ඇමෙරිකානු මොන්ටානා ආණ්ඩුකාරවරයා කොළඹට: පරිප්පු වෙළඳපොළට සහ ආරක්ෂාවට නව මාවතක්

ඇමෙරිකා එක්සත් ජනපදයේ මොන්ටානා ප්‍රාන්ත ආණ්ඩුකාර ග්‍රෙග් ජියැන්ෆෝර්ටේ (Greg Gianforte)  ඇතුළු රාජ්‍ය තාන්ත්‍රික දූත පිරිසක් ඔක්තෝබර් 9 වනදා ශ්‍රී ලංකාවේ නිල සංචාරයක නිරත වන බව කොළඹ පිහිටි අමෙරිකානු තානාපති කාර්යාලය නිල වශයෙන් නිවේදනය කළේය.

ආණ්ඩුකාරවරයා සමඟ ඔහුගේ බිරිඳ වන සුසෑන් ජියැන්ෆෝර්ටේ සහ මොන්ටානා ජාතික ආරක්ෂක බළකායේ ප්‍රධානී බ්‍රිගේඩියර් ජනරාල් ට්‍රෙන්ටන් ගිබ්සන් ඇතුළු නියෝජිත කණ්ඩායමක් මෙම ගමනට එක්ව සිටිති.

පරිප්පු වෙළඳපොළට ඇමෙරිකාවෙන් තරගයක්

ශ්‍රී ලාංකිකයින්ගේ දෛනික ආහාර වේලට නැතුවම බැරි පරිප්පු, කඩල සහ අනෙකුත් වියළි ඇට වර්ග (Pulses) නිෂ්පාදනයෙන් අමෙරිකාවේ පළමු තැන හිමිවන්නේ මොන්ටානා ප්‍රාන්තයටයි.

කොළඹ සංචාරය අතරතුර මෙරට ප්‍රමුඛ පෙළේ ධාන්‍ය ආනයනකරුවන් සහ තොග වෙළෙඳුන් හමුවීමට නියෝජිත පිරිස සූදානම් වේ. මේ වන විට ඔස්ට්‍රේලියාව, කැනඩාව සහ ඉන්දියාව වැනි රටවලින් වැඩි වශයෙන් ආනයනය කෙරෙන පරිප්පු සඳහා විකල්ප සැපයුම්කරුවෙකු ලෙස මොන්ටානා ප්‍රාන්තය මෙරට වෙළඳපොළට පිවිසීමට අපේක්ෂා කරයි.

වෙළෙඳපොළට නව සැපයුම්කරුවන් එක්වීම හරහා තරගකාරීත්වයක් ඇතිවීමෙන් සාමාන්‍ය පාරිභෝගිකයාට සහනදායී මිලකට ධාන්‍ය ලබාගැනීමේ අවස්ථාව උදාවිය හැකි බව ආර්ථික විශ්ලේෂකයෝ පෙන්වා දෙති.

ඉන්දීය සාගරයේ ආරක්ෂාව සහ ආපදා පෙරසූදානම

මෙම සංචාරය කෘෂිකාර්මික වෙළඳාමට පමණක් සීමා වූවක් නොවේ. 2021 වසරේ සිට ක්‍රියාත්මක වන ප්‍රාන්ත හවුල්කාරිත්ව වැඩසටහන (State Partnership Program) හරහා ශ්‍රී ලංකාව සහ මොන්ටානා ජාතික ආරක්ෂක බළකාය අතර ආරක්ෂක සහයෝගීතාවක් ගොඩනැගී ඇත.

විශේෂයෙන්ම:
* ස්වභාවික ආපදාවලදී හදිසි මුදාගැනීම් සහ සහන සේවා සම්බන්ධීකරණය
* ඉන්දීය සාගර කලාපීය සමුද්‍රීය නිරීක්ෂණ කටයුතු (Maritime Domain Awareness)
* හමුදා නිලධාරීන්ට නවීන වෘත්තීය සහ තාක්ෂණික පුහුණුව ලබාදීම
යන ක්ෂේත්‍ර ඔස්සේ ශ්‍රී ලංකා ආරක්ෂක අංශ සමඟ පවතින සබඳතා තවදුරටත් පුළුල් කිරීමට අපේක්ෂිතය.


ව්‍යවසායකත්වයෙන් දේශපාලනයට ආ නායකයෙක්

මොන්ටානා ආණ්ඩුකාර ග්‍රෙග් ජියැන්ෆෝර්ටේ සහ බිරිඳ සුසෑන් ජියැන්ෆෝර්ටේ

ග්‍රෙග් ජියැන්ෆෝර්ටේ යනු දශක තුනකට වැඩි කාලයක් සාර්ථක මෘදුකාංග ව්‍යවසායකයෙකු ලෙස පෞද්ගලික අංශයේ රැකියා දහස් ගණනක් බිහිකළ නායකයෙකි. 1997 දී ආරම්භ කළ RightNow Technologies සමාගම සාර්ථක කරගැනීමෙන් අනතුරුව දේශපාලනයට පිවිසි ඔහු, 2020 දී මොන්ටානාහි 25 වැනි ආණ්ඩුකාරවරයා ලෙස තේරී පත්විය. අනතුරුව 2024 නොවැම්බර් මැතිවරණයෙන්ද ජයගත් හෙතෙම වසර 28කට පසු දෙවන වරටත් එම ධුරයට පත් පළමු රිපබ්ලිකන් පාක්ෂිකයා වේ.

කලාපීය ආරක්ෂාව තහවුරු කරගන්නා අතරම, අත්‍යවශ්‍ය ආහාර සැපයුම් දාමයන් විවිධාංගීකරණය කරගැනීමට මෙවැනි රාජ්‍ය තාන්ත්‍රික හා වාණිජ සබඳතා ශ්‍රී ලංකාවට වැදගත් මාවතක් නිර්මාණය කරන බව දේශපාලන විචාරකයින්ගේ අදහසයි.