සිය ගැටලු සම්බන්ධයෙන් අවස්ථා ගණනාවක දී බලධාරීන් දැනුවත් කළ ද ඊට නිශ්චිත විසඳුම් ලබාදීමට මෙතෙක් කටයුතු කර නොමැති බව ද රේගු වෘත්තීය සමිති සන්ධානය සඳහන් කර ඇත.
එම නිසා අද (24) දිනයේ සිට දිවයින පුරා සියලු රේගු කාර්යාලවල කළුපිටි පැලඳ රාජකාරී කටයුතුවල නිරත වීමට රේගු නිලධාරීන් තීරණය කර තිබේ.
කෙසේවෙතත් මෙම ගැටලුව සම්බන්ධයෙන් ලබන 26 වන දින මුදල් අමාත්‍යංශය, රාජ්‍ය සේවා කොමිශන් සභාව ඇතුළු පාර්ශව කිහිපයක් සමග විශේෂ සාකච්ඡාවක් පැවැත්වීමට ද නියමිත බව වාර්තා වේ.
එම සාකච්ඡාවෙන් ලැබෙන ප්‍රතිඵල අනුව ලබන සිකුරාදා දිනයේ රේගු වෘත්තීය සමිති සන්ධානයේ නියෝජිතයින් රැස්වී සිය වෘත්තීය සමිති ක්‍රියාමාර්ගය පිළිබඳ ඉදිරි තීන්දු තීරණ ගැනීමට නියමිතව ඇත.
සිය වගකීම් පැහැර හරින ලද බලධාරීන් විසින් සම්පූර්ණ වගකීම භාරගත යුතුයි !
නිවේදනයක් නිකුත් කරමින් එම සන්ධානය පවසන්නේ, වසර 6ක් පුරා අසාධාරණව අහිමි කළ අයිතිවාසිකම් ආරක්ෂා කරගැනීමට අවශ්‍ය සියලුම වෘත්තීය ක්‍රියාමාර්ග ගැනීමට සුදානම් බවය.
මෙම වෘත්තීය ක්‍රියාමාර්ගය හේතුවෙන් ජාතික ආර්ථිකයට, ව්‍යාපාරික ප්‍රජාවට හා මහජනතාවට ඇති විය හැකි බලපෑම් සම්බන්ධයෙන් සම්පූර්ණ වගකීම සිය වගකීම් පැහැර හරින ලද බලධාරීන් විසින් භාරගත යුතු බවද අදාළ නිවේදනයේ සඳහන් වේ.
ඒ සම්බන්ධයෙන් වෘත්තීය සමිති සන්ධානය මාධ්‍ය වෙත යොමුකර ඇති නිවේදනය මතු පළවේ.
