නීතිඥ-සිරකරු රහස් අහන්න වැලිකඩ ජේලර්ලා මාන බලයි! - බන්ධනාගාර කොන්දේසියට සේනක පෙරේරාගෙන් දැඩි විරෝධයක්

- බන්ධනාගාරයේ 'කන් දීමේ අධීක්ෂණයට' විරෝධය පා නීතිඥ කණ්ඩායම සාකච්ඡාව වර්ජනය කරමින් ආපසු හැරෙයි

වෘත්තීය රහස්‍යභාවය සහ මානව හිමිකම් සහමුලින්ම උල්ලංඡනය වීමක්; වැඩබලන බන්ධනාගාර කොමසාරිස් ජනරාල්වරයාට ලිඛිතවම හදිසි පැමිණිල්ලක්

මීගමුව බන්ධනාගාරයේ සිදු වූ ආන්දෝලනාත්මක සිදුවීමකින් පසු වැලිකඩ බන්ධනාගාරය වෙත මාරු කර යවා සිටින සිරකරුවන් දෙදෙනෙකුට නීතිමය උපදෙස් ලබාදීමේදී, බන්ධනාගාර නිලධාරීන්ට ද ඊට සෘජුව "ඇහුම්කන් දීමට" හැකි වන පරිදි කටයුතු කළ යුතු යැයි වැලිකඩ බන්ධනාගාර බලධාරීන් පැනවූ අත්තනෝමතික කොන්දේසියක් සිරකරු අයිතිවාසිකම් සුරැකීමේ කමිටුවේ සභාපති, නීතිඥ සේනක පෙරේරා ඇතුළු නීතිඥ කණ්ඩායම විසින් සෘජුවම ප්‍රතික්ෂේප කර තිබේ.

නීතිඥවරයෙකු සහ සේවාදායකයෙකු (Client) අතර පවතින වෘත්තීය රහස්‍යභාවය සහ මූලික මානව හිමිකම් සහමුලින්ම උල්ලංඡනය කරමින් බන්ධනාගාර පරිපාලනය ගත් මෙම ක්‍රියාමාර්ගයට විරෝධය පාමින් නීතිඥ කණ්ඩායම අද (ජූලි 13) වැලිකඩ බන්ධනාගාර පරිශ්‍රයෙන් පිටතට පැමිණ ඇත.

බන්ධනාගාරයේ 'කන් දීමේ' අර්බුදය සහ නීතිඥ විරෝධය

නිල වශයෙන් පූර්ව අනුමැතිය ලබාගැනීමෙන් පසුව අදාළ සිරකරුවන් දෙදෙනා හමුවී ඉදිරි නීතිමය පියවර පිළිබඳ සාකච්ඡා කිරීමට නීතිඥ සේනක පෙරේරා ඇතුළු කණ්ඩායම වැලිකඩ බන්ධනාගාරය වෙත ගොස් තිබුණි.

කොටු කළ කුඩා ඉඩකඩ:
බන්ධනාගාර බලධාරීන් නීතිඥවරුන්ට දැනුම් දී ඇත්තේ බන්ධනාගාර නිලධාරීන් ද රැඳී සිටින අතිශය කුඩා ඉඩකඩක් සහිත කුටියක් තුළ සිරකරුවන් සමඟ කතාබස් කරන ලෙසයි.

අධීක්ෂණය සහ ඇහුම්කන් දීම:
එහිදී බන්ධනාගාර නිලධාරීන් තමන් පවසන සියලුම වෘත්තීය රහස්‍ය තොරතුරුවලට අසා සිටින බැවින් එම ස්ථානයේ සාකච්ඡා කළ නොහැකි බව නීතිඥවරුන් පෙන්වා දුන් අතර, බන්ධනාගාර පාර්ශවයේ ස්ථාවරය වූයේ මෙම "ඇහුම්කන් දීම" ද තමන්ගේ ආරක්ෂක අධීක්ෂණයට (Supervision) ඇතුළත් වන බවයි.

නිශ්ශබ්ද අධීක්ෂණයක අවශ්‍යතාව:
ආරක්ෂක හේතූන් මත නීතිඥ-සිරකරු හමුවක් දෑසින් දැක බලා (Visual observation) අධීක්ෂණය කිරීමට බන්ධනාගාරයට අයිතියක් තිබුණද, ඔවුන් පවසන දේට සවන්දීමට (Hearing) කිසිදු නීතිමය ඉඩක් නොමැති බව නීතිඥවරු තර්ක කළහ.

ක්ෂණික නීතිමය පියවර

කොමසාරිස් ජනරාල්ට ලිපියක්:
බන්ධනාගාර නිලධාරීන් සිය ස්ථාවරය වෙනස් නොකිරීම නිසා සාකච්ඡාව සහමුලින්ම නතර කළ නීතිඥ කණ්ඩායම, බන්ධනාගාර නීති රීති උල්ලංඡනය කරමින් සිදුවූ මෙම බාධා කිරීම් සම්බන්ධයෙන් සිය දැඩි විරෝධය වාර්තා කරමින් වැඩබලන බන්ධනාගාර කොමසාරිස් ජනරාල්වරයා වෙත ඒ මොහොතේම ලිඛිත පැමිණිල්ලක් යොමු කිරීමට පියවර ගත්තේය.

මීගමුව බන්ධනාගාර සිදුවීමේ සාක්ෂිකරුවන් හෝ ඊට සම්බන්ධ රැඳවියන් පරිපාලනමය පීඩනයකට ලක්කිරීමේ අරමුණින් මෙම උපක්‍රම භාවිත කරන්නේද යන්න පිළිබඳව ඉදිරියේදී අධිකරණමය මට්ටමින් කරුණු මතු වනු ඇතැයි නීති ක්ෂේත්‍රයේ විචාරකයෝ පෙන්වා දෙති.


(උපුටා ගැනීම | whatnews.lk)