මරණ පරීක්ෂණයට අධිකරණයෙන් දැඩි කොන්දේසි
සියඹලාන්ගමුව පරිසර පද්ධතියේ සැරිසැරූ කාවන්තිස්ස හස්තියාගේ අභාවයට හේතුව සොයා බැලීම සඳහා විධිමත් පශ්චාත් මරණ පරීක්ෂණයක් පවත්වා වාර්තාව ඉදිරිපත් කරන ලෙස ගල්ගමුව වැඩබලන මහේස්ත්‍රාත් කාංචනා හතුරුසිංහ මහත්මිය අද නියෝග කළාය.
මීගලෑව වනජීවී කාර්යාලයේ අඩවි ආරක්ෂක ඩබ්ලිව්. වීරකෝන් ඇතුළු නිලධාරී කණ්ඩායම අධිකරණය හමුවේ දැක්වූ කරුණු සලකා බැලූ වැඩබලන මහේස්ත්‍රාත්වරිය, පරීක්ෂණය අවසන් වූ වහාම සිරුර වනජීවී සංරක්ෂණ දෙපාර්තමේන්තුව සතු ඉඩමක මිහිදන් කිරීමට පියවර ගන්නා ලෙස දැනුම් දුන්නාය.
විශේෂයෙන්ම ඉදිරියේදී නෛතික ක්‍රමවේදයකට යටත්ව ඇත්දළ යුගළ සුරක්ෂිතව යළි ලබාගැනීමට හැකිවන පරිදි භූමදානය සිදු කළ යුතු බවත්, එම ස්ථානයට පූර්ණ ආරක්ෂාව සැපයිය යුතු බවත් නියෝගයේ අවධාරණය කෙරිණි. මෙම නඩුව ඉදිරියේදී ගල්ගමුව ප්‍රධාන මහේස්ත්‍රාත් රවීන්ද්‍ර රංජන් බණ්ඩාර හමුවේ කැඳවීමට නියමිතය.
දෙපාර්තමේන්තුවේ ස්ථාවරය සහ ක්‍රියාමාර්ග
මෙම සිදුවීම සම්බන්ධයෙන් වනජීවී අධ්‍යක්ෂ ජනරාල්වරයා ප්‍රකාශ කර ඇත්තේ කිසියම් නිලධාරියකු අතින් රාජකාරිමය වරදක් සිදුව ඇති බව විමර්ශනවලදී තහවුරු වුවහොත් ඔහුට එරෙහිව දැඩි පියවර ගන්නා බවයි.
ක්ෂේත්‍ර නිලධාරීන්ගේ පැය 24 පුරා කැපවීම කෙරෙහි තමන්ට විශ්වාසයක් පවතින මුත්, යම් අත්වැරදීම් සිදුව ඇත්දැයි සොයා බැලීම සාමාන්‍ය පටිපාටියක් බව හෙතෙම පෙන්වා දෙයි.
හස්තියාට අවශ්‍ය ප්‍රතිකාර සැප්තැම්බර් 24 වැනිදා ආරම්භ කළ බවත්, එමඟින් හස්තියා යහපත් සෞඛ්‍ය මට්ටමකට පත්වූ බවත් දෙපාර්තමේන්තු ආරංචි මාර්ග පවසයි.
විශේෂඥ මට්ටමේ විමර්ශනයක් සහ කාර්ය සාධන බලකායක්
අවසන් ගෞරව දැක්වීම සඳහා සියඹලාන්ගමුවට පැමිණි විපක්ෂ නායක සජිත් ප්‍රේමදාස පෙන්වා දුන්නේ මෙම අභාවය පිටුපස ඇති සැබෑ හේතුව නිශ්චය කරගැනීම සඳහා දේශීය මෙන්ම විදේශීය පශු වෛද්‍ය විශේෂඥයින්ගේ දායකත්වය සහිත ස්වාධීන පරීක්ෂණයක් පැවැත්විය යුතු බවයි.
ශ්‍රී ලංකාවේ පිරිමි අලි ගහනයෙන් ඇතුන් බිහිවන්නේ සියයට 7-8 වැනි අතිශය සුළු ප්‍රතිශතයක් බැවින් මෙවැනි දුර්ලභ ජානමය සම්පත් රැකගැනීම දැඩි ජාතික අවශ්‍යතාවක් බව ඔහු අවධාරණය කළේය.
වනජීවී ක්ෂේත්‍රය තාක්ෂණික හා මානව සම්පත්වලින් ශක්තිමත් කිරීම, ජාත්‍යන්තර ආධාර සහිතව වනසතුන් සඳහා විශේෂිත රෝහලක් පිහිටුවීම මෙන්ම අලි-මිනිස් ගැටුම හමුවේ ගොවි ජනතාව සහ සතුන් යන දෙපාර්ශ්වයම ආරක්ෂා වන පරිදි කාර්ය සාධන බලකායක් ක්‍රියාත්මක කිරීමේ වැදගත්කම ඔහු වැඩිදුරටත් මතු කළේය.
සබැඳි පුවත් වාර්තා දෙකක් :
කාවන්තිස්ස හස්තිරාජයා දැයෙන් සමුගනී: අලි–මිනිස් ගැටුමේ ඛේදවාචකය
කාවන්තිස්ස ඇතාට ප්‍රතිකාර ඇරඹීම පමා ඇයි ? - ක්ෂේත්‍ර අර්බුදය මෙන්න