අමිතාබ් බච්චන් අසනීප බව පවසමින් රසිකයන්ගෙන් සමාව අයදියි

අත්අකුරින් පිළිතුරු ලියන්නට බැරි තරම් වේදනාවක්

ලොව පුරා විසිරී සිටින රසික හදවත් ආදරයෙන් වැළඳගත් බොලිවුඩ් මහා සිනමා රූපය, අමිතාබ් බච්චන්, සිය සෞඛ්‍ය තත්ත්වය සහ ශාරීරික දුෂ්කරතා පිළිබඳව දීර්ඝ සටහනක් තබමින් ප්‍රථම වරට නිහඬතාව බිඳ තිබෙනවා.

පසුගිය දීපවාලි උත්සවය වෙනුවෙන් නිවසට ගලා ආ දහස් සංඛ්‍යාත සුබපැතුම් සහ ආදරණීය ත්‍යාග තැන්පත් කිරීමට පවා ඉඩකඩ මදිවන තරම්. ඒ සෑම කෙනෙකුටම සුපුරුදු පරිදි සිය අත්අකුරින්ම පෙරළා ස්තුති ලිපි ලිවීමට ඔහු සැලසුම් කළද, ලියන අතෙහි හටගත් වේදනාව ඊට හරස් වී තිබෙනවා.

සිය අතින් ලැබිය යුතු ලිපි පමාවීම හේතුවෙන් කිසිවෙකුගේ හෝ සිත රිදුණේ නම් ඒ වෙනුවෙන් තමන් දෑත් එක්කොට නිහතමානීව සමාව අයැදින බවයි 84 හැවිරිදි මෙම ප්‍රවීණ රංගන ශිල්පියා පවසන්නේ.

"සමාව ඉල්ලීම වරදක් නෙවෙයි" – බච්චන්ගේ ජීවිත දර්ශනය

මෑතක සිට නිතර නිතර සමාව අයැදීමට සිදුවීම පිළිබඳව සිය නිල බ්ලොග් අඩවිය ඔස්සේ ඔහු ගැඹුරු සමාජීය සහ ආධ්‍යාත්මික කියවීමක යෙදෙනවා.

"තත්ත්වයන් විසින් මාව එවැනි තැනකට ඇද දමන විට සමාව ඉල්ලනවා හැර වෙන කුමක් කරන්නද? යමෙකුගෙන් සමාව අයැදීමේ කිසිදු වරදක් නැහැ. අනෙක් පාර්ශ්වයට එය ප්‍රතික්ෂේප කරන්න හෝ ආදරයෙන් බාරගන්න පුළුවන්. ඔවුන් එය පිළිගතහොත් මගේ සිතට සැනසිල්ලක් දැනේවි. නොපිළිගතහොත් ඔවුන්ගේ සිතේ කැලඹීම ඉතිරි වේවි."

ජීවිතය යනු ගැටලු හෝ වේදනාවන් තදින් අල්ලාගෙන දුක්විඳීම නොව, සමාව තුළින් සැනසිලිදායක සිතක් ළඟා කරගැනීම බව ඔහු සිය පාඨකයන්ට මතක් කර දෙනවා.

වයසට ඉඩ නොදෙන මනස හා වෙහෙසෙන ශරීරය

නින්ද නොයාම සහ කාර්යබහුල වැඩසටහන් මාලාව හේතුවෙන් වහාම විවේක ගන්නා ලෙස වෛද්‍යවරුන් පසුගිය මාසයේදී ඔහුට අවවාද කර තිබුණා. දෛනික ව්‍යායාම පවා මඟහැරෙන තරමට ශරීරය අධික ලෙස වෙහෙසට පත්ව ඇති බව ඔහු පවසන්නේ උපහාස මුසු ස්වරයකින්.

"මනස කියන්නේ තව වැඩ කරන්න පුළුවන් කියලයි. ඒත් ශරීරය කියන්නේ 'හිටපන් යාලුවා, ඔය නාකි මනුස්සයට ඇතුළට එන්න දෙන්න එපා' කියලයි. කියන තරම් ලේසි නැතත්, මම තවමත් සටන අතහැරලා නැහැ."

'කෝන් බනේගා ක්‍රෝර්පති' නැවතත් තිරයට

බච්චන්ගේ සෞඛ්‍ය තත්ත්වය අයහපත් වීම නිසා ඔහු මෙහෙයවන අතිශය ජනප්‍රිය 'Kaun Banega Crorepati 18' වැඩසටහනේ අලුත් කථාංග විකාශය කිරීම පවා තාවකාලිකව නවතා දමන්නට නිෂ්පාදකයන්ට සිදු වුණා.

කෙසේ වෙතත්, රසිකයින්ට සතුටුදායක ආරංචියක් ගෙන එමින් තමන් ඉතා සෙමින් සුපුරුදු දින චර්යාවට අවතීර්ණ වෙමින් සිටින බව ඔහු තහවුරු කරනවා.

නිෂ්පාදන කණ්ඩායමේ අභ්‍යන්තර ආරංචි මාර්ග සඳහන් කරන්නේ නොවැම්බර් 11 වනදායින් පසු ඔහු යළිත් රූගත කිරීම් සඳහා එක්වනු ඇති බවත්, නොවැම්බර් 16 සිට අලුත් කථාංග ප්‍රේක්ෂකයන් හමුවට පැමිණෙන බවත්ය.


විශ්වාසනීය මූලාශ්‍ර සබැඳිය:
The Times of India පුවත් වාර්තාව :