කම්කරු කොමසාරිස් ජනරාල් එච්. එම්. ඩී. එන්. කේ. වටලියද්ද නිවේදනය කළ පරිදි, 2026 ජනවාරි 01 සිට ක්‍රියාත්මක වන පරිදි පෞද්ගලික අංශයේ සේවකයකුගේ අවම මාසික වැටුප රුපියල් 27,000 සිට රුපියල් 30,000 දක්වා ඉහළ යනු ඇත.
මෙම වැටුප් වැඩිකිරීම හුදු මුදල් ප්‍රමාණයක් එක්වීමකට එහා ගිය නීතිමය සහ ආර්ථිකමය වැදගත්කමකින් යුක්ත වන්නකි.
නීතිමය රාමුව සහ සේවායෝජක වගකීම
2025 අංක 11 දරන සේවකයන්ගේ ජාතික අවම වේතන සංශෝධන පනත මඟින් මෙම වැඩිවීම තහවුරු කර ඇත. මෙහි ඇති විශේෂත්වයන් කිහිපයකි:
හිලවු කිරීම තහනම් වීම:
මෙම වැඩි වීමට අනුව 2025 මාර්තු 31 වන විට සේවකයකු ලබමින් සිටි වෙනත් කිසිදු දීමනාවක් මෙම රුපියල් 3,000ක වැඩිවීමට හිලවු කිරීමට (Offset) සේවායෝජකයාට අයිතියක් නැත.
ව්‍යවස්ථාපිත ගෙවීම්වලට අදාළ වීම:
නව අවම වැටුප පදනම් කරගෙන EPF, ETF, අතිකාල දීමනා (OT), පාරිතෝෂික (Gratuity) සහ නිවාඩු දින ගෙවීම් නැවත ගණනය කළ යුතුය.
කොන්ත්‍රාත් සේවක සුරක්ෂිතතාව:
අතරමැදියන් හරහා සේවයේ යොදවා ඇති සේවකයන් සම්බන්ධයෙන් ද මූලික සේවායෝජකයා මෙම වැටුප ගෙවීමට බැඳී සිටියි.
පෞද්ගලික අංශයේ වැටුප් පිළිබඳ වත්මන් තත්ත්වය
ශ්‍රී ලංකාවේ සමස්ත ශ්‍රම බලකායෙන් 60%කට වඩා නියෝජනය කරන්නේ පෞද්ගලික අංශයයි. මෑතකාලීන ආර්ථික දත්ත අනුව 2022 වසරේ සිට පැවති අධි උද්ධමනය හේතුවෙන් පෞද්ගලික අංශයේ සේවකයන්ගේ “සැබෑ වැටුප” (Real Wage) 30% – 40% අතර ප්‍රමාණයකින් පහළ බැස තිබේ.
රුපියල් 3,000ක වැඩිවීමක් යනු යම් සහනයක් වුව ද, පවුලක මූලික ජීවන වියදම පියවා ගැනීමට එය ප්‍රමාණවත් ද යන්න ගැටලුවකි. එසේම මෙම වැටුප් වැඩිකිරීම ක්‍රියාත්මක කිරීමේදී කුඩා පරිමාණ සේවායෝජකයන්ට පිරිවැය කළමනාකරණය කරගැනීමේ ගැටලුවලට මුහුණ දීමට සිදුවිය හැකිය. කෙසේ වෙතත්, මෙය “අවම වැටුපක්” වන බැවින් එය ගෙවීම අනිවාර්ය වනු ඇත.
පැමිණිලි කළමනාකරණය සහ නීතිය ක්‍රියාත්මක කිරීම
සේවායෝජකයන් මෙම සංශෝධන පැහැර හරින්නේ නම්, සේවකයන්ට කම්කරු දෙපාර්තමේන්තුවේ සබැඳි පද්ධතිය (cms.labourdept.gov.lk) හරහා හෝ ලිඛිතව පැමිණිලි කළ හැකිය. නීතිය නිසි ලෙස ක්‍රියාත්මක නොවීම පෞද්ගලික අංශයේ පවතින ප්‍රධාන ගැටලුවක් වන අතර, නව පද්ධතිය හරහා එය විධිමත් කිරීමට රජය අපේක්ෂා කරයි.
සමාජ ආරක්ෂණ ජාලය ශක්තිමත් වෙයිද?
මෙම වැටුප් වැඩි කිරීම ශ්‍රී ලංකාවේ “සමාජ ආරක්ෂණ ජාලය” ශක්තිමත් කිරීමේ පියවරක් ලෙස සැලකිය හැකිය. වැටුප් වැඩිකිරීමත් සමඟ භාණ්ඩ හා සේවා මිල ඉහළ යාම පාලනය කිරීමට රජය මැදිහත් වන්නේ නම් පමණක් සේවකයාට මෙම රුපියල් 3,000ක වැඩිවීමේ සැබෑ ප්‍රතිලාභය භුක්ති විඳිය හැකි වනු ඇත.
( lankalokaya | චමිඳු නිසල් ද සිල්වා)
