ඒ අනුව, අලුත් ආණ්ඩුක්‍රම ව්‍යවස්ථාවක් ඉදිරිපත් නොකරනු ඇති අතර, පවතින ආණ්ඩුක්‍රම ව්‍යවස්ථාව අනුවම මීළඟ ජනාධිපතිවරණයද පැවැත්වෙනු ඇත.
විධායක ජනාධිපති ක්‍රමය අහෝසි කිරීමට හෝ එය අරමුණු කරගත් අලුත් ආණ්ඩුක්‍රම ව්‍යවස්ථාවක් හඳුන්වා දිමට හෝ කිසිම වැඩපිළිවෙළක් හෝ සුදානමක් ආණ්ඩුවට නොමැති බවත්, ඉදිරි ජනාධිපතිවරණය පවත්වා ඊට ජාජබ අපේක්ෂකයා වශයෙන් අනුර කුමාර දිසානායක ඉදිරිපත් කර ජයග්‍රහණය කළ යුතු බවට ජාතික ජන බලවේයයේ හා ජනතා විමුක්ති පෙරමුණේ පොදු එකඟතාව බවත් එම අභ්‍යන්තර ආරංචි මාර්ග කියයි.
මේ පිළිබඳව 'අනිද්දා' සමඟ අදහස් දක්වු ජාතික ජන බලවේගයේ ජාතික විධායක සහිකයකු කිවේ, අනුර කුමාර දිසානායක ජනාධිපතිධූරයට පත්වූ දා සිට මේ වන තෙක්ම කිසිම අවස්ථාවක විධායක ජනාධිපතිධුරය අහෝසි කිරීම ගැන සාකච්ඡාවක් බලවේගය තුළ සිදු නොවුණු බවයි.
''ඉදිරි කාලයේ කොහොමටවත් අලුත් ව්‍යවස්ථාවක් ගෙනැවිත් සම්මත කරගන්න බෑ'' ඔහු කිවේය.
විපක්ෂයේ පක්ෂවලින් ශක්තිමත් අපේක්ෂකයකු ඉදිරිපත් නොවන බව පැහැදිලිව පෙනෙන බැවින් හා ජනාධිපතිවරයා තවමත් ජනප්‍රියත්වයෙන් ඉහළින් සිටින බැවින්, විධායක ජනාධිපති ක්‍රමය අහෝසි කිරීමට පියවර නොගත යු බවත් එම ධුරයේ තිබෙන බලය තවදුරටත් ජාජය විසින් පාවිච්චි කරනු ලැබිය යුතු බවත්, එම පක්ෂ දෙකේ මතය වී තිබේ.
2024 සැප්තැම්බරයේ පැවැති ජනාධිපතිවරණයට, පොහොසත් රටක් ලස්සන ජීවිතයක් නමින් ජාතික ජන බලවේගය ඉදිරිපත් කළ ප්‍රතිපත්ති ප්‍රකාශනයේ 194 වැනි පිටුවේ පැහැදිලිව සඳහන් කර තිබුණේ, විධායක ජනාධිපති ක්‍රමය අහෝසි කරන නව ආණ්ඩුක්‍රම ව්‍යවස්ථාවක් ගෙනෙන බවයි.
''නව ආණ්ඩු ක්‍රම ව්‍යවස්ථාවක් කෙටුම්පත් කරනු ලබන අතර එය මහජනතාව වෙත ඉදිරිපත් කර සංවාදයකින් අනතුරුව අවශ්‍ය වෙනස්කම් සිදුකොට ජනමත විචාරණයක්ද සමග සම්මත කර ගනු ඇත'' යනුවෙන් එහි සඳහන් වෙයි.
තවදුරටත් එහි සඳහන් වන්නේ, විධායක ජනාධිපති ආණ්ඩුක්‍රමය අහෝසි කොට පාර්ලිමේන්තු ආණ්ඩු ක්‍රමයක් ස්ථාපිත කිරීම හා විධායක බලතල රහිත ජනාධිපතිවරයෙන් පත්කිරීම එම ආණ්ඩුක්‍රම ව්‍යවස්ථාවෙන් කරනු ඇති බවයි.
එම ප්‍රතිපත්ති ප්‍රකාශනයේ 230 වැනි පිටුවේ සඳහන් වන්නේ, '2015-2019 කාලය තුළ නව ආණ්ඩුක්‍රම ව්‍යවස්ථාවක් සම්පාදනය කිරීමට අනුගමනය කළ ක්‍රියාදාමය කඩිනමින් අවසන් කොට නව ආණ්ඩුක්‍රම ව්‍යවස්ථාවක් සම්පාදනය කරන බවයි.
( සටහන | නීතිඥ කේ.ඩබ්ලිව්. ජනරංජන)
'අනිද්දා' පුවත්පතේ කර්තෘ
උපුටා ගැනීම - 'අනිද්දා' ජාතික පුවත්පතින්...
