සංවිධානාත්මක අපරාධ පනත් කෙටුම්පතට රජයෙන් වැදගත් සංශෝධන කිහිපයක්

බුද්ධිමය දේපළ හා සුරාබදු වැරදි ඉවත් කිරීමට ශ්‍රේෂ්ඨාධිකරණයේදී එකඟතාව

පාර්ලිමේන්තුවට ඉදිරිපත් කර ඇති ‘සංවිධානාත්මක අපරාධ වැළැක්වීමේ පනත් කෙටුම්පතට’ අදාළව නීතිපති දෙපාර්තමේන්තුව ඊයේ (දිනය) ශ්‍රේෂ්ඨාධිකරණය හමුවේ තීරණාත්මක එකඟතාවක් පළ කළේය.

ඒ අනුව, සුරාබදු වැරදි සහ ප්‍රකාශන අයිතිය (Copyright) ඇතුළු බුද්ධිමය දේපළ සම්බන්ධ වැරදි මෙම පනත් කෙටුම්පතේ විෂය පථයෙන් සම්පූර්ණයෙන්ම ඉවත් කිරීමට පියවර ගන්නා බව රජය වෙනුවෙන් පෙනී සිටි අතිරේක සොලිසිටර් ජෙනරාල් විරාජ් දයාරත්න අධිකරණයට දැනුම් දුන්නේය.

ප්‍රීති පද්මන් සූරසේන, අචල වෙන්ගප්පුලි සහ සම්පත් අබේකෝන් ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඬුල්ල හමුවේ අදාළ පෙත්සම් විභාගය පැවැත්විණි.

කාරක සභා අවස්ථාවේදී සංශෝධන

නීතිපතිවරයා වෙනුවෙන් පෙනී සිටි අතිරේක සොලිසිටර් ජෙනරාල්වරයා අධිකරණයට කරුණු දක්වමින් කියා සිටියේ, පෙත්සම්කාර පාර්ශ්වයන් විසින් පෙන්වා දෙන ලද සංශෝධන සම්බන්ධයෙන් අදාළ අමාත්‍යාංශ සමඟ සාකච්ඡා කර, පාර්ලිමේන්තුවේ කාරක සභා අවස්ථාවේදී ඊට අදාළ සංශෝධන එක් කිරීමට එකඟ වූ බවයි.

විශේෂයෙන්ම සැකකරුවන් අත්අඩංගුවට ගැනීම, රඳවා තබා ගැනීම සහ රැඳවුම් නියෝග ලබාගැනීමේ ක්‍රියාවලිය සම්බන්ධයෙන් මතුව ඇති නීතිමය ගැටලු පිළිබඳවද අමාත්‍යාංශය සමඟ සාකච්ඡා කර ඉදිරියේදී අවශ්‍ය සංශෝධන ඉදිරිපත් කරන බවට සොලිසිටර් ජෙනරාල්වරයා එහිදී අධිකරණය හමුවේ ප්‍රතිඥා දුන්නේය.

මෙහිදී ශ්‍රී ලංකා නීතිඥ සංගමය වෙනුවෙන් පෙනී සිටි නීතිඥවරයා අධිකරණය හමුවේ සිහිපත් කර සිටියේ, මෙම පනත් කෙටුම්පත අනිවාර්යයෙන්ම සංශෝධනය විය යුතු බවට ජනාධිපතිවරයා පවා ප්‍රසිද්ධියේ ප්‍රකාශ කර තිබූ බවයි.

පෙත්සම් 26ක් විභාගයට

පසුගිය ඔක්තෝබර් 06 වැනිදා ගැසට් පත්‍රයේ පළ කරන ලද මෙම පනත් කෙටුම්පතේ අඩංගු ඇතැම් වගන්ති ආණ්ඩුක්‍රම ව්‍යවස්ථාවෙන් තහවුරු කර ඇති මූලික අයිතිවාසිකම් උල්ලංඝනය කරන බව පවසමින් විවිධ පාර්ශ්ව විසින් ශ්‍රේෂ්ඨාධිකරණය හමුවේ පෙත්සම් 26ක් ගොනු කර තිබිණි.

පෙත්සම්කාර පාර්ශ්ව වෙනුවෙන් පෙනී සිටි ජනාධිපති නීතිඥ රොමේෂ් ද සිල්වා සහ එම්.ඒ. සුමන්තිරන් ඇතුළු නීතිඥ මණ්ඩලය ඉල්ලා සිටියේ, රජය විසින් සිදුකිරීමට අපේක්ෂිත යෝජිත සංශෝධන පිළිබඳව ලිඛිතව පෙත්සම්කරුවන් දැනුවත් කිරීමෙන් පසු වැඩිදුර විභාගය පැවැත්විය යුතු බවයි.

ඉදිරිපත් වූ සියලු කරුණු සලකා බැලූ ත්‍රිපුද්ගල විනිසුරු මඬුල්ල, වැඩිදුර නීතිපති කරුණු දැක්වීම සඳහා පෙත්සම් විභාගය කෙටි වේලාවකට කල් තැබීමට නියෝග කළේය.