මෙම වෛද්‍යාධාර තොගයට අත්‍යවශ්‍ය ඖෂධ, වෛද්‍ය උපකරණ මෙන්ම, අඛණ්ඩ ගලවා ගැනීමේ සහ සහන මෙහෙයුම් සඳහා සහාය වීමට යෙදවිය හැකි ක්ෂේත්‍රමය පහසුකම්ද ඇතුළත් වේ. හදිසි අවස්ථාවන්හිදී කඩිනමින් භාවිත කිරීම සඳහා නිර්මාණය කර ඇති අංගසම්පූර්ණ ක්ෂේත්‍ර රෝහල් ඒකක දෙකක්ද මෙහි ඇතුළත් වන අතර, මෙම ඒකකවලින් එකක් වැලිමඩ ප්‍රදේශයෙහි ස්ථාපිත කිරීමට නියමිතය.
ඉන්දියානු මහ කොමසාරිස් සන්තෝෂ් ජා විසින් මෙම වෛද්‍යාධාර තොගය නිල වශයෙන් භාර දුන් අතර, යුද හමුදා අධ්‍යක්ෂ ජෙනරාල් මේජර් ජෙනරාල් ටිරාල් ද සිල්වා ඇතුළු පිරිසක් විසින් එය භාර ගනු ලැබීය.
මීට අමතරව, ආපදාවට පත් ජනතාව සඳහා වෛද්‍ය සහාය ලබා දීමට වෛද්‍යවරුන්, සර්වාංග සහ කායික රෝග විශේෂඥයින්, නිර්වින්දන වෛද්‍යවරුන් සහ අනෙකුත් සෞඛ්‍ය විශේෂඥයින් ඇතුළු වෛද්‍ය වෘත්තිකයන් 73 දෙනෙකුගෙන් යුත් කණ්ඩායමක්ද ඉන්දියාවෙන් මෙරටට පිටත් කර එවා තිබේ.
