මරුමුවට පත් සිත්තන්කේනියේ ඇල්පිනෝ අයුබ්රාජ් අරුල් ෆයාස් 2008 නොවැම්බර් මස 09 වැනි දින උපත ලද්දකු බව ඔහුගේ උප්පැන්නයේ මෙන්ම මරණ පරීක්ෂණ වාර්තාවේ ද සඳහන් වෙතත් පොලිසිය පවසන්නේ ඔහු 19 හැවිරිදි වැඩිහිටියකු බවයි.
මහත් ශෝකාතුර මෑණියන් ප්‍රමුඛ පවුලේ ඥාතීන් දරුවාගේ දේහය සුසාන භුමිය කරා ගෙන යන අවමංගල පෙරහැර විරෝධතාවකට පෙරලා ගනිමින් බල කර සිටියේ දරුවාගේ ඝාතනයට වගකිව යුතු පොලිසියේ නිලධාරීන් වහා අත් අඩංගුවට ගෙන යුක්තිය ඉටු කරන ලෙසයි.
පෙබරවාරි 10 වැනිදා පොලීසිය විසින් වෑන් රථයට සිදු කළ වෙඩ් තැබීමකින් වෑන් රථයේ ගමන් ගත් අවුරුදු 19 ක තරුණයකු තුවාල ලබා රෝහලට ඇතුලත් කිරීමෙන් පසු මිය ගිය බව පොලිස් මාධ්‍ය කොට්ඨාසය පෙබරවාරි 11 වැනිදා පැය 0400 ට නිකුත් කළ මාධ්‍ය නිවේදනයක සදහන් වේ.
"2026.02.10 වන දින අළුයම් කාලයේ කයිට්ස් පොලිස් වසමේ අල්ලපිඩ්ඩි හන්දිය ආසන්නයේ දී සැකකටයුතු වෑන් රථයක් නැවැත්වීම සදහා පොලීසිය විසින් සංඥා කළ අවස්ථාවේදී එම වෑන් රථය නොනවත්වා ධාවනය කිරීම හේතුවෙන් පොලීසිය වෑන් රථයට සිදු කළ වෙඩ් තැබීමෙන් වෑන් රථයේ ගමන් ගත් වයස අවුරුදු 19 ක තරුණයකු තුවාල ලබා යාපනය රෝහලට ඇතුලත් කිරීමෙන් පසු මිය යන ලදි."
මිය ගිය සැකකරු මත් ද්‍රව්‍ය භාවිතා කර ඇති බවට රජයේ වෛද්‍ය නිලධාරියා විසින් දන්වා ඇති බවටත් පොලිස් මාධ්‍ය කොට්ඨාසය පෙබරවාරි 11 වැනිදා පැය 0400 ට නිකුත් කළ මාධ්‍ය නිවේදනයයේ සදහන්ව තිබුනි. මියගිය දරුවාගේ නමවත් පොලිස් නිවේදනයේ නැත.
එහෙත් වෙඩි පහරින් ඝාතනය වු දරුවාගේ සිරුරේ කිසිදු මත්ද්‍රව්‍යයක් තිබු බවක් මරණ පරීක්ෂණ වාර්තාවේ නොතිබීමෙන්, ‘මියගිය සැකකරු වෛද්‍ය පරීක්ෂණයකට ලක් කිරීමේදී ඔහු අයිස් සහ හෙරොයින් භාවිතා කර ඇති බවට රජයේ වෛද්‍ය නිලධාරියා විසින් දන්වා ඇත,” යි පොලිස් මාධ්‍ය කොට්ඨාසය විසින් පෙබරවාරි 11 වැනිදා කරන ලද නිවේදනය අභියෝගයට ලක්ව තිබේ.
විශේෂඥ අධිකරණ වෛද්‍ය නිලධාරි රුද්‍රපසුපති මයෝරදන් විසින් මහේස්ත්‍රාත් MNN හුසේන් වෙත පෙබරවාරි 10 දා යවන ලද මරණ පරීක්ෂණ වාර්තාවේ දැක්වෙන්නේ පොලිස් වෙඩිල්ලෙන් මරුමුවට පත් 17 හැවිරිදි ඇල්පිනෝ අරුල් ෆයාස් ගේ මරණයට හේතුව “රයිෆල් ගිනි අවියකින් පිටවූ උණ්ඩයකින් මෂ්තිෂ්කය විදාරණය වීම” බවයි.
ඔහු සමග ඒ මොහොතේ වෑන් රථයේ ගමන් ගත් අනෙක් දෙදෙනා අධිකරණයට ඉදිරිපත් කිරීමෙන් පසු එක් අයෙකුට රුපියල් විසි පන් දහස බැගින් වන ඇප මත මුදා හැරීමට කයිට්ස් මහේස්ත්‍රාත් අධිකරණය 2026 පෙබරවාරි 12 වැනි බදාදා නියෝග කර තිබුනි.
පළාත් බද වාර්තාකරුවන් පවසන්නේ අරුල් ෆයාස්ගේ ඝාතනයට යුක්තිය ඉල්ලා ඔහුගේ පවුලේ ඥාතීන් විරෝධතා දියත් කළ හැකි ස්ථාන සදහන් කරමින් එම විරෝධතා මහජනතාවගේ සාමාන්‍ය ජීවිතයට බාධා වන බැවින් ඒවා තහනම් කරන ලෙස පොලීසිය අධිකරණයෙන් තහනම් නියෝගයක් ද ඉල්ලා තිබු බවයි.
මහජනතාවට ප්‍රජාතන්ත්‍රවාදී ලෙස තම අදහස් ඉදිරිපත් කිරීමට ඇති අයිතිය පිළිගත් අධිකරණය යාපනය පොලිස් කොට්ඨාශය තුළ පිහිටි යාපනය ශික්ෂණ රෝහල් ඉදිරිපස මාර්ගය, බස් නැවතුම්පොළ සහ පලාලි මාර්ගය වසා දැමීමෙන් තොරව විරෝධතා දැක්වීමට අවසරය ලබා දී තිබුනි.
පොලිස් වෙඩි පහරින් ඝාතනය වු 17 හැවිරිදි සිත්තන්කේනියේ අරුල් ෆයාස් දරුවාගේ නිසල දේහය ඔහුගේ මව ඇතුළු ඥාතීන් විසින් පෙබරවාරි 12 වැනිදා නවාලි හින්දු සුසාන භූමියට ගෙනයන ලද්දේ යුක්තිය ඉල්ලන සටන් පාඨ වැලපුම් අතරින් හඬ නගමිනි.
"අම්මාගේ කදුළු වලට යුක්තිය ඕන " යනුවෙන් සදහන් බැනරයක්ද එහිදී දැක ගත හැකි අතර අත්අඩංගුවට ගන්න - අත්අඩංගුවට ගන්න- පොලීසිය අත්අඩංගුවට ගන්න, අපිට යුක්තිය අවශ්‍යයි, අපේ දරුවා නරක දරුවෙක් නෙමෙයි” ආදී සටන් පාඨ කියනු ඇසිනි.
එදින පැවැත්වු මාධ්‍ය හමුවකදී ද පොලිස් ප්‍රකාශක සහකාර පොලිස් අධිකාරී FUK වුට්ලර් රජයේම නිල ලේඛනවලින් සහතික වන අරුල් ෆයාස්ගේ වයස නොතකමින් නැවතත් තහවුරු කරන්නට වීරිය දැරුවේ තිබුනේ පොලීසිය සිදු කළ වෙඩ් තැබීමෙන් මියගියේ වයස අවුරුදු 19 ක තරුණයකු බවයි.
