පොදුරාජ්‍ය මණ්ඩලීය ව්‍යවසාය හා ආයෝජන කවුන්සිලයේ සභාපති ඕඩ්ස්ටොක් හි මාර්ලන්ඩ් සාමිවරයා සමඟ කොළඹදී පැවති විශේෂ සාකච්ඡාවකදී ජනාධිපතිවරයා මේ බව ප්‍රකාශ කළේය.
මෙම හමුවේදී ප්‍රධාන වශයෙන් අවධානය යොමු වූයේ කොළඹ වරාය නගරය (Port City), ලන්ඩන් මූල්‍ය කේන්ද්‍රස්ථානයට (City of London Corporation) සමාන ජාත්‍යන්තර මූල්‍ය මධ්‍යස්ථානයක් බවට පරිවර්තනය කිරීම පිළිබඳවයි. එමඟින් දකුණු ආසියාව සහ පොදුරාජ්‍ය මණ්ඩලය යා කරන ප්‍රධාන ආර්ථික ද්වාරය ලෙස ශ්‍රී ලංකාව ස්ථානගත කිරීම රජය බලපොරොත්තු වන බවයි..
පෞද්ගලික ප්‍රාග්ධන ගලා ඒම වේගවත් කිරීම සඳහා පුරෝකථනය කළ හැකි නියාමනයන්, විශ්වසනීය ආරවුල් විසඳීමේ යාන්ත්‍රණයන් සහ විනිවිදභාවය අත්‍යවශ්‍ය බව ජනාධිපතිවරයා මෙහිදී පෙන්වා දුන්නේය. හුදු යටිතල පහසුකම් සංවර්ධනයෙන් ඔබ්බට ගොස් ගෝලීය වෙළෙඳපොළ සමඟ බාධාවකින් තොරව ඒකාබද්ධ විය හැකි ව්‍යුහාත්මක රාජ්‍ය-පෞද්ගලික හවුල්කාරිත්වයක (PPP) අවශ්‍යතාව ද ඔහු අවධාරණය කළේය.
ගෝලීය වෙළෙඳ අස්ථාවරත්වයට පිළියමක් ලෙස සංචාරක, තොරතුරු තාක්ෂණ, කෘෂිකර්ම සහ ඇඟලුම් වැනි ක්ෂේත්‍ර පොදුරාජ්‍ය මණ්ඩලීය සැපයුම් දාමයන් සමඟ සම්බන්ධ කරමින් ආර්ථිකය විවිධාංගීකරණය කිරීම කෙරෙහි ද මෙහිදී අවධානය යොමු විය.
දේශගුණික විපර්යාස හමුවේ ආර්ථිකය ආරක්ෂා කර ගැනීම පිළිබඳව අදහස් දැක්වූ මාර්ලන්ඩ් සාමිවරයා, අඩු කාබන් යටිතල පහසුකම් සඳහා පෞද්ගලික ප්‍රාග්ධනය යොදවා ගැනීමේ වැදගත්කම පෙන්වා දුන්නේය. විශේෂයෙන්ම 'ඩිට්වා' සුළි කුණාටුවෙන් සිදු වූ විනාශය සිහිපත් කරමින් ඔහු කියා සිටියේ දේශගුණික හිතකාමී සංවර්ධනය යනු තවදුරටත් තේරීමක් නොව ආර්ථිකමය වශයෙන් අත්‍යවශ්‍ය කරුණක් බවයි.
මෙම සාකච්ඡාව හරහා ශ්‍රී ලංකාව සිය ආර්ථික ප්‍රතිරූපය ජාත්‍යන්තරය හමුවේ නැවත අර්ථකථනය කිරීමට ගත් උත්සාහය කැපී පෙනෙන අතර, එය ඉදිරි විදේශ සෘජු ආයෝජන කෙරෙහි තීරණාත්මක බලපෑමක් එල්ල කරනු ඇතැයි අපේක්ෂා කෙරේ.
