අඩුපීඩන අවදානම හමුවේ කොළඹ ගංවතුරට ඒකාබද්ධ මෙහෙයුමක්

නොවැම්බර් 6 වැනිදා ඇදහැළුණු ධාරානිපාත වර්ෂාවෙන් කොළඹ නගරය සහ තදාසන්න කලාප රැසක් පැය ගණනාවක් ජලයෙන් යටවීම හේතුවෙන් අඩාල වූ නාගරික ජන ජීවිතය යථා තත්ත්වයට පත්වෙමින් තිබියදී, ඉදිරි දිනවලදී යළිත් වැසි තත්ත්වය තීව්‍ර වීමේ පෙරනිමිති පහළ වී තිබේ.

පසුගිය පැය 24 තුළ දිවයිනේ වැඩිම වර්ෂාපතනය ලෙස මිලිමීටර් 111ක් අවිස්සාවේල්ලෙන් වාර්තා වන පසුබිමක, බස්නාහිර ඇතුළු පළාත් පහක ඇතැම් ප්‍රදේශවලට මිලිමීටර් 100 ඉක්මවූ තද වැසි අපේක්ෂා කරන බව කාලගුණ විද්‍යා දෙපාර්තමේන්තුව අනතුරු අඟවයි.

බෙංගාල බොක්කෙන් එන නව කාලගුණ අනතුරු ඇඟවීම

ගිනිකොනදිග බෙංගාල බොක්ක සහ අන්දමන් මුහුද ආශ්‍රිතව නොවැම්බර් 11 වැනිදා වනවිට පහළ වායුගෝලීය කැලඹිලි ස්වභාවයක් නිර්මාණය වීමේ හැකියාවක් පවතී.

එම වායුගෝලීය කැලඹිල්ල නොවැම්බර් 13 වනවිට අඩුපීඩන කලාපයක් දක්වාත්, නොවැම්බර් 15 වනවිට තවදුරටත් වර්ධනය වී පීඩන අවපාතයක් බවට පත්වීමටත් ඉඩකඩ පවතින බව කාලගුණ විද්‍යා අංශ පෙන්වා දෙයි. ගැඹුරු මුහුදේ යාත්‍රා කරන බහුදින ධීවර යාත්‍රා වෙත මේ වන විටත් ඒ පිළිබඳ විශේෂ විමසිලිමත් වීමේ නිවේදන නිකුත් කර ඇත.

කොළඹ නගරය සූදානම් කෙරෙන හදිසි ඒකාබද්ධ මෙහෙයුම

ඉදිරි දිනවලදී අපේක්ෂිත වර්ෂාව හමුවේ කොළඹ ජලයෙන් යටවීම වැළැක්වීම සඳහා රාජ්‍ය ආයතන කිහිපයක සහභාගිත්වයෙන් යුත් විශේෂ ක්ෂේත්‍ර වැඩසටහනක් නොවැම්බර් 8 වැනිදා නිල වශයෙන් ආරම්භ විය.

නාගරික සංවර්ධන නියෝජ්‍ය අමාත්‍ය එරංග ගුණසේකර සහ කොළඹ නගරාධිපතිනි ව්‍රායි කැලී බැල්තසාර් ප්‍රධානත්වයෙන් ඇරඹි මෙම මෙහෙයුමේදී, නගරයේ ජලය බැසයාමට බාධා පවතින ප්‍රධාන අවහිරතා ස්ථාන 60ක් කඩිනම් පිරිසිදු කිරීම් සඳහා හඳුනාගෙන තිබේ.

කොළඹ නාගරික බලප්‍රදේශයට අයත් උතුරු, නැගෙනහිර, බස්නාහිර, මැද කොළඹ සහ බොරැල්ල යන ආසන පහම ආවරණය වන පරිදි ඇළ මාර්ග පිරිසිදු කිරීම සහ කාණු පද්ධති ප්‍රතිසංස්කරණය ප්‍රමුඛතා පදනමින් මේ වනවිටත් ක්‍රියාත්මකයි.

ප්‍රමුඛත්ව මෙහෙයුම් කලාප සහ ආයතනික දායකත්වය

පසුගියදා ජල ගැලීම්වලින් දැඩි බලපෑම් එල්ල වූ පිටකොටුව, දෙමටගොඩ, ඔරුගොඩවත්ත, කොල්ලුපිටිය, බම්බලපිටිය සහ කොම්පඤ්ඤවීදිය යන ප්‍රදේශ ආශ්‍රිතව මෙම කටයුතු වේගවත් කර ඇත.

* නාරාහේන්පිට: කිරිමණ්ඩල මාවත
* බම්බලපිටිය: හේග් පාර
* වැල්ලවත්ත: කොලින්වුඩ් පෙදෙස සහ පරාක්‍රම පාර
* වැල්ලවත්ත සහ කිරුළපන: කොලින්වුඩ් පෙදෙස, පරාක්‍රම පාර, කූරේ නිවාස සංකීර්ණය, ස්ටැෆර්ඩ් පාර සහ යාබද ඇළ මාර්ගය
* දෙමටගොඩ සහ අවට: බේස්ලයින් පාර අසල හීන් ඇළ, ආරාමය පාර, නිව් බසාර්, ද මෙල් වත්ත සහ පැරඩයිස් පාර

ශ්‍රී ලංකා යුද හමුදාව, කොළඹ මහ නගර සභාව (CMC), ශ්‍රී ලංකා ඉඩම් සංවර්ධනය කිරීමේ සංස්ථාව (SLLDC), නාගරික සංවර්ධන අධිකාරිය (UDA) සහ මාර්ග සංවර්ධන අධිකාරිය (RDA) යන ආයතනවල නිලධාරීන් හා කාර්ය මණ්ඩල ඒකාබද්ධව මෙම ශ්‍රම දායකත්වය සපයයි.

මූලික හේතු හඳුනාගැනීම සහ ස්ථිර නඩත්තු යාන්ත්‍රණය

කාණු පද්ධති නිසි පරිදි නඩත්තු නොකිරීම, අනවසර ඉදිකිරීම් හා අනවසර ගොඩකිරීම්, අවිධිමත් නාගරික සංවර්ධනය මෙන්ම ඇළ මාර්ගවලට ඝන අපද්‍රව්‍ය බැහැර කිරීම නගරය ජලයෙන් යටවීමට ප්‍රධාන සාධක ලෙස අදාළ අංශ විසින් නිරීක්ෂණය කර තිබේ.

මෙම අර්බුදයට විසඳුම් සෙවීමේදී එක් එක් ආයතන වෙන් වෙන්ව තනි තනිව ක්‍රියාත්මක වීම වෙනුවට, පද්ධති නඩත්තුව සහ අධීක්ෂණය ඒකාබද්ධ ජාතික යාන්ත්‍රණයක් යටතට ගෙන ඒමට සැලසුම් කර ඇත.

ක්ෂණික අවහිරතා ඉවත් කර වර්ෂා සමයේදී ජනතාවට සහන සැලසීම මෙන්ම, කොළඹ නගරය ගංවතුර උවදුරෙන් මුදාගැනීම සඳහා දිගුකාලීන තිරසාර පද්ධතියක් ස්ථාපිත කිරීම මෙම වැඩපිළිවෙළේ මූලික අරමුණයි.

මහජන ආරක්ෂක හා පාර්ලිමේන්තු කටයුතු නියෝජ්‍ය අමාත්‍ය සුනිල් වටගල, කොළඹ නියෝජ්‍ය නගරාධිපති හේමන්ත වීරකෝන් ඇතුළු මහජන නියෝජිතයෝ ද මෙම ක්ෂේත්‍ර නිරීක්ෂණ කටයුතුවලට එක්ව සිටියහ.