්බන්ධයෙන් කිසිදු පරීක්ෂණයක් හෝ හානියට පත් වුවන්ට වන්දි ගෙවීමක් හෝ ගෙවී ගිය තිස් අට වසර තුලදී පෝක් සමුද්‍ර සන්ධිය දෙපස කිසිදු ආණ්ඩුවකින් සිදුවී නැත.
ඉන්දීය හමුදා විසින් 1989 අගෝස්තු මාසයේ දී දරුවන්, ගැහැනුන් හා වැඩිහිටියන් ඇතුළු හැටකට වැඩි පිරිසක් මරා දැමීම සම්බන්ධයෙන් වැල්වැටිතුරේ පුරවැසි කමිටුව ඉකුත් සතියේ ආණ්ඩුවෙන් රුපියල් බිලියන පහක වන්දි ඉල්ලා සවිස්තර ලේඛනයක් හානිපුර්ණ කාර්යාලයට ලබාදී තිබේ.
සබැඳි පුවතක් :
ඉන්දීය හමුදා උතුරේ කළ අපරාධයකට ලංකාවේ ආණ්ඩුවෙන් කෝටි ගණනක වන්දි ඉල්ලයි
