මොකක්ද මේ සිදුවීම?
ප්‍රාථමික කර්මාන්ත රාජ්‍ය අමාත්‍යවරයා ලෙස කටයුතු කළ සමයේ සිදුවූ බව කියන මූල්‍ය අක්‍රමිකතා සහ බලපෑම් සහගත සිදුවීම් 5ක් මුල්කරගෙන අල්ලස් හෝ දූෂණ විමර්ශන කොමිසම විසින් පාර්ලිමේන්තු මන්ත්‍රී චාමර සම්පත් දසනායක අත්අඩංගුවට ගෙන කොළඹ ප්‍රධාන මහේස්ත්‍රාත් අසංග එස්. බෝදරගම හමුවට ඉදිරිපත් කරනු ලැබීය.
ඉදිරිපත් වූ කරුණු සලකා බැලූ මහේස්ත්‍රාත්වරයා, සැකකරු මේ මස 23 වැනිදා දක්වා රක්ෂිත බන්ධනාගාරගත කිරීමට නියෝග කළේය.
අල්ලස් කොමිසම අධිකරණයට කී දේ
පැමිණිල්ල වෙනුවෙන් පෙනී සිටි අල්ලස් කොමිසමේ නිලධාරීන් කරුණු දක්වමින් හෙළි කළේ චෝදනා ප්‍රධාන ක්ෂේත්‍ර දෙකක් ඔස්සේ ගොනු වී ඇති බවයි:
* පොස්ෆේට් බලපත්‍ර ගනුදෙනුව (රුපියල් ලක්ෂ 81ක්):
විවෘත ප්‍රසම්පාදන ක්‍රියාවලිය බැහැර කරමින් පෞද්ගලික සමාගම් දෙකකට පොස්ෆේට් අපනයන බලපත්‍ර ලබාදීමට භූ විද්‍යා හා පතල් කාර්යාංශයේ අධ්‍යක්ෂ ජනරාල්වරයාට බලපෑම් කළ බවට චෝදනා එල්ල වී තිබේ. ඊට අදාළව D.M. Traders සමාගමෙන් රුපියල් ලක්ෂ 22ක් සහ තිසරු ඉන්ටර්නැෂනල් සමාගමෙන් රුපියල් ලක්ෂ 59ක් සැකකරුගේ පෞද්ගලික ලේකම්වරයාගේ ගිණුමට බැර වී ඇති බවත්, එම මුදල් සැකකරුගේ දේශපාලන කටයුතුවලට යෙදවූ බවට ප්‍රකාශ වී ඇති බවත් කොමිසම පැවසීය.
* මැණික් ව්‍යාපාරිකයන්ගෙන් අල්ලස් ගැනීම (නඩු 3ක්):
බලපෑමකින් තොරව ව්‍යාපාර කරගෙන යාමට ඉඩදීම සඳහා පුන්සිරි ජෙම්ස් ආයතනයෙන් ඉල්ලා ලබාගත් රුපියල් ලක්ෂ 5ක්, සුභාෂ් ජෙම්ස් ආයතනයෙන් ලබාගත් රුපියල් ලක්ෂ 10ක් සහ ප්‍රියන්ත ජෙම්ස් ආයතනයෙන් ලබාගත් රුපියල් ලක්ෂ 2ක් වශයෙන් වෙන වෙනම නඩු 3ක් අධිකරණයට ඉදිරිපත් කර ඇත.
විමර්ශන තවමත් අවසන් නැති බව පෙන්වා දුන් කොමිසම, දූෂණ විරෝධී පනත යටතේ අධ්‍යක්ෂ ජනරාල්වරයාගේ සහතිකයක් ද ඉදිරිපත් කරමින් සැකකරු රක්ෂිත බන්ධනාගාරගත කරන ලෙස ඉල්ලා සිටියේය.
විත්තියෙන් ඉදිරිපත් වූ තර්ක
සැකකරු වෙනුවෙන් පෙනී සිටි ජනාධිපති නීතිඥ කාලිංග ඉන්දතිස්ස අධිකරණය හමුවේ කරුණු දක්වමින් කියා සිටියේ, අදාළ සමාගම් තෝරාගැනීම සිදුකළේ විශේෂ කමිටුවකින් මිස රාජ්‍ය අමාත්‍යවරයා නොවන බවයි.
ඔහුට ඉහළින් කැබිනට් අමාත්‍යවරයෙකු සිටි බවත්, සැකකරු අල්ලස් ලබාගත් බවට කිසිදු සාක්ෂිකරුවෙකු සෘජුව ප්‍රකාශ කර නැති බවත් විත්තිය අවධාරණය කළේය. සැකකරු නිරන්තර වෛද්‍ය ප්‍රතිකාර ලබන පුද්ගලයෙකු බව සඳහන් කරමින් වෛද්‍ය වාර්තා ඉදිරිපත් කළ විත්තියේ නීතිඥවරුන්, ඔහු ඇප මත මුදාහරින ලෙස ඉල්ලා සිටියේය.
ඇප ප්‍රතික්ෂේප වීමට හේතුව
දෙපාර්ශ්වයේ කරුණු දැක්වීම් සලකා බැලූ ප්‍රධාන මහේස්ත්‍රාත්වරයා ප්‍රකාශ කළේ, මෙම අවස්ථාවේදී සැකකරු වරදකරු කිරීමට තරම් කරුණු සලකා බැලීම අවශ්‍ය නොවන බවත්, රක්ෂිත බන්ධනාගාරගත කිරීමට ප්‍රමාණවත් කරුණු පැමිණිල්ල විසින් ඉදිරිපත් කර ඇති බවත්ය.
විශේෂයෙන්ම දූෂණ විරෝධී පනතේ 149 වගන්තිය යටතේ අල්ලස් කොමිසමේ අධ්‍යක්ෂ ජනරාල්වරයාගේ සහතිකයක් ඉදිරිපත් කර ඇති පසුබිමක, ඇප ලබාදීමට නම් "සුවිශේෂී කරුණු" ඉදිරිපත් විය යුතු බව මහේස්ත්‍රාත්වරයා පෙන්වා දුන්නේය. ඉදිරිපත් කළ වෛද්‍ය වාර්තා මඟින් බන්ධනාගාරගත වීමෙන් රෝගී තත්ත්වය උත්සන්න වන බවට සෑහීමකට පත්විය හැකි සාධක තහවුරු නොවීම නිසා ඇප අයදුම ප්‍රතික්ෂේප විය.