එකම පවුලේ අවුරුදු 3ක සහ 5ක කුඩා දරුවන් දෙදෙනෙකු අවාසනාවන්ත ලෙස ජීවිතක්ෂයට පත්වීමේ ශෝකජනක පුවතක් වාර්තා වේ.
මෙලෙස මියගොස් ඇත්තේ අවුරුදු 3ක් වයසැති පිරිමි දරුවෙකු සහ අවුරුදු 5ක් වයසැති ගැහැණු දරුවෙකි.
මොවුන් බදුල්ල ප්‍රදේශයේ පදිංචිකරුවන් වන අතර, පිළිකා රෝගී තත්ත්වයක් හේතුවෙන් මඩකලපුව (කාත්තන්කුඩි) ප්‍රදේශයේ රෝහලක නේවාසිකව ප්‍රතිකාර ලබමින් සිටින තම මව බැලීම සඳහා පියා සමඟ පැමිණි අවස්ථාවේදී මෙම හෝටල් කාමරයේ තාවකාලිකව නැවතී සිට ඇත.
සිද්ධිය වූ අවස්ථාවේදී පියා විසින් දරුවන් දෙදෙනා කාමරය තුළ රඳවා, එහි දොර පිටතින් අගුළු දමා සුළු වේලාවකට පිටතට ගොස් ඇති බව මූලික පරීක්ෂණවලදී හෙළි වී තිබේ.
එහිදී දරුවන් සන්තකයේ තිබූ ලයිටරයක් ඇඳකට ඇවිලීමෙන් හෝ වෙනත් හේතුවක් මත කාමරයේ තිබූ මෙට්ටයක් ගිනිබත් වී ඇති අතර, ඉන් දැඩි දුමාරයක් හටගෙන ඇත. ගින්නෙන් බියට පත් වූ කුඩා දරුවන් දෙදෙනා බේරීම සඳහා අනෙක් ඇඳ යටට රිංගා සැඟවී සිට ඇති බව සැක කෙරේ.
කාමරයෙන් අධික ලෙස දුම් පිටවන බව නිරීක්ෂණය වීමත් සමඟ වහා ක්‍රියාත්මක වූ හෝටල් සේවකයින් සහ අවට සිටි පිරිස්, දොර කඩා ඇතුළු වී ගින්න මැඩපවත්වා ඇත. කෙසේ වෙතත්, ඒ වන විටත් කාමරය පුරා පිරී තිබූ විෂ දුමාරය ආශ්වාස කිරීම හේතුවෙන් දරුවන් දෙදෙනා ඇඳ යට සිහිසුන්ව වැතිර සිට ඇත.
වහාම ක්‍රියාත්මක වී දරුවන් දෙදෙනා මඩකලපුව ශික්ෂණ රෝහල වෙත ඇතුළත් කිරීමට පියවර ගත්තද, ඒ වන විටත් ඔවුන් ජීවිතක්ෂයට පත්ව සිටි බව රෝහල් ආරංචි මාර්ග තහවුරු කරයි. මියගිය දරුවන්ගේ සිරුරු මේ වන විට මඩකලපුව රෝහල් මෘත ශරීරාගාරයේ තැන්පත් කර ඇත.
ගින්න හට ගැනීමට නිශ්චිත හේතුව සහ පියා පිටතට යාමට බලපෑ සැබෑ හේතුව මෙතෙක් නිල වශයෙන් අනාවරණය වී නොමැති අතර, මඩකලපුව පොලිස් ස්ථානය සහ අපරාධ ස්ථාන පරීක්ෂණ නිලධාරීන් (SOCO) එක්ව සිද්ධිය සම්බන්ධයෙන් වැඩිදුර විමර්ශන සිදුකරනු ලබයි.
