ඔහු අද (පෙබරවාරි 3 වැනිදා) උදෑසන 10.15ට පමණ අපරාධ පරීක්ෂණ දෙපාර්තමේන්තුව හමුවට පැමිණියේ ය.
පසුගිය 26 වන දා ඔහුට එහි පැමිණෙන්නැයි දැනුම් දී තිබූ අතර, ඒ සඳහා සතියක කාලයක් ලබා දෙන්නැයි, ඉන්දියාවේ සංචාරයක යෙදී සිටි නාමල් රාජපක්ෂ අපරාධ පරීක්ෂණ දෙපාර්තමේන්තුවෙන් ඉල්ලා තිබිණි.
නාමල් රාජපක්ෂ එහි කැඳවා ඇත්තේ, දැනට රැඳවුම් භාරයේ සිටින සංවිධානාත්මක අපරාධ කල්ලි නායක කෙහෙල්බද්දර පද්මේ සමඟ සබඳතා පැවැත්වූ බවට එල්ල වී ඇති චෝදනා සම්බන්ධයෙන් සිදු කෙරෙන විමර්ශනයකට අදාළව ප්‍රකාශ ලබා ගැනීම සඳහා ය.
ඔහු අද අපරාධ පරීක්ෂණ දෙපාර්තමේන්තුවට ගොස් ප්‍රකාශයක් ලබාදී පැමිණෙන අවස්ථාවේදී ඔහුගේ ආධාරකරුවන් විශාල පිරිසක් ඔහු ජයග්‍රාහී ලෙස පිළිගනු ලැබිය.
