එරට පොලීසිය උපුටා දක්වමින් එහි මාධ්‍ය වාර්තාවල දැක්වෙන්නේ ඊයේ රාත්‍රී 8:30 ට පමණ ගෝසෝං හි පිහිටි එම මත්ස්‍ය ගොවිපළේ විශාල ජලාශ ටැංකියක් තුළදී සිරුරු සොයාගත් බවයි.
මියගිය අය අතර 50 ගණන්වල පසුවන ස්ථාන අධීක්ෂකවරයෙකු සහ 20 සහ 30 ගණන්වල පසුවන ශ්‍රී ලාංකික සේවකයින් දෙදෙනෙකු ඇතුළත් බව එම මාධ්‍ය වාර්තා පවසයි.
ජල ටැංකිය මීටර හතරක් (අඩි 13ක්) පළලින්, මීටර තුනක් දිගින් සහ මීටර දෙකක් ගැඹුරින් යුක්ත බවත්, සේවකයින් සොයාගන්නා විට ටැංකිය ජලයෙන් පිරී තිබූ බවත් වාර්තා වේ.
මෙම ටැංකිය, කුඩා මසුන් බෝ කරන ගොවිපළට ජලය සැපයීම සඳහා වූ ගබඩා ජලාශයක් ලෙස භාවිත කර ඇත.
බෝ කිරීමේ ටැංකි වෙත පොම්ප කිරීමට පෙර ජලය විදුලි උපකරණ භාවිතයෙන් රත් කිරීම හෝ සිසිල් කිරීම සිදු කෙරෙන බව සඳහන් වේ.
ටැංකියට පිවිසීමට ඇත්තේ එක් වැඩිහිටියෙකුට පමණක් යන්තම් යා හැකි තරම් විශාල විවරයකින් පහළට විහිදෙන ඉණිමඟක් මගින් බව පැවසේ.
පොලීසියට මුලින්ම දැනුම් දී ඇත්තේ රාත්‍රී 7:38 ට පමණ ස්ථාන අධීක්ෂකවරයාගේ පවුලේ අය විසින් බව මාධ්‍ය වාර්තාවල දැක්වේ.
අනතුරුව නිලධාරීන් එම ස්ථානය පරීක්ෂා කිරීමෙන් පසු සිරුරු සොයාගෙන ඇත.
මියගිය ශ්‍රී ලාංකික සේවකයින් දෙදෙනාගෙන් එක් අයෙකු රාජකාරියේ යෙදෙන ඇඳුම් ලෙස පෙනෙන ඇඳුමක් ඇඳ සිටි අතර, අනෙක් දෙදෙනා සාමාන්‍ය ඇඳුමින් සැරසී සිට තිබේ.
මරණයට හේතුව නිශ්චිතව තීරණය කිරීම සඳහා පරීක්ෂණයේ කොටසක් ලෙස මරණ පරීක්ෂණයක් පැවැත්වීමට නියමිතය.
පොලිස් නිලධාරියෙකු ප්‍රකාශ කළේ, සේවකයින් එම අවස්ථාවේදී ටැංකිය පිරිසිදු කරමින් සිටියාද යන්න පැහැදිලි නොමැති බවයි.
පොලීසිය දැනට මෙය කාර්මික අනතුරක් ඇතුළු විවිධ හැකියාවන් සලකා බලමින් සිටින බව ඔහු වැඩිදුරටත් පැවසු බව එරට මාධ්‍ය වාර්තා කරයි.
Three workers found dead inside water tank at Goseong fish farm
