ප්‍රවාහන අමාත්‍ය බිමල් රත්නායක පවසයි.
හෙට (31) දිනයේදී ව්‍යවස්ථාදායක සභාව රැස්වීමට නියමිත අතර එහිදී ඒ සම්බන්ධයෙන් අවසන් තීරණයක් ගැනීමට නියමිත බවද ඔහු සඳහන් කළේය.
මීට පෙර අවස්ථා 4කදී ජනාධිපතිවරයා විසින් විගණකාධිපති ධුරය සඳහා නම් 4ක් යෝජනා කළ අතර ව්‍යවස්ථාදායක සභාව නිසි පරිදි විධායක බලය ඉටු නොකිරීම හේතුවෙන් මේ දක්වාත් විගණකාධිපති ධුරය හිස්ව පවතින බව අමාත්‍යවරයා පැවසීය.
මාස ගණනක් තිස්සේ ආන්දෝලනයට තුඩු දී ඇති රජයේ විගණකාධිපති ධුර පුරප්පාඩුව සඳහා ජනාධිපතිවරයා විසින් යෝජනා කරන නාමය පිළිබඳව දේශපාලන ක්ෂේත්‍රයේ දැඩි අවධානයක් යොමු වී ඇත.
මේ අතර මෙම සති අන්තයේ 'අනිද්දා'' පුවත්පතේ ප්‍රධාන සිරස්තලය ලෙස වාර්තා කර ඇත්තේ, ජනාධිපතිවරයා විසින් විගණකාධිපති ලෙස විවෘත විශ්ව විද්‍යාලයේ මුල්‍ය අධිකාරිගේ නම යෝජනා කිරීමට සැරසෙන බවයි. ඔහු කැලණිය විශ්ව විද්‍යාලයේ උපාධිධාරියෙකි.
කෙසේවුවද ආණ්ඩුවේ අභ්‍යන්තර ආරංචිමාර්ග පවසන්නේ, මීට පෙර අනුමැතිය සඳහා ඉදිරිපත් කර ව්‍යවස්ථාදායක සභාව විසින් ප්‍රතික්ෂේප කරන ලද විගණන කාර්යාලයේ ජ්‍යෙෂ්ඨ නියෝජ්‍ය විගණකාධිපති එල්.එස්.අයි. (L.S.I.) ජයරත්න ගේ නම, ජනාධිපතිවරයා විසින් නැවත වරක් යෝජනා කිරීමේ සුදානමක් පවතින බවයි.
විවෘත විශ්වවිද්‍යාලයේ බර්සර්වරයෙකු වන ආචාර්ය අනුර වික්‍රමසිංහගේ නම මේ සඳහා යෝජනා වී ඇති බවට පසුගිය දිනවල රාවයක් පැතිර ගියද, ඔහුට අදාළ වෘත්තීය සුදුසුකම් නොමැති බව හෙළිවීමත් සමඟ එම උත්සාහය ව්‍යර්ථ වී ඇතැයි පැවසේ.
සබැඳි පුවත් :
විගණකාධිපති ධුරයට ප්‍රතික්ෂේපිත නමක් යළිත් ! - අලුත් ව්‍යවස්ථාදායක සභාව අද රැස්වේ
විගණකාධිපති තනතුරට ධර්මපාල පත් කරන්න - මහනායක හිමිවරු ඉල්ලති
