ආණ්ඩු පක්ෂ මන්ත්‍රී කණ්ඩායම් රැස්වීමේදී ශ්‍රී ලංකා පොදු ජන පෙරමුණේ මහනුවර දිස්ත්‍රික් පාර්ලිමේන්තු මන්ත්‍රී මහින්දානන්ද අලුත්ගමගේ සහ
එම දිස්ත්‍රික් පාර්ලිමේන්තු මන්ත්‍රී ගුණතිලක රාජපක්ෂ අතර ඇතිවූ බහින්බස්වීමක් පසුව ඇතිවූ ගැටුමකදී ගුණතිලක රාජපක්ෂ තුවාල ලබා කොළඹ යුද හමුදා රෝහලට ඇතුළත් කරනු ලැබ සිටි.
ගැටුමෙන් ඔහුගේ පාදයකට තුවාල සිදුවී ඇති හෙයින් ඊට ශල්‍ය කර්මයක්ද සිදු කිරීමට නියමිතව ඇතැයි දැනගන්නට ඇත.
මහනුවර ප්‍රදේශයේ ගැටලුවක් සම්බන්ධයෙන් ආණ්ඩු පක්ෂ මන්ත්‍රී කණ්ඩායම් රැස්වීමේදී සාකච්ඡා කෙරුණු අවස්ථාවේදී මෙම බහින්බස්වීම සිදුවී ඇතැයි පැවසේ.
මේ සම්බන්ධයෙන් අප කළ විමසුමකදී අදහස් දැක්වූ පොදු ජන පෙරමුණේ මහනුවර දිස්ත්‍රික් මන්ත්‍රී මහින්දානන්ද අලුත්ගමගේ, ආණ්ඩු පක්ෂ කණ්ඩායම් රැස්වීමේදී නිලධාරීන් සහ මන්ත්‍රීවරුන් ඉදිරිපිට ගුණතිලක රාජපක්ෂ තමාට ආවේගශීලීව කතා කළ අවස්ථාවේදී ඊට පිළිතුරු නොදෙන්නේ යැයි පවසා එළියට එන ලෙස තමා ඔහුට පැවසූ බව කීය.
ගුණතිලක රාජපක්ෂ ආණ්ඩු පක්ෂ කණ්ඩායම් රැස්වීමෙන් එළියට එන විට තමා ඔහුගේ කොළරයෙන් අල්ලාගෙන " උඹ මට කිව්වේ මොකක්දැයි" විමසූ බවත් එවිටම පොළොන්නරුවේ ජගත් සමරවික්‍රම මන්ත්‍රීවරයා පැමිණ ගහන්න එපා යැයි කියා ගුණතිලක රාජපක්ෂ පසුපසට අදින විට ඒ දෙදෙනාම එක ගොඩේ ඇද වැටුණු බවත් මන්ත්‍රී අලුත්ගමගේ ප්‍රකාශ කළේය.
තමාගේ හැසිරීම් සියල්ල සීසීටීවී දර්ශන වල ඇතැයි කී මහින්දානන්ද අලුත්ගමගේ පහරදීමක් සිදුවී නම් එම දර්ශනවලින් හොඳින්ම ඔප්පු කර ගැනීමට හැකියාව ඇති බවද සඳහන් කළේය.
තමා ඔහුට අතක්වත් නොතැබූ බවත් කමීස කොළරයෙන් පමණක් ඇල්ලූ බවත් ඔහු කීවේය.
අධික වර්ෂාව සහිත කාලගුණය නිසා මහනුවර ජනතාවගේ නිවෙස් මතට ගස් වැටී ජනතාව ඉතා අසීරුවට පත්ව සිටින බව තමා ආණ්ඩු පක්ෂ රැස්වීමේදී කී බව පැවසූ අලුත්ගමගේ, එහිදි වනජීවී සහ වන සංරක්ෂණ ඇමැතිනී පවිත්‍රා වන්නිආරච්චි පනතක් ගැන කියමින් ගස් කපා ඉවත් කිරීමේ කටයුත්ත පමා කිරීමට සැරසුණු බවද ප්‍රකාශ කළේය.
මේ වෙලාවේ බම්බු පනත් හකුලාගෙන ජනතාවගේ යහපත වෙනුවෙන් කටයුතු කරන්නැයි තමා පැවසූ බවද මන්ත්‍රීවරයා සඳහන් කළේය.
කොළඹ දිස්ත්‍රික් මන්ත්‍රී මධුර විතානගේ ද තමාගේ කතාව අනුමත කරමින් එහිදී අදහස් දැක්වූ බව අලුත්ගමගේ මන්ත්‍රීවරයා වැඩිදුරටත් කීවේය.
මේ සම්බන්ධයෙන් අදහස් දැක්වූ කොළඹ දිස්ත්‍රික් පාර්ලිමේන්තු මන්ත්‍රී නීතිඥ මධුර විතානගේ පැවසුවේ, පනත් පැත්තකට තබා ජනතාවගේ ආරක්ෂාව වෙනුවෙන් කටයුතු කළ යුතු යැයි තමා එහිදී තදින්ම පැවසූ බවයි.
මේ අවස්ථාවේදී මදුර විතානගේ සහ පවිත්‍රා වන්නිආරච්චි අතරද උණුසුම් වචන හුවමාරුවක් සිදුවී ඇතැයි දැනගන්නට ඇත.
සිද්ධිය සම්බන්ධයෙන් පාර්ලිමේන්තු මන්ත්‍රී ගුණතිලක රාජපක්ෂ ගෙන් කරුණු විමසීමට උත්සාහ දැරුවද එය ව්‍යාර්ථ විය.
ජනාධිපති රනිල් වික්‍රමසිංහ ගේ ප්‍රධානත්වයෙන් ආණ්ඩු පක්ෂ මන්ත්‍රී කණ්ඩායම් රැස්වීම ජනාධිපති ලේකම් කාර්යාලයේදී ඊයේ (03) පස්වරුවේ පැවැත්විණ.
(lankadeepa.lk)
