ඥානසාර හිමියන්ගේ සිවුර ගැන ජනතාවාදී ඒකාබද්ධ විපක්ෂයෙන් රතු එළියක්

අධිකරණ නියෝගයකින් බන්ධනාගාරගත කර සිටින පූජ්‍ය ගලගොඩඅත්තේ ඥානසාර හිමියන් ගිහි ඇඳුමින් අධිකරණයට ඉදිරිපත් කිරීමට බන්ධනාගාර දෙපාර්තමේන්තුව ගත් තීරණය දැඩි ලෙස විවේචනය කරමින් ජනතාවාදී ඒකාබද්ධ විපක්ෂය විශේෂ නිවේදනයක් නිකුත් කර තිබේ.

එම සන්ධානයේ කැඳවුම්කරු මහාචාර්ය ජී. එල්. පීරිස් ගේ අත්සනින් අද (08) නිකුත් කළ නිවේදනයෙන් අවධාරණය කෙරෙන්නේ, භික්ෂූන් වහන්සේලා සම්බන්ධයෙන් කටයුතු කිරීමේදී බුද්ධ ශාසනයේ ස්ථාපිත විනය නීති සහ සම්ප්‍රදායන්ට බන්ධනාගාර පාලකයින් ද ගරු කළ යුතු බවයි.

විනය පිටකය සහ ආණ්ඩුක්‍රම ව්‍යවස්ථාව

විනය පිටකයට අනුව භික්ෂුවකගේ සිවුර ඉවත් කිරීමේ බලය හිමිවන්නේ උන්වහන්සේ උපසම්පදාව ලැබූ අදාළ නිකායේ සංඝ සභාවට පමණක් බව ජනතාවාදී ඒකාබද්ධ විපක්ෂය පෙන්වා දෙයි. ඉන් පරිබාහිර කිසිදු පාර්ශ්වයකට හෝ රාජ්‍ය ආයතනයකට එවැනි හිමිකමක් නොමැති බව එම නිවේදනයේ සඳහන් වේ.

එමෙන්ම, ශ්‍රී ලංකා ආණ්ඩුක්‍රම ව්‍යවස්ථාවේ 9 වැනි වගන්තිය ප්‍රකාරව බුද්ධාගමට ප්‍රමුඛස්ථානය හිමිවන බව සිහිපත් කර ඇති ජනතාවාදී ඒකාබද්ධ විපක්ෂය, බුද්ධ ශාසනය හා බැඳුණු සාම්ප්‍රදායික පිළිවෙත් නොතකා අත්තනෝමතික ලෙස ක්‍රියාකිරීම වහා නැවැත්විය යුතු බව ද පවසයි.

"දුරදිග නොබලා ගත් තීරණයක්"

ඥානසාර හිමියන්ට සිරකරු හෝ ගිහි ඇඳුම් ඇන්දවීම බුද්ධ ධර්මයට කළ අපහාසයක් ලෙස හඳුන්වන ජනතාවාදී ඒකාබද්ධ විපක්ෂය, මෙම සිදුවීම මුල්කරගෙන මේ වන විට සමාජයේ හා ශාසනික ක්ෂේත්‍රයේ දැඩි විරෝධයක් මතුව ඇත්තේ නිලධාරීන් දුරදිග නොබලා ගත් හිතුවක්කාරී තීරණ නිසා බවට චෝදනා කරයි.

භික්ෂු විනය සම්බන්ධයෙන් තීන්දු තීරණ ගැනීමේ සම්පූර්ණ අයිතිය ත්‍රෛනිකායික මහානායක මාහිමිපාණන් වහන්සේලා සතුවන අතර, එම ශාසනික අයිතියට රාජ්‍ය පරිපාලනය මැදිහත් නොවිය යුතු බවට වූ ස්ථාවරයෙහි තමන් රැඳී සිටින බව ජනතාවාදී ඒකාබද්ධ විපක්ෂය සිය නිවේදනය මඟින් වැඩිදුරටත් අවධාරණය කර ඇත.