ශ්‍රී ලංකාව මෙතෙක් විදේශ රටවල් සමඟ අත්සන් තබා ඇති ද්විපාර්ශ්වික නිදහස් වෙළඳ ගිවිසුම් (FTAs) රටට උපරිම වාසි සැලසෙන පරිදි යළි සමාලෝචනය කිරීමට රජය පියවර ගෙන තිබේ.
විදේශ කටයුතු අමාත්‍ය විජිත හේරත් ඉදිරිපත් කළ නව නිදහස් වෙළඳ ගිවිසුම් ප්‍රතිපත්ති රාමුවට අමාත්‍ය මණ්ඩල අනුමැතිය හිමිව ඇති අතර, මින් ඉදිරියට බිහිවන සෑම වෙළඳ එකඟතාවක්ම මෙම නව ප්‍රතිපත්තියට යටත් කෙරේ.
දේශීය ව්‍යාපාරිකයන් රැකගන්න කමිටු දෙකක්
මෙම ප්‍රතිපත්තිමය වැඩපිළිවෙළ අවසන් තීරණයක් දක්වා රැගෙන යාමට රාජ්‍ය සහ පෞද්ගලික අංශ ඒකාබද්ධ වූ විශේෂ කමිටු දෙකක් පත් කෙරේ.
ජාතික මට්ටමේ වෙළඳ සංගම් නියෝජිතයන්ගෙන් සමන්විත කමිටුවක් සහ වෙළඳ ප්‍රතිපත්ති උපදේශක කමිටුවක් ඊට අයත්ය. මෙරට සුළු හා මධ්‍ය පරිමාණ කර්මාන්තකරුවන්ගේ අයිතිවාසිකම් රැකගනිමින්, ජාත්‍යන්තර වෙළඳපොළ තුළ ලාංකීය භාණ්ඩ සඳහා වැඩි ඉඩක් දිනාගැනීම මෙම කමිටුවල ප්‍රධාන අරමුණයි.
කලාපීය ප්‍රබලයන් සතර දෙනාගේ ගිවිසුම් මේසයට
ඉන්දියාව, පාකිස්තානය, සිංගප්පූරුව සහ තායිලන්තය සමඟ දැනට පවතින නිදහස් වෙළඳ ගිවිසුම් සතරම මෙම නව ක්‍රමවේදය යටතේ යළි විමර්ශනයට ලක් කෙරේ.
2005 වසරේ සිට බලාත්මක පාකිස්තාන ගිවිසුම, 2018 වසරේ දැඩි කතාබහකට ලක්වූ සිංගප්පූරු ගිවිසුම මෙන්ම මෑතකදී අත්සන් තැබූ තායිලන්ත ගිවිසුමද මෙලෙස යළි සාකච්ඡා කෙරෙනු ඇත.
පවතින නීතිමය කොන්දේසි රටේ ආර්ථිකයට වඩාත් ඵලදායී වන පරිදි සංශෝධනය කරගැනීමට අවකාශ පවතින බව විදේශ අමාත්‍යවරයා පෙන්වා දෙයි.
මැදපෙරදිගින් මතුවන නව ආර්ථික ඉසව්
පවතින ගිවිසුම් යාවත්කාලීන කිරීමට සමගාමීව, බටහිර ආසියානු කලාපයේ බලවත් ආර්ථිකයන් වන ඕමානය සහ එක්සත් අරාබි එමීර් රාජ්‍යය (UAE) සමඟ නව විස්තීර්ණ ආර්ථික හවුල්කාරිත්ව ගිවිසුම් (CEPA) දෙකකට එළඹීමටද කැබිනට් අනුමැතිය හිමිව තිබේ.
දකුණු ආසියානු (SAFTA) සහ ආසියා-පැසිෆික් (APTA) කලාපීය බහුපාර්ශ්වික වෙළඳ වාසි මෙන්ම, එක්සත් රාජධානිය ලබාදෙන සංවර්ධනය වෙමින් පවතින රටවල වෙළඳ සහන ක්‍රමවේදය (DCTS) උපරිමයෙන් ප්‍රයෝජනයට ගැනීමටද රජය සැලසුම් කර ඇත.