අනෙක් 27 දෙනා තවමත් ප්‍රතිකාර ලබන අතර ඔවුන්ගෙන් ද කිහිප දෙනෙකු හෙට වනවිට මුදා හැරිමට හැකිවෙතැයි අපේක්ෂා කරණ බවද රෝහල් ප්‍රකාශකයා පැවසිය.
රෝහලෙන් පිටත් වීමේ අවසරය ලත් නාවිකයන් පස් දෙනා ඉරාන තානාපති කාර්යාලයේ මැදිහත් විමෙන් නාවික හමුදාව මගින් වැලිසර නාවික හමුදා රෝහලට ගෙන යාමට නියමිතව තිබිණ.
නෞකාව ත්‍රිකුණාමලය වරාය ආසන්නයට රැගෙන යාමටත් සැලසුම්..
ඉරානයට අයත්, IRINS bushehr නෞකාවේ සිටි 204 දෙනෙකු වැලිසර නාවික හමුදා කඳවුරට රැගෙන ගිය බව නාවික හමුදාව පවසයි.
ඔවුන් කොළඹ වරායට රැගෙන ඒමෙන් අනතුරුව, වැලිසර නාවික හමුදා කඳවුරට රැගෙන ගිය බව නාවික හමුදා මාධ්‍ය ප්‍රකාශක කමාන්ඩර් බුද්ධික සම්පත් සඳහන් කළේ ය.
නෞකාවේ කාර්ය මණ්ඩලය තවමත් එහි සිටින බවද නාවික හමුදා මාධ්‍ය ප්‍රකාශකවරයා සඳහන් කරන ලදි.
ඔවුන් කොළඹ වරායට රැගෙන විත් වැලිසර නාවුක හමුදා කඳවුරට යොමු කිරීමට අවශ්‍ය කටයුතු කරමින් සිටින බව ඔහු වැඩිදුරටත් ප්‍රකාශ කළේ ය.
ඔහු සඳහන් කළේ ශ්‍රී ලංකා නාවික හමුදා කාර්ය මණ්ඩලයක් මගින් නෞකාව අද, ත්‍රිකුණාමලය වරායට රැගෙන යාමට නියමිත බවය.
IRINS bushehr නෞකාව, මෙරටට පැමිණීමට අවසර ඉල්ලා තිබුණි.
ඒ අනුව මානුෂීය ප්‍රතිපත්තියක සිට ඔවුන් මෙරටට ඇතුලු කරගැනීමට තීරණය කළ බව, ඊයේ (05) රාත්‍රියේ ජනාධිපති ලේකම් කාර්යාලයේදී විශේෂ මාධ්‍ය හමුවක් පවත්වමින් ජනාධිපති අනුර කුමාර දිසානායක සඳහන් කරන ලදි.
