අහෝසි කෙරෙන ලංකා විදුලි බල මණ්ඩලය වෙනුවට පිහිටුවනු ලැබූ විදුලි බල මණ්ඩලයේ සමාගම් 6න් 3ක් සඳහා නව සාමාන්‍යාධිකාරීවරුන් පත් කර තිබේ.
ඒ අනුව,
* ලංකා විදුලි උත්පාදන ලංකා පුද්ගලික සමාගම සඳහා ඉංජිනේරු එන්. ජී. සාලිය පණ්ඩිතරත්න ද,
* ජාතික සම්ප්‍රේෂණ ජාල සේවා සපයන්නන්ගේ (පුද්ගලික) සමාගම සඳහා ඉංජිනේරු එන්. එස්. වෙත්තසිංහ සහ
* විදුලි බෙදාහැරීමේ ලංකා (පුද්ගලික) සමාගම සඳහා ඉංජිනේරු කේ. එස්. අයි. කුමාර ද පත් කර තිබේ.
මෙම පත් කිරීම් පසුගිය 06 වැනි දින සිදුකර ඇති නමුත් විදුලි බල මණ්ඩල සේවක අරමුදල (පුද්ගලික) සමාගම සහ එනර්ජි වෙන්චර්ස් ලංකා (පුද්ගලික) සමාගම සඳහා මෙතෙක් නව සාමාන්‍යාධිකාරීවරුන් පත් කර නොමැති බවත් සඳහන් වේ.
අද මැදියම් රැයේ සිට වෘත්තිය සමිති අවලංගුයි !
මේ අතර අද මැදියම් රැයේ සිට ලංකා විදුලි බල මණ්ඩලයේ මෙහෙයුම් කටයුතු අවසන් වීමත් සමග, විදුලිබල මණ්ඩලය යටතේ එහි සේවකයින් පිහිටුවා තිබූ වෘත්තිය සමිති සියල්ලද අද මැදියම් රැයේ සිට අවලංගු වේ.
ඒ අනුව අදාළ වෘත්තිය සමිති සියල්ල අහෝසි වන අතර නව සේවා යෝජකයන් යටතේ නව වෘත්තිය සමිති ලියාපදිංචි කර පිහිටුවා ගැනීමටද අදාළ වෘත්තිය සමිති වෙත සිදුවේ.
විදුලිබල මණ්ඩලයේ ආරංචි මාර්ග සඳහන් කරනුයේ මේ වන විට එම මණ්ඩලයේ වෘත්තිය සමිති 40කට අධික සංඛ්‍යාවක් මේ වන විටත් තම සේවා යෝජකයින් යටතේ නව වෘත්තිය සමිති ලියාපදිංචි කර පිහිටුවීමට පියවර ගනිමින් සිටින බවය.
සේවකයින්ට සියයට 25ක වැටුප් වැඩිවීමක්
මේ අතර සියලුම ලංකා විදුලිබල මණ්ඩල සේවකයින් සඳහා සියයට 25ක වැටුප් වැඩිවීමක් ලබාදී ඇත.
ඒ, එම මණ්ඩලය අනුප්‍රාප්තික සමාගම් වෙත අනුයුක්ත කිරීමේ ක්‍රියාවලියේ පියවරක් ලෙසිනි.
ඒ අනුව අදාළ වැටුප් වැඩිවීම 2025 ජනවාරි 01 දින සිට බලපැවැත්වෙන බව සඳහන්ය.
මේ සමඟ දීර්ඝ කාලයක් පුරා පැවති වැටුප් විෂමතා සාර්ථකව විසඳා ඇති බව ස්වෙච්ඡා විශ්‍රාම ගැන්වීමේ ක්‍රමය තෝරාගත් සේවක එකමුතුව (VRS) සඳහන් කරයි.
මුලාශ්‍රය :
| aruna
