වර්ණකුලසූරිය අජිත් රුක්මන් ප්‍රනාන්දු ඒ බව කියා සිටියේ, ල්වීව් නුවර රැඳවුම් කඳවුරේ සිට Sandeshaya by Saroj යූටියුබ් නාලිකාවේ සමග විශේෂ සාකච්ඡාවකට එක්වෙමින්.
වසර දෙකකට ආසන්න කාලයක් සිරගතව වෙසෙන ඔහු පවසන්නේ, යළි රුසියාවට ගොස් පුරවැසිභාවය ලබාගෙන සුදුසු රැකියාවක් කරමින් ජීවත්වීමට බලාපොරොත්තු වන බව.
තමන් ඇතුළු ශ්‍රී ලාංකිකයින් අට දෙනෙකු දැනට යුක්‍රේන අත් අඩංගුවේ පසුවන අතර, ඒ සියලු දෙනාම එම කඳවුරේ සිටින බවත් ඔහු කියා සිටියා.
මේ සාකච්ඡාවට පහසුකම් සලසනු ලැබුවේ යුද සිරකරුවන්ගේ ආරක්ෂාව සම්බන්ධයෙන් කටයුතු කරන, යුක්‍රේන ආරක්ෂක අමාත්‍යාංශයට අනුබද්ධ Coordination Headquarters for the Treatment of Prisoners of War (CHTPoW) සංවිධානය විසින්. සාකාච්ඡාව ඉංග්‍රීසි භාෂාවෙන් පැවැත්විය යුතු බවට ඔවුන් ඉල්ලීමක් කළා.
විවිධ රටවල් නියොජනය කරන යුද සිරකරුවන් 100 දෙනෙකු පමණ තම කඳවුරේ සිටින අතර, ඇතැම් රටවල අමාත්‍යවරු සහ නිළධාරීන් සිරකරුවන් පිළිබඳව සොයා බැලීමට සිය කඳවුරට පැමිණි බවත් වර්ණකුලසූරිය අජිත් ප්‍රනාන්දු කියා සිටියා. කෙසේ වුවත් ශ්‍රී ලාංකික සිරකරුවන් පිළිබඳව සොයා බැලීමට කිසිවෙකුත් පැමිණ නැහැ.
යුක්‍රේන ආරක්ෂක අමාත්‍යාංශයේ දත්ත අනුව, රුසියානු හමුදාවට බැඳුණ ශ්‍රී ලාංකිකයින් 275 දෙනෙකුවත් යුද බිමේදී මියගොස් ඇති බව, Himal Southasian වෙබ් අඩවිය වෙනුවෙන් වාර්තාවක් සකස් කරමින් මම පසුගිය සතියේ විශේෂ හෙළිදරවුවක් කළා. එය, ගවේෂණාත්මක මාධ්‍යවේදීන් සම්බන්ධයෙන් කටයුතු කරන OCCRP ආයතනයේ අනුග්‍රහයෙන් (Fellowship) පවත්වන පුළුල් ගවේෂණයක එක් පියවරක්. යුක්‍රේන ආණ්ඩුව පවසන ආකාරයට, රුසියානු හමුදාවට බැඳුන විදේශිකයින් 3390ක් මේ වනවිට මියගොස් තිබෙනවා.
ල්වීව් (Lviv) සිර කඳවුරේ සිටින ශ්‍රී ලාංකිකයෙකු සමග සිංහල භාෂාවෙන් ලඟදීම තවත් සාකාච්ඡාවක් ඔබ වෙත ගෙන එන්නත් සංදේශය බලාපොරොත්තු වෙනවා.
(සටහන | සරෝජ් පතිරණ )
බීබීසී හිටපු ජ්‍යෙෂ්ඨ සම්පාදක
sarojpathi@gmail.com
(Saroj Pathirana ෆේස්බුක් පිටුවෙන්...)
2026 මාර්තු 10
