ලංකාවේ අලි-මිනිස් ගැටුම හුදු පාරිසරික කාරණයකින් ඔබ්බට ගොස් බරපතල සමාජ-ආර්ථික අර්බුදයක් බවට පත්ව ඇති පසුබිමක, වන අලි සම්පත මෙන්ම ගම්බිම් රැකගැනීමේ අරමුණින් ක්‍රියාත්මක 'හස්ති සේනා' මෙහෙයුම විධිමත් රාජ්‍ය ප්‍රතිපත්තිමය සහ නීතිමය රාමුවක් තුළ ස්ථාපිත කිරීමට රජයේ අවධානය යොමු වී තිබේ.
වනජීවී සංරක්ෂණ දෙපාර්තමේන්තුව සහ ත්‍රිවිධ හමුදාව ඒකාබද්ධව දියත් කර ඇති මෙම විශේෂ ක්‍රියාන්විතය තවදුරටත් පුළුල් කර, ඊට නිසි නෛතික බලයක් ලබාදීම සඳහා ඉදිරියේදී කැබිනට් මණ්ඩල සංදේශයක් ඉදිරිපත් කිරීමට නියමිතය.
ඉහළ පෙළේ සාකච්ඡාවකදී එළඹි තීරණ
පරිසර නියෝජ්‍ය අමාත්‍ය ඇන්ටන් ජයකොඩි මහතාගේ ප්‍රධානත්වයෙන් පරිසර අමාත්‍යාංශයේදී පැවති විශේෂ සමාලෝචන හමුවකදී මෙම තීරණය ගෙන ඇත.
අමාත්‍යාංශ ලේකම්වරයා ඇතුළු ත්‍රිවිධ හමුදාවේ ඉහළ පෙළේ නිලධාරීන් ඊට එක්ව සිටි අතර, ක්ෂේත්‍ර මට්ටමේ මෙහෙයුම් හුදෙක් තාවකාලික පියවරක් ලෙස නොව දීර්ඝකාලීන නීතිමය පදනමක් සහිතව පවත්වාගෙන යාමේ වැදගත්කම මෙහිදී සාකච්ඡාවට බඳුන් විය.
වාර්ෂිකව අහිමි වන වන අලි සහ මිනිස් ජීවිත සංඛ්‍යාව අවම කරගැනීමට නම්, වනජීවී නිලධාරීන්ගේ තාක්ෂණික දැනුම සහ ත්‍රිවිධ හමුදාවේ ක්ෂේත්‍ර නිරීක්ෂණ බලය මනාව ඒකාබද්ධ විය යුතු බවට මෙහිදී එකඟතාව පළවී තිබේ.
සංක්‍රමණික මංකඩවලට විශේෂ හමුදා මුරසංචාර
අධි අවදානම් සහිත වන අලි සංක්‍රමණික කලාප සහ සංවේදී පරිසර පද්ධති ආශ්‍රිතව සැරිසරන තනි ඇතුන් මෙන්ම පැටවුන් සහිත අලි රංචු නිරන්තර නිරීක්ෂණයට ලක්කිරීම මෙම සැලසුමේ මූලික පියවරකි.
විශේෂයෙන්ම දඩයම්කරුවන්ගේ හෝ ගැටුම්කාරී තත්ත්වයන්ගේ ගොදුරක් බවට පත්වීමට වැඩි ඉඩක් ඇති වටිනා ඇතුන් ගැවසෙන මාර්ග ඉලක්ක කරගනිමින්, ත්‍රිවිධ හමුදා විශේෂ ආරක්ෂක අනුඛණ්ඩ යොදවා ක්ෂේත්‍ර රැකවරණය සැලසීමට යෝජනා වී ඇත. සතුන්ගේ සාම්ප්‍රදායික ගමන් මාර්ග සුරක්ෂිත කිරීම මගින් ඔවුන් ගම්වැදීම පාලනය කරගත හැකි බව නිරීක්ෂකයින්ගේද අදහසයි.
දඩයම් උපක්‍රම සහ වනජීවී අපරාධවලට එරෙහි බුද්ධි දැලක්
වන අලින් ඝාතනය කිරීම සහ අඩපණ කිරීම සඳහා මෙරට බහුලව යොදාගන්නා නීතිවිරෝධී උපක්‍රම මැඩපැවැත්වීම කෙරෙහිද මෙම මෙහෙයුමේ විශේෂ අවධානය යොමු කෙරේ.
හක්කපටස්, බඳින තුවක්කු සහ අනවසර ගිනිඅවි නිෂ්පාදනය, බෙදාහැරීම මෙන්ම භාවිත කරන ජාල හඳුනාගැනීම සඳහා රාජ්‍ය බුද්ධි අංශ තොරතුරු උපයෝගී කරගැනීමට සැලසුම් කර ඇත. මෙම නීතිවිරෝධී සැපයුම් ජාල වැටලීම් හරහා මුලිනුපුටා දැමීම මගින් වනජීවී අපරාධ මැඩලීම වේගවත් කළ හැකි බව බලධාරීහු විශ්වාස කරති.
වැඩිදුර තොරතුරු ඇතුළත් නිල මූලාශ්‍ර: