එම අරමුදල විසින් මෙරටට ලබාදී තිබෙන විස්තීර්ණ ණය පහසුකමේ පස්වන සමාලෝචනය සම්බන්ධයෙන් සාකච්ඡා කිරීම සඳහා තම නියෝජිතයින් එක්වන බව අරමුදල කියා සිටී.
ඉකුත් වසරේ නොවැම්බර් 28 වනදා ශ්‍රී ලංකාවට බලපෑ දිට්වා සුළි කුණාටුව හේතුවෙන් අරමුදල සමග සාකච්ඡා නියමිත පරිදි පැවැත්වීම මදකට කල් දැමිණි.
ඒ අනුව එම කල් දැමූ සාකච්ඡාව ලබන සතියේ ආරම්භ කිරීමේ අරමුණින් තම නියෝජිතයින් මෙරටට පැමිණෙනු ඇතැයි ජාත්‍යන්තර මූල්‍ය අරමුදල කියයි.
පස්වන සමාලෝචනය මේ වනවිට අවසන් වී ඇති අතර ඊට අනුමැතිය ලබාදීම සඳහා ජාත්‍යන්තර මුල්‍ය අරමුදලේ විධායක මණ්ඩලය පසුගිය මස 15 වනදා රැස්වීමට නියමිතව තිබුණි.
එය පසුව කල්දමනු ලැබුවේ ආපදා තත්ත්වය මුල් කරගනිමින් ශ්‍රී ලංකාව කඩිනම් මුල්‍ය පහසුකමක් ඉල්ලීම හේතුවෙන් වන අතර ඊට ප්‍රතිචාර දක්වමින් අරමුදල විසින් එක්සත් ජනපද ඩොලර් මිලියන 206ක මූල්‍ය පහසුකමක් ලබා දෙන ලදී.
(සටහන | ජේ.මුණසිංහ)
