සංචාරක ආදායම වැඩිකරන්න කෝට්ටේ තෙත්බිම් වලින් අලුත් පියවරක්

සාම්ප්‍රදායික වෙරළ, මුහුද සහ අව් රශ්මිය පමණක් විකුණන සංචාරක රටාවෙන් ඔබ්බට ගොස් ඉහළ ආර්ථික වටිනාකමක් සහිත පරිසර හිතකාමී සංචාරක කර්මාන්තයක් කරා යොමුවීමේ දැඩි අවශ්‍යතාවක් ශ්‍රී ලංකාව හමුවේ මතු වී තිබේ.

මේ මස 9 වැනිදා සිට 12 වැනිදා දක්වා කෝට්ටේ නගරය කේන්ද්‍ර කරගනිමින් පැවැත්වීමට නියමිත "Wellness in Wetlands" ජාත්‍යන්තර සමුළුව මෙරට ස්වභාවික සම්පත් ආරක්ෂා කරමින් වාණිජමය වශයෙන් ඵලදායී සංචාරක නිෂ්පාදන බිහිකිරීම පිළිබඳ වැදගත් ප්‍රවේශයක් විවර කරනු ඇති බව ආර්ථික විශ්ලේෂකයෝ පෙන්වා දෙති.

මෙක්සිකෝව සහ කෙන්යාව ඇතුළු රටවල් 15ක් නියෝජනය කරමින් පරිසර විද්‍යාඥයින්, මනෝවිද්‍යාඥයින් සහ ප්‍රජා නායකයින් ඇතුළු ජාත්‍යන්තර ප්‍රවීණයන් 34 දෙනෙකු මෙම සමුළුවට එක්වීමට නියමිතය.

ඔළුගෙඩි ගණනට වඩා වැදගත් වන්නේ රටට ලැබෙන මුදලයි

සංචාරක කර්මාන්තයේ සැබෑ ප්‍රතිලාභය මනිනු ලබන්නේ මෙරටට ගොඩබසින සංචාරකයින් සංඛ්‍යාව මත පමණක් නොවන බව ක්ෂේත්‍රයේ ප්‍රවීණයන්ගේ අදහසයි. පැමිණෙන සංචාරකයා මෙරට වැඩි දින ගණනක් රැඳී සිටීම, ප්‍රවාහනය, ආහාර පාන, ප්‍රජා මඟපෙන්වන්නන්, දේශීය අත්කම් සහ සුවතා සේවා සඳහා වැඩි මුදලක් වියදම් කිරීම රටේ ආර්ථිකයට ඍජුවම දැනෙන වෙනසක් ඇති කරයි.

හෝටල් කාමර පිරීමෙන් පමණක් සංචාරක කර්මාන්තය සම්පූර්ණ වන්නේ නැත. කෝට්ටේ අවට පිහිටි සුවිශේෂී තෙත්බිම් පද්ධතිය, ජෛව විවිධත්වය, මානසික සුවතාව සහ විනෝදාස්වාදය මුසු වූ සංචාරක අත්දැකීමක් බවට පත්කළ හැකි නම්, එය මෙරටට පැමිණෙන විදේශිකයන්ගේ සාක්කුවෙන් ග්‍රාමීය සහ නාගරික ප්‍රජාව අතරට සෘජුව මුදල් ගලායන මාර්ගයක් වනු ඇත.

හරිත ආර්ථිකයෙන් තාරුණ්‍යයට රැකියා

මෙම තෙත්බිම් සංචාරක සංකල්පය හුදු පරිසර සමුළුවකට සීමා නොවී හරිත ආර්ථික උපායමාර්ගයක් ලෙස ක්‍රියාත්මක කිරීමේ හැකියාව පවතී. ඒ හරහා පරිසර මඟපෙන්වන්නන්, සුවතා සේවා සපයන්නන් සහ පරිසර අධ්‍යාපනඥයින් ලෙස තරුණ පරපුරට ඉහළ ආදායම් ලබන නව වෘත්තීය අවස්ථා නිර්මාණය කරගත හැකිය.

ශ්‍රීලංකන් ගුවන් සේවය, ශ්‍රී ලංකා සංචාරක ප්‍රවර්ධන කාර්යාංශය, වෘත්තීය තෙත්බිම් මඟපෙන්වන්නන්ගේ සංගමය, කෝට්ටේ හරිත සංචාරක ජාලය මෙන්ම පරිසර හා වෙළඳ අමාත්‍යාංශ ද එක්ව ගොඩනගා ඇති ආයතනික එකමුතුව මේ සඳහා ශක්තිමත් පදනමක් සපයයි.

සංරක්ෂණය අමතක කළොත් සියල්ල විනාශයි

කෙසේ වෙතත්, ආකර්ෂණීය සැලසුම් ප්‍රකාශයට පත් කළද නිසි යටිතල පහසුකම්, ප්‍රමිතිගත අලෙවිකරණය සහ නියාමනයක් නොමැති වීම මෙරට සංචාරක ක්ෂේත්‍රයේ නිතර දක්නට ලැබෙන දුර්වලතාවකි.

පාලනයකින් තොරව සිදුවන අනවසර ඉදිකිරීම්, පරිසර දූෂණය සහ පමණ ඉක්මවා වාණිජකරණය වීමෙන් තෙත්බිම් ආරක්ෂා කරගැනීම රජයේ සහ ප්‍රාදේශීය බලධාරීන්ගේ මූලික වගකීමක් වේ. ස්වභාවික සම්පත් විනාශ වුවහොත් විකිණීමට ඉතිරි වන්නේ හිස් වචන පමණක් බව පරිසරවේදීහු අවධාරණය කරති.

2026 වසරේ සංචාරක ඉලක්ක සපුරාගැනීමේදී මූලික මිම්ම විය යුත්තේ රටට එන අමුත්තන්ගේ සංඛ්‍යාව පමණක් නොව, ඔවුන්ගෙන් රටේ ආර්ථිකයට සහ ජනතාවට ලැබෙන සැබෑ ප්‍රතිලාභයේ ප්‍රමාණයයි.


වැඩිදුර කියවීම් සඳහා මූලාශ්‍ර සබැඳි:


ලංකා නිව්ස් | Sri Lanka’s Tourism Target Faces Test Beyond Sun, Sand, and Sea

ශ්‍රී ලංකා සංචාරක සංවර්ධන අධිකාරියේ (SLTDA) නිල සංඛ්‍යාලේඛන හා ප්‍රතිපත්ති වාර්තා: