අදාළ ආයතන විකිණීමට ගනු ලැබූ කැබිනට් තීරණය අභියෝගයට ලක් කරමින් දොස්තර ගුණදාස අමරසේකර ඇතුළු පිරිසක් ගොනු කළ මූලික අයිතිවාසිකම් පෙත්සමක් කැඳවූ අවස්ථාවේදී නීතිපතිවරයා වෙනුවෙන් පෙනී සිටි රජයේ නීතිඥවරිය මේ බව දන්වා සිටියාය.
අචල වෙන්ගප්පුලි, මහින්ද සමයවර්ධන සහ සම්පත් අබයකොන් යන ශ්‍රේෂ්ඨාධිකරණ විනිසුරු මඩුල්ලක් හමුවේ මෙම පෙත්සම කැඳවන ලදී.
එහිදී රජයේ නීතිඥවරිය අධිකරණයට දැනුම් දී සිටියේ මෙම ආයතන විකිණීමට අදාළව පසුගිය රජය විසින් ගෙන ඇති තීරණ ක්‍රියාත්මක නොකිරීමට වත්මන් රජය තීරණය කර ඇති බවය.
එහෙත්, මෙම සමාගම් ප්‍රතිසංස්කරණය කිරීම සඳහා පමණක් කමිටුවක් පත් කර ඇති බවත් ඇය සදහන් කර සිටියාය .
ඒ අනුව අදාළ කැබිනට් තීරණය ක්‍රියාත්මක නොකිරීමට රජය තීරණය කර ඇති බැවින් මෙම පෙත්සම් තවදුරටත් පවත්වාගෙන යාමට අදහස් නොකරන බව පෙත්සම්කාර පාර්ශ්වය වෙනුවෙන් පෙනී සිටියේ නීතිඥ කනිෂ්ක විතාරණ අධිකරණයට දන්වා සිටියේය.
ඒ අනුව අදාල පෙත්සම් විභාගය අවසන් කිරීමට ශ්‍රේෂ්ඨාධිකරණය තීරණය කළේය.
දේශහිතෛෂී ජාතික ව්‍යාපාරයේ සභාපති වෛද්‍ය ගුණදාස අමරසේකර සහ එහි ලේකම් වෛද්‍ය වසන්ත බණ්ඩාර ඇතුළු පිරිසක් මෙහි පෙත්සම් කරුවෝ වෙති.
මුදල් ඇමැති වරයා ලෙස ජනාධිපතිවරය රනිල් වික්‍රමසිංහ ඇතුළු කැබිනට් මණ්ඩල සාමාජිකයින්, නීතිපතිවරයා ඇතුළු 23 දෙනෙකු මෙහි වගඋත්තර කරුවෝ වෙති.
රාජ්‍ය ආයතන ඇතුළු රාජ්‍ය ආයතන ගණනාවක කොටස් විකිණීමේ සූදානමක් ඇති අතර ඒ සඳහා කැබිනට් තීරණ ද ඉකුත් රජය සමයේ ගෙන ඇති බව පෙත්සමෙහි සදහන් විය.
එසේම රාජ්‍ය ආයතන විකිණීම සඳහා පාර්ලිමේන්තුවේ අනුමැතිය ලබාදී නැති බව එහි සදහන් වේ.
එබැවින් එකී තීරණය සම්පූර්ණයෙන්ම නීතියට පටහැනි අතර බලධාරීන් සිය බලය ඉක්මවා කටයුතු කිරීමක් බව බව පෙත්සම් කරුවෝ පෙන්වා දෙති.
එසේම එමගිනි මෙරට ජනතාවගේ මූලික අයිතිවාසිකම් උල්ලංඝනය වීමක් සිදුවන බවට ප්‍රකාශ කරන ලෙස පෙත්සම් මගින් ඉල්ලා ඇත.
එසේම අදාළ කැබිනට් තීරණ බල රහිත කරන නියෝගයක් නිකුත් කරන ලෙස පෙත්සම් කරුවෝ අධිකරණයෙන් ඉල්ලා සිටියහ.
| නෙල්කා මැදගෙදර
Nelka Medagedara
'ද ලීඩර්' අධිකරණ වාර්තාකාරිනී
nelindum41@gmail.com
