ඉලක්ක කළ ඩොලර් බිලියන 4ක සිහිනය 3.5 දක්වා පහතට; ඉන්දියානුවන් යුරෝපීයයන්ට වඩා වියදම් කරද්දී ගෝලීය මාකටිං අසාර්ථකයි.
ශ්‍රී ලංකාවේ ඩොලර් අර්බුදයට වේගවත්ම විසඳුම ලෙස හුවාදැක්වූ සංචාරක කර්මාන්තය මේ වන විට බරපතළ ආදායම් බිඳවැටීමකට මුහුණ දී සිටී. ලෝක මට්ටමේ වෙරළ තීරයන්, වනජීවී සම්පත් සහ සංස්කෘතික උරුමයන් රට සතුව පැවතියද, නිසි ජාත්‍යන්තර ප්‍රවර්ධන වැඩපිළිවෙළක් නොමැතිකම (Promotion paralysis) හේතුවෙන් 2026 වසරේ දෙවැනි අර්ධය ආරම්භ වන විට සංචාරක ක්ෂේත්‍රයෙන් බලාපොරොත්තු වූ බිලියන ගණනක විදේශ විනිමය රටට අහිමි වෙමින් පවතී.
මහ බැංකු රතු එළිය: ජූනි මාසයේ මහා කඩාවැටීම
ශ්‍රී ලංකා මහ බැංකුවේ නවතම සංඛ්‍යාලේඛනවලට අනුව සංචාරක ආදායමේ පසුබෑම මෙසේය,
12%ක ආදායම් බිඳවැටීමක්:
2026 වසරේ ගතවූ මුල් මාස 6ක කාලය තුළ සංචාරක ව්‍යාපාරයෙන් ලැබී ඇත්තේ ඩොලර් බිලියන 1.51ක ආදායමක් පමණි. මෙය පසුගිය වසරේ අදාළ කාලයට සාපේක්ෂව 12%ක පැහැදිලි අඩුවීමකි.
දුර්වලම මාසය ජූනි:
ගතවූ ජූනි මාසයේදී වාර්තා වී ඇත්තේ ඩොලර් මිලියන 151.1ක ආදායමක් පමණක් වන අතර, එය 11%ක බිඳ වැටීමක් සනිටුහන් කරමින් 2026 වසරේ වාර්තා වූ දුර්වලම මාසික කාර්යසාධනය බවට පත්ව ඇත.
ඉලක්ක කප්පාදුව:
මැදපෙරදිග පවතින යුද ගැටුම් සහ ගුවන් ගමන් සීමා වීම් නිදහසට කරුණු කරගනිමින්, රජය විසින් 2026 වසර සඳහා මුලින් අපේක්ෂා කළ සංචාරකයන් මිලියන 3ක සහ ඩොලර් බිලියන 4ක ඉලක්කය, සංචාරකයන් මිලියන 2.5ක් සහ ඩොලර් බිලියන 3.5ක් දක්වා පහත හෙළා තිබේ.
තරඟකරුවන් ඉගිලෙද්දී ලංකාව ‘හිඟන්නන්’ සොයයිද?
විශේෂඥයන් පෙන්වා දෙන්නේ බාහිර යුද වාතාවරණයට වඩා ලංකාවේ අසාර්ථක ගෝලීය වෙළෙඳපොළ උපායමාර්ග (Marketing strategies) මෙම බිඳවැටීමට වගකිව යුතු බවයි.
ප්‍රවර්ධන අඩුව:
තායිලන්තය, වියට්නාමය සහ මාලදිවයින වැනි රටවල් යුරෝපය සහ උතුරු ඇමරිකාව ඉලක්ක කරමින් ඩොලර් මිලියන ගණන් වැය කර ඩිජිටල් ප්‍රවර්ධන සහ ගුවන් සමාගම් හවුල්කාරිත්වයන් ගොඩනඟද්දී, ලංකාවේ ප්‍රවර්ධන කටයුතු පවතින්නේ ඉතාම මන්දගාමී මට්ටමකය.
වැඩිපුරම වියදම් කරන්නේ කවුද?:
සංචාරක ප්‍රවර්ධන කාර්යාංශයේ සභාපති බුද්ධික හේවාවසම් ට අනුව, සාමාන්‍ය සංචාරකයෙකු දිනකට ඩොලර් 148ක් වැය කරද්දී, ඉන්දියානු සංචාරකයින් දිනකට ඩොලර් 154ක් වැය කරමින් ජාතික සාමාන්‍යය ඉක්මවා ගොස් ඇත. එමෙන්ම වනජීවී සහ සාගර සංචාරකයන් (Wildlife & marine tourists) දිනකට ඩොලර් 160ත් 170ත් අතර මුදලක් වැය කරති.
යුරෝපා වෙළෙඳපොළ අත්හැරීම:
කලාපීය සංචාරකයන් මත පමණක් යැපීම අවදානම් සහගත වන අතර, වැඩිම කාලයක් රැඳී සිටිමින් විශාල වශයෙන් මුදල් වියදම් කරන ඉහළ පෙළේ යුරෝපීය සංචාරකයන් ආකර්ෂණය කරගැනීමට ලංකාව අසමත් වී ඇත. නිකන්ම සංචාරකයන් හිස් ගණන වැඩි කරනවා වෙනුවට සුඛෝපභෝගී සෞඛ්‍ය (Wellness) සහ පරිසර සංචාරක ක්‍ෂේත්‍රය ප්‍රවර්ධනය කළ යුතුව තිබුණි.
2026 වසර නිම වීමට තවත් මාස 6ක් පමණක් ඉතිරිව තිබියදී, ආණ්ඩුව සංශෝධනය කළ ඩොලර් බිලියන 3.5ක අවම ඉලක්කය සපුරා ගැනීමට වුවද ඉදිරි මාස කිහිපය තුළ තවත් ඩොලර් බිලියන 2කට වඩා වැඩි ආදායමක් උපයාගත යුතුය. වහාම ක්‍රියාත්මක වන පරිදි යුරෝපීය වාරික වෙළෙඳපොළ (Premium markets) ඉලක්ක කරගත් දැවැන්ත ප්‍රවර්ධන මෙහෙයුමක් දියත් නොකළහොත්, මෙම වසරේ සංචාරක ආදායම් ඉලක්ක මුළුමනින්ම අසාර්ථක වනු ඇත.
මුලාශ්‍රය :
Sri Lanka Tourism Bleeds Billions amid Promotion Policy Paralysis
