තමන් සූදානම් බව ශ්‍රී ලංකා මහ බැංකුවේ අධිපති ආචාර්ය පී. නන්දලාල් වීරසිංහ ප්‍රකාශ කළේය.
පාර්ලිමේන්තු මන්ත්‍රීවරුන් නගන ප්‍රශ්නවලට පිළිතුරු ලැබීම ප්‍රමාද වන්නේනම් තම නියෝජිතයින්ට පාර්ලිමේන්තුවට පැමිණ පිළිතුරු ලබාදිය හැකිවන පරිදි කටයුතු කළ හැකි බවද අධිපතිවරයා පෙන්වා දුන්නේය.
මහ බැංකු නිලධාරීන් රාජ්‍ය මුදල් පිළිබඳ කාරක සභාවට කැඳවූ අවස්ථාවේදී මතුවූ පැනයක් සම්බන්ධයෙන් අප කළ විමසුමකට පිළිතුරු ලබා දෙමින් අධිපතිවරයා ඒ බව සඳහන් කළේය.
එහිදී වැඩිදුරටත් අදහස් දැක්වූ මහ බැංකු අධිපතිවරයා.
නියමිත වේලාවට ම අපි පිළිතුරු යොමුකරනවා
"මන්ත්‍රීවරයෙක් ප්‍රශ්නයක් යොමුකළ විට එය ඍජුවම යොමුවන්නේ මුදල් අමාත්‍යවරයාට. එවිට ඔවුන් ඒ සඳහා සමහර අවස්ථාවලදී අප සමග සම්බන්ධ වනවා. මුදල් ඇමැතිවරයා අපගෙන් තොරතුරු සහ පිළිතුරු ඉල්ලූ සැනින් අප ඒවා ලබා දෙනවා. එය පාර්ලිමේන්තුවට සෘජුව ඉදිරිපත් කළ හැක්කේ අපට නොව මුදල් ඇමැතිවරයාටයි. නැත්නම් මුදල් නියෝජ්‍ය ඇමැතිවරයාටයි. එයයි සාමාන්‍ය ක්‍රමවේදය.
උදාහරණයක් ලෙස අද දිනයේ ප්‍රශ්නයක් යොමුකළ හොත් ඊට හෙට පිළිතුරු දෙනවා යැයි සිතමු. පැනය විමසූ දිනයේම පිළිතුරු ලබාදීමට නොහැකි වන්නේ අපගෙන් තොරතුරු විමසීමට යම් කාලයක් යනවාටත් වඩා ඊට සෘජුව අපට පිළිතුරු දීමට හැකි නොවීම නිසයි.
මට සහතික වෙන්න පුළුවන් මුදල් අමාත්‍යවරයා හරහා මහ බැංකුවට ලැබෙන සියලුම ප්‍රශ්නවලට අපි පිළිතුරු යොමුකරනවා නියමිත වේලාවට. නමුත් එය ක්‍රියාවලිය නිසි වේලාවට සිදුවන්නේ නැහැ. ඇතැම් ප්‍රශ්න මහ බැංකුවට පමණක් අදාළ වන්නේ නැහැ. එම ප්‍රශ්න මහ බැංකුව, මුදල් අමාත්‍යාංශය ඇතුළු ආයතනවලට අදාළ වනවා. මුදල් අමාත්‍යවරයා ඒ සියලු ආයතනවලින් ලබාගන්නා පිළිතුරු එකතු කර, වාර්තාවක් සම්පාදනය කර අදාළ අමාත්‍යවරයාට ලබා දෙනවා. අපිට ආරාධනා කරනවානම් අපිට ප්‍රශ්නයක් නැහැ පාර්ලිමේන්තුවට ඇවිල්ලා පිළිතුරු සැපයීමට හැකියාව තිබෙනවා.
මහ බැංකු පනත අනුව සෑම මාස හතරකට වරක්ම පාර්ලිමේන්තුවට පැමිණ පිළිතුරු ලබාදීමට හැකි එකම රාජ්‍ය ආයතනය මහ බැංකුව පමණයි යැයිද අධිපතිවරයා වැඩිදුරටත් පැහැදිලි කළේය.
(සටහන | ජේ.මුණසිංහ)
