ඔවුන් දැඩි ආරක්ෂක විධිවිධාන මධ්‍යයේ අද අලුයම 05.20 ට ඩුබායි සිට ශ්‍රී ලන්කන් ගුවන් සේවයේ යූ.එල්.- 226 දරණ ගුවන් යානයෙන් කටුනායක ගුවන් තොටුපොළ වෙත රැගෙන විත් තිබුණි.
මෙම පිරිස එරට ආරක්ෂක අංශ විසින් අත්අඩංගුවට ගෙන සිටි අතර අපරාධ පරීක්ෂණ දෙපාර්තමේන්තුවේ නිලධාරීන් කණ්ඩායමක් ගොස් මොවුන් දිවයිනට රැගෙන ආ බව පොලිස් මාධ්‍ය ප්‍රකාශක, සහකාර පොලිසි අධිකාරි එෆ්. යු වුට්ලර් සඳහන් කළේය.
දිවයිනට රැගෙන ආ සැකකරුවන් අතර හිටපු අමාත්‍ය මංගල සමරවීරගේ සම්බන්ධීකරණ ලේකම්වරයෙකු ලෙස කටයුතු කළ සමීර මනහරට කඳානේදී වෙඩිතැබීමේ සිද්ධිය මෙහෙයවූ බවට සැකකෙරෙන රංජිත් කුමාර හෙවත් කොණ්ඩ රංජි නැමැත්තාගේ ප්‍රධානම ගෝලයා වන කිරිඇල්දෙණියගේ දොන් රසික සංජීව කුමාර නොහොත් චූටි මල්ලී නැමැත්තා ද සිටින බව සඳහන්වේ. ඔහු කදාන ප්‍රදේශයේ පදිංචි 30 හැවිරිදි වියේ පසු වන්නෙකි.
එමෙන්ම ඇල්පිටියේ සිදු වූ පුද්ගල ඝාතනයකට සම්බන්ධ ඌරගහ ඉන්දික නැමැති අපරාධකරුගේ සමීපතමයෙකු වන රවීන් චමින්ද වීරසිංහ හෙවත් පුංචා නැමැත්තා ද දිවයිනට රැගෙන ආ පිරිස අතර සිටින බව වාර්තා වේ.
මොවුන් දෙදෙනා මත්ද්‍රව්‍ය ජාවාරම්කිරීම, කප්පම් ගැනීම, මංකොල්ලකෑම් සහ මනුෂ්‍ය ඝාතන සදහා චෝදනා ලැබූවන් වේ.
මීට අමතරව මුදල් වංචා කිරීමක් සම්බන්ධ පොලිස් විමර්ශන සදහා අත්‍යාවශ්‍යව සිටි රත්මලාන ප්‍රදේශයේ පදිංචි 56 හැවිරිදි හේවා කසකාරගේ රුජා නිශාමනී ද සිල්වා ද මෙසේ අත් අඩංගුවට ගෙන කටුනායක ගුවන් තොටුපොළ වෙත රැගෙන විත් තිබුණි.
