වෛද්‍යවරුන්ගේ ආර්ථික ගැටලු සඳහා විසදුම් ලබාදීම සඳහා ඉදිරිපත් කළ යෝජනාවලිය ක්‍රියාත්මක කිරීම, ශ්‍රී ලංකා වෛද්‍ය සේවාව සඳහා අනන්‍ය වූ වැටප් දීමනා ලබාදිම, අමතර රාජකාරී දිමනාව ස්ථාවර දීමනාවක් ලෙස වැටුපට එක්කිරීම ඇතුලු ඉල්ලිම් 5 ක් මුල් කරගනිමින් මෙම වර්ජනය ක්‍රියාත්මක කරන බව එහි ලේකම් වෛද්‍ය ප්‍රභාත් සුගතදාස පැවසීය.
නිදහස් සෞඛ්‍ය සේවාව සහ වෛද්‍යවරුන්ගේ ගැටලු විසඳීමට සෞඛ්‍ය අමාත්‍යාංශය ලබාදුන් එකඟතාව ක්‍රියාත්මක කිරීමට අසමත්වීම හේතුවෙන් මෙලෙස වෘත්තීය ක්‍රියාමාර්ගයක නිරතවන බව ඔහු සඳහන් කළේය.
දිවයින පුරා සියලු රෝහල්වල මෙම වර්ජන ක්‍රියාමාර්ගය ක්‍රියාත්මක වන බවත් මහරගම අපේක්ෂා රෝහල රිජ්වේ ආර්යා ළමා රෝහල, පේරාදෙණිය සිරිමාවෝ බණ්ඩාරනායක ළමා රෝහල, කාසල් විදියේ කාන්තා රෝහල, ද සොයිසා කාන්තා රෝහල ඇතුලු මාතෘ සහ ළමා රෝහල් වකුගඩු රෝහල් සහ පිළිකා රෝහල්වල මෙම වැඩවර්ජනය ක්‍රියාත්මක නොවන බවත් ඔහු පැවසීය.
මේ වන විට රට පුරා සියලුම රෝහල්වල සාමාන්‍ය සහ දෛනික ප්‍රතිකාර කටයුතු සම්පූර්ණයෙන් ඇනහිට ඇති අතර, හදිසි සහ අත්‍යාවශ්‍ය ප්‍රතිකාර සේවාවන් පමණක් ක්‍රියාත්මක වේ.
