රතු නිවේදන නිකුත් කරනු ලබන්නේ ශ්‍රී ලංකාව ඇතුළු රාජ්‍ය 196ක් සාමාජිකත්වය දරන ඉන්ටර්පොල් නමින් ප්‍රකට ජාත්‍යන්තර අපරාධ පිලිබඳ පොලිස් සංවිධානයයි.
“මේ වන විටත් රටෙන් බැහැරව සිටින, සැඟව සිටින සහ විශේෂයෙන් විදේශගතව සිට ජාලගත අපරාධ මෙහෙයවන අපරාධකරුවන් මේ වනවිට රාශියක් අපි හඳුනාගෙන තියෙනවා. ඔවුන් සඳහා රතු නිවේදන 95ක් මේ වනවිට නිකුත් කිරීම සඳහා අපි කටයුතු කරලා තියෙනවා” යි පොලිස් මාධ්‍ය ප්‍රකාශක FUK වුට්ලර් ඉකුත් සිකුරාදා (16) කොළඹදී ජනමාධ්‍ය හමුවේ කියා සිටියේය.
කෙසේ වෙතත්, ඉන්ටර්පොල් ආයතනය මේ වනවිට ප්‍රසිද්ධියට පත් කර ඇති රතු නිවේදන 6484 අතරින් ශ්‍රී ලාංකිකයන් ඉන්නේ හය දෙනකු පමණකි.
“රතු නිවේදනයක් යනු පිටුවහල් කිරීමට, යටත් වීමට හෝ ඒ හා සමාන නීතිමය ක්‍රියාමාර්ග ගැනීමට නියමිත පුද්ගලයකු සොයා ගැනීමට සහ තාවකාලිකව අත්අඩංගුවට ගැනීමට ලොව පුරා නීතිය ක්‍රියාත්මක කරන ආයතනවලින් කරන ඉල්ලීමකි. රතු නිවේදනයක් යනු අත්අඩංගුවට ගැනීම සඳහා නිකුත් කළ ජාත්‍යන්තර වරෙන්තුවක් නොවේ,” යි ඉන්ටර්පොල් වෙබ් අඩවියේ දැක්වේ.
එම පුද්ගලයන් අත් අඩංගුවට ගැනීමට අවශ්‍යයයි ඉල්ලා සිටීමේ හැකියාව ඇත්තේ සාමාජික රටවලට හෝ ජාත්‍යන්තර විනිශ්චය සභාවලටය.
95 දෙනකු වෙනුවෙන් රතු නිවේදන නිකුත් කොට ඇති බව පවසන ශ්‍රී ලංකාවේ පොලිසිය මේ වනවිට තමන්ගේ වෙබ් අඩවියෙන් ප්‍රසිද්ධියට පත් කොට ඇති අවශ්‍ය පුද්ගලයන් සංඛ්‍යාව 22ක් පමණකි.
