අනවසරයෙන් ඡායාරූප බැලූ චෝදනාවට මෙටා සමාගමට දැවැන්ත දඩයක්

ඔබේ ජංගම දුරකථනයේ ගැලරිය තුළ ඇති පෞද්ගලික ඡායාරූප සහ වීඩියෝ දෙස, ඔබේ නිසි අවසරයකින් තොරව තාක්ෂණික සමාගමක් බලා සිටින බව දැනගතහොත් ඔබට කුමක් සිතේවිද?

ෆේස්බුක්, ඉන්ස්ටග්‍රෑම් සහ වට්ස්ඇප් යන ලොව ප්‍රමුඛතම සමාජ මාධ්‍ය ජාලයන්හි හිමිකාරීත්වය දරන 'මෙටා' (Meta) සමාගමට එරෙහිව ඉතාලි දත්ත ආරක්ෂණ අධිකාරිය විසින් යුරෝ මිලියන 805ක (ඇමරිකානු ඩොලර් මිලියන 887ක පමණ) දැවැන්ත දඩයක් නියම කර තිබේ.

ඇන්ඩ්‍රොයිඩ් (Android) ජංගම දුරකථන භාවිත කරන්නන් මිලියන 20කට ආසන්න පිරිසකගේ පෞද්ගලික ඡායාරූප වෙත නිසි අවසරයකින් තොරව පිවිසීමේ චෝදනාව මත මෙම දැඩි දඬුවම පනවා ඇත.

සිදුවූයේ කුමක්ද?

අප ෆේස්බුක් (Facebook) යෙදුම භාවිත කරන විට, අපේ දුරකථන ගැලරියේ ඇති ඡායාරූප පළ කිරීම සඳහා ස්වයංක්‍රීයව යෝජනා (Suggestions) ඉදිරිපත් වන ආකාරය ඔබ දැක ඇති.

ඉතාලි නියාමකයින් පෙන්වා දෙන්නේ මෙම පහසුකම ක්‍රියාත්මක කිරීමට මෙටා සමාගම පරිශීලකයින්ගෙන් වෙනම අවසරයක් ලබාගෙන නොමැති බවයි.

යෙදුම ස්ථාපනය කිරීමේදී ලබාගන්නා පොදු අවසරය පමණක් පදනම් කරගනිමින්, පරිශීලකයින්ගේ ඡායාරූප ගැලරිය පිරික්සීමට සමාගම කටයුතු කර ඇති බවට එම අධිකාරිය චෝදනා කරයි.

ඉතාලි බලධාරීන්ගේ නියෝගය කුමක්ද?

මෙය ඉතාලි බලධාරීන් විසින් තාක්ෂණික දැවැන්තයෙකුට එරෙහිව පැනවූ විශාලතම දඩ මුදල්වලින් එකකි.

දඩ මුදලට සමගාමීව, දින 60ක් ඇතුළත අදාළ ස්වයංක්‍රීය පහසුකම අක්‍රිය කර, ඒ සඳහා පරිශීලකයින්ගෙන් වෙනම අවසරයක් ලබාගන්නා ලෙස ඉතාලි බලධාරීන් මෙටා සමාගමට නියෝග කර තිබේ.

යෙදුම යාවත්කාලීන (Update) නොකළ පරිශීලකයින්ගේ දත්ත තවදුරටත් මෙම අවදානමට ලක්ව තිබීමත්, පරීක්ෂණ සඳහා මෙටා සමාගම නිසි සහයෝගයක් ලබා නොදීමත් දඩ මුදල මෙතරම් ඉහළ යාමට බලපෑ බව නියාමන අධිකාරිය සඳහන් කරයි.

මෙටා සමාගමේ ස්ථාවරය

බීබීසී (BBC) පුවත් සේවය වෙත අදහස් දක්වමින් මෙටා සමාගමේ ප්‍රකාශකයෙකු සඳහන් කර ඇත්තේ තමන් මෙම තීරණයට එරෙහිව අභියාචනයක් ඉදිරිපත් කරන බවයි.

"නියාමකයින් කරුණු තක්සේරු කර ඇති ආකාරය සහ නීතිය ක්‍රියාත්මක කර ඇති ආකාරය සමඟ අපි දැඩි ලෙස එකඟ නොවෙමු. මෙය පරිශීලකයින්ට ඡායාරූප පළ කිරීම පහසු කරවන සරල පහසුකමක් පමණයි. ඕනෑම අයෙකුට තම දුරකථනයේ 'Settings' හරහා ඕනෑම වේලාවක මෙම අවසරය වෙනස් කළ හැකියි."

ඔබේ දුරකථනයේ ඡායාරූප ආරක්ෂා කරගන්නේ කෙසේද?

පරිශීලක දත්ත අවභාවිතය සම්බන්ධයෙන් මෙටා සමාගම ජාත්‍යන්තර නීතිය ඉදිරියේ අර්බුදයට ලක්වූ පළමු අවස්ථාව මෙය නොවේ.

පසුගිය මාසයේදී ඇමරිකාවේ නිව් මෙක්සිකෝ ප්‍රාන්තයේ විනිසුරුවරයෙකු විසින් මෙටා සමාගමට එරෙහිව ඇමරිකානු ඩොලර් බිලියන 25ක ඓතිහාසික දඩයක් නියම කළේ පරිශීලක දත්ත හසුරුවන ආකාරය පිළිබඳව මහජනතාව නොමඟ යැවීමේ චෝදනාව මතයි.

ශ්‍රී ලංකාවේ සිටින ඔබත් ඇන්ඩ්‍රොයිඩ් දුරකථනයක් භාවිත කරන්නෙකු නම්, Settings > Apps > Facebook > Permissions > Photos and videos වෙත පිවිස ඔබ ලබා දී ඇති අවසරයන් සීමා කිරීමෙන් (Select limited photos හෝ Don't allow) ඔබේ පෞද්ගලික ඡායාරූපවල ආරක්ෂාව තහවුරු කරගත හැකිය.


වැඩිදුර තොරතුරු ඇතුළත් මූලාශ්‍ර සබැඳිය
BBC News වාර්තාව: