අධිකරණය ලබාදුන් නියෝග මත ඔහු එම බන්ධනාගාර රෝහලට ඇතුළත් කළ බව බන්ධනාගාර ආරංචි පවසයි.
කෙසේවෙතත් ඔහුට කිසිදු විශේෂ පහසුකම් ලබා දී නොමැත.
ඔහුට මහර බන්ධනාගාරය තුළ දැඩි ආරක්ෂාව සපයා ඇති අතර අමුත්තන් හමුවීමද සීමා කර ඇතැයි බන්ධනාගාර ආරංචි මාර්ග කියයි.
පෙරේදා (28)පස්වරුවේ මහර බන්ධනාගාර වෙත රැගෙන ආ හිටපු අමාත්‍ය ඩග්ලස් දේවානන්දා පළමුව බන්ධනාගාර වෛද්‍යවරයා විසින් පරීක්‍ෂා කිරීමෙන් පසු බන්ධනාගාර රෝහලේ වාට්ටුවකට ඇතුළත් කර ඇත.
අද දිනයේ වෛද්‍ය සායනයක් සදහා ඔහු රාගම රෝහල වෙත රැගෙන යාමට නියමිත බවද බන්ධනාගාර ආරංචි වැඩි දුරටත් කියා සිටියි.
රජය නීත්‍යනුකූලව ඔහුට ලබාදුන් ගිනි අවියක් පාතාල කල්ලි සාමාජිකයකු අතට පත්වීමේ සිද්ධියක් සම්බන්ධයෙන් අධිකරණය විසින් ඔහුව ජනවාරි 09 වැනිදා දක්වා රක්ෂිත බන්ධනාගාරගත කරන ලෙස නියම කෙරිණි.
ජොහාන් ප්‍රනාන්දුත් මහර
මේ අතර රක්ෂිත බන්ධනාගාර ගත කළ හිටපු අමාත්‍ය ජොන්ස්ටන් ප්‍රනාන්දු ගේ පුත් ජොහාන් ප්‍රනාන්දු මහර බන්ධනාගාරයේ රඳවා ඇත.
එම බන්ධනාගාරයේ රෝහලට අයත් වාට්ටුවක තවත් රැදවියන් 200 කට අධික පිරිසක් සමග ඔහු රඳවා සිටින බව බන්ධනාගාර ආරංචි මාර්ග පවසයි.
මහර බන්ධනාගාරයට රැගෙන එන නවක රැදවියන් පළමුව එම බන්ධනාගාර රෝහලට අයත් 7 සහ 8 යන වාට්ටු දෙකේ රඳවනු ලබයි.
සතියක් පමණ කාලයක් එහි රදවා තැබීමෙන් අනතුරුව ඔවුන් වෙනත් වාට්ටුවකට මාරු කරන බව බන්ධනාගාර ආරංචි පවසයි.
පොලිස් මූල්‍ය අපරාධ කොට්ඨාසය විසින් අත්අඩංගුවට ගත් හිටපු අමාත්‍ය ජොන්ස්ටන් ප්‍රනාන්දු ගේ පුත්‍රයා ලබන 9 වනදා දක්ව රක්ෂිත බන්ධනාගාර ගත කරන ලෙසට වත්තල මහේස්ත්‍රාත් අධිකරණය ඊයේ නියෝග කළේය.
