වසර ගණනාවක් තිස්සේ යුද හමුදාව වාඩි ලා සිටි දෙමළ ජනයාට අයත් අක්කර දෙසියකට වැඩි උතුරේ භුමියක් නිදහස් කොට මාස දෙකක් ගතවීමටත්
මත්තෙන් ඉඩම් හිමියන්ට එහි ඇතුළුවීම නැවත තහනම් කර තිබේ.
සේනාධිනායකයා ද වන ජනාධිපතිගේ උතුරේ නියෝජිතවරිය විසින් එම තහනම පනවා ඇත්තේ මුළු භූමියෙන් 200න් පංගුවක පමණ බිම් බෝම්බ පැවැතිය හැකි බවට සැක මතු කරමිනි.
පළාත් බද වාර්තාකරුවන් පවසන්නේ මාර්තු 22 වැනිදා හමුදා ග්‍රහණයෙන් මුදා හරින ලද තෙල්ලිපලෙයිහි අක්කර 234.8 ක භුමියෙන් වර්ග අඩි 55000 ක ප්‍රදේශයක් තුළ බිම්බෝම්බ තිබිය හැක බවට මතුවු සැකයක් මත ජුනි 10 වැනිදා තෙක් සමස්ත භුමියට ඇතුල්වීම උතුරු පළාත් ආණ්ඩුකාර කාර්යාලය විසින් මැයි 30 වැනිදා සිට තහනම් කර ඇති බවයි.
ඉඩම් නිදහස් කිරීමෙන් මාස එක හමාරකට පසුව එහි හිමියන්ට භුමියට පිවිසීමට පහසු වන පරිදි ප්‍රවේශ මාර්ග විවෘත කර දී තිබුනේ උතුරු පළාත් ආණ්ඩුකාර පී.එස්.එම්. චාල්ස් විසින් මැයි 7 වැනිදා ආරක්ෂක බලධාරීන් හමුවී ඉල්ලීමක් කිරීමෙන් අනතුරුවයි.
ප්‍රවේශ මාර්ග විවෘත කරන මොහොත වන විට එම භුමිය බිම් බෝම්බ වලින් තොර කළාපයක් ලෙස රජයේ ආරක්ෂක අංශ විසින් තහවුරු කර තිබුනේදැයි උතුරු පළාත් ආණ්ඩුකාර කාර්යාලය නිවේදනය කර නැත.
පසුගිය අප්‍රේල් මාසයේදී ආණ්ඩුකාරවරිය සදහන් කර තිබුනේ පූනකරි සහ මුහමාලෙයි ප්‍රදේශවල බිම්බෝම්බ ඉවත් කිරීමේ කටයුතු තවත් සිදුකිරීමට පවතින බවයි.
පළාත් බද වාර්තාකරුවන් පවසන්නේ ඉඩම් නිදහස් කර මාස දෙකකටත් වැඩි කාලයකින් පසුව බිම් බෝම්බ පවතින බවට සැක මතු වු තෙල්ලිපලෙයි, ඔට්ටගපුලම් භුමියේ තාක්ෂණික පරීක්ෂණ කටයුතු දිස්ත්‍රික් ලේකම් කාර්යාලය ආරක්ෂක අංශ සමග එක්ව මේ වන විටත් ආරම්භ කර ඇති බවයි.
යාපනයේ සංචාරයක යෙදී සිටියදී රනිල් වික්‍රමසිංහ ජනාධිපතිවරයා විසින් දෙමළ ජනයාට අයත් වලිකාමම් උතුරේ තෙල්ලිපලෙයි ඔට්ටගපුලම් ප්‍රදේශයේ අක්කර 234.8 ක භුමියක් හමුදා ග්‍රහණයෙන් මුදා හැරීමට කටයුතු කර තිබුනේ මාර්තු 22 වැනිදා යාපනය ඔට්ටගපුලම් ප්‍රදේශයේදී පැවති ‘උරුමය’ වැඩසටහනේ සින්නක්කර ඉඩම් ඔප්පු ලබාදීමේ වැඩසටහනට සමගාමීව පලාලි ගුවන් හමුදා කඳවුරේ දීය.
යාපනය ආඥාපති මේජර් ජෙනරාල් චන්දන වික්‍රමසිංහ විසින් එදින ජනාධිපතිවරයා අත පත් කරන ලද ඉඩම් නිදහස් කිරීමේ නිල ලිපි ලේඛන, අනතුරුව ජනාධිපති රනිල් වික්‍රමසිංහ විසින් යාපනය දිසාපති මරුදලිංගම් ප්‍රදීපන් ට භාර දී තිබුනි.
ඒ අනුව වලිකාමම් උතුර ප්‍රාදේශීය කොට්ඨාසයේ ග්‍රාම සේවා වසම් පහකට අයත් අක්කර 234 ක් මෙලෙස සාමාන්‍ය ජනතාවට ලබාදීම සිදු කෙරුණු අතර එම ඉඩම් රජයේ කෘෂි නවීකරණ වැඩසටහනට සමගාමීව කෘෂිකාර්මික කටයුතු වෙනුවෙන් යොදා ගැනීමට නියමිත බව ජනාධිපති මාධ්‍ය ඒකකය නිවේදනය කර ඇත.
එලෙස නිදහස් කර තිබුනේ වාසවිලාන් නැගෙනහිර (J/244), වාසවිලාන් බටහිර (J/245), පලාලි උතුර (J/254), පලාලි නැගෙනහිර (J/253), පලාලි දකුණ (J/252) යන ග්‍රාම නිලධාරී කොට්ඨාස යටතේ අක්කර 234.8ක භුමියකි.
මෙහි පදිංචි පවුල් 327ක් තම ඉඩම් හිමිකම් ලියාපදිංචි කර ඇති අතර ඒ අතරින් පවුල් 171ක් තම ඉඩම් සලකුණු කර එළිපෙහෙළි කිරීම ආරම්භ කර ඇති බව උතුරු පළාත් සභා වෙබ් අඩවියේ සදහන්ය.
ලෝක බිම්වෙඩි දින ජාතික උත්සවය
කිලිනොච්චිය මධ්‍ය මහා විදුහල් ක්‍රීඩාංගණයේදී අප්‍රේල් 6 වැනිදා පැවැති ලෝක බිම්වෙඩි දින ජාතික උත්සවයට සහභාගී වෙමින් නාගරික සංවර්ධන හා නිවාස අමාත්‍ය ප්‍රසන්න රණතුංග සදහන් කර තිබුනේ 2028 වන විට ශ්‍රී ලංකාව බිම්බෝම්බ හා පුපුරා නොගිය යුද්ධෝපකරණ වලින් තොර රටක් බවට පත් කරන බවයි.
උතුරු නැගෙනහිර දෙපළාත තුළ බිම් බෝම්බ ඉවත් කිරීමට ඉතිරිව ඇත්තේ කිලෝමීටර් 23 ක පමණ ප්‍රමාණයක් බව පැවැසු ඔහු එම ප්‍රදේශ මොනවාදැයි පැහැදිලි කර තිබුනේ නැත.
බිම්බෝම්බ තිබූ සමස්ත භූමියෙන් කිලෝමීටර් 1340.87 ක ප්‍රදේශයක බිම් බෝම්බ සම්පූර්ණයෙන්ම ඉවත් කර ඇති අතර, එම ප්‍රදේශයෙන් බිම්බෝම්බ 2,492,081 ක් සොයාගෙන විනාශ කර ඇති බවත් අමාත්‍යවරයා එහිදී ප්‍රකාශ කර තිබුනි.
එම උත්සවයට සහභාගී වු උතුරු පළාත් ආණ්ඩුකාර පී.එස්.එම්. චාල්ස් සදහන් කර තිබුනේ බිම්බෝම්බ ඉවත් කිරීමේ කටයුතු ආරම්භ කරන විට ශ්‍රී ලංකාව බිම්බෝම්බ වලින් තොර රටක් ලෙස ප්‍රකාශයට පත් කළ හැක්කේ 2030 වසරෙන් පසුව බවට ස්ථාවරයක් තිබූ නමුත්, මේ වසර අවසන් වන විට බිම් බෝම්බ ඉවත් කර එම ඉඩම් මුල් අයිතිකරුවන්ට භාර දෙනු ඇතැයි තමන් අපේක්ෂා කරන බවයි.
