විපතට පත් ජනතාව මුදාගැනීම සහ සහන සැලසීම වෙනුවෙන් ක්‍රියාත්මක ගුවන් හමුදා මෙහෙයුම් පිළිබදව ද ජනාධිපතිවරයා ගුවන් හමුදා මූලස්ථානයේදී අධීක්ෂණයට ලක් කර තිබිණ.
කලාඔයේ පිරිස බේරා ගන්න කණ්ඩායම් කීපයක්
රාජාංගනය, කලා ඔය ප්‍රදේශයේදී බස් රථයක සිටියදී එම බස් රථයෙන් බේරාගෙන අසල තිබූ නිවසක වහලය මත රඳවා සිටින මඟීන් පිරිස බේරා ගැනීම සඳහා විශේෂ කණ්ඩායම් කිහිපයක් මෙහෙයුම්වල නිරත වන බව නාවික හමුදාපති වයිස් අද්මිරාල් කාංචන බානගොඩ පැවසීය.
එම පිරිස බේරා ගැනීම සඳහා ඊයේ සවස එම ස්ථානයේ මෙහෙයුම් කටයුතුවල නිරත නාවික හමුදා පළමු මෙහෙයුම් කණ්ඩායම අනතුරට ලක් ව තිබූ අතර දැඩි වෙහෙසක් දරා එම කණ්ඩායම නාවික හමුදා නිලධාරීන් බේරා ගත් බවද නාවික හමුදාපතිවරයා පැවසුවේය.
ඔහු ඒ බව පැවසුවේ ඊයේ රාත්‍රියේ විශේෂ ප්‍රකාශයක් සිදු කරමිනි.
මේ වෙන විට නාවික හමුදාවේ ක්ෂණික බල බලගනයේ විශේෂ මෙහෙයුම් කණ්ඩායම්, විශේෂ යාත්‍රා බල ගණයේ නාවික හමුදා කිමිදුම් කණ්ඩායම් යුද හමුදාවේද සහාය ඇතිව එම පිරිස වැඳී සිටින ගොඩනැගිල්ල වෙත ළඟා වෙමින් පවතින බවද පැවසූ නාවික හමුදාපතිවරයා කියා සිටියේ කලා ඔය අසල පවතින දැඩි රළු ජල පහර නාවික හමුදා ගලවා ගැනීම් කණ්ඩායම්වලට අභියෝගයක් බවත් කොපමණ අභියෝග පැමිණියත් එම පිරිස ගලවා ගැනීමේ මෙහෙයුම් වල නිරත වන බවය.
එම නිවසෙහි ඉහළ මහල කොටසේ රැඳී සිටින එම මගින් පිරිස බේරා ගැනීම සඳහා ගුවන් හමුදාව සහ යුද හමුදාව ද නාවික හමුදා මෙහෙයුම් කණ්ඩායමට සහාය ලබාදෙන බවද නාවික හමුදාපතිවරයා කීය.
එම බස් රථයේ සිටි මගින් පිරිස ගුවන් හමුදා මෙහෙයුම් කණ්ඩායම් විසින් එම බස් රථයෙන් මුදවා ගෙන අසල තිබූ ගොඩනැගිල්ලක් මතට රැගෙන යාමෙන් අනතුරුව එම කණ්ඩායම බේරා ගැනීමේ ඉදිරි මෙහෙයුම නාවික හමුදාව වෙත භාරදී තිබූ බවද කාංචන බානගොඩ කීය.
