"රසපරීක්ෂක කාර්යාලයේ පුරප්පාඩු 118ක් තියාගෙන වැඩ බෑ; ශුද්ධ බර වෙනුවට දළ බරෙන් උසාවිය තෝරන අලුත් සංශෝධනයක් ගේනවා" - වත්මන් අධිකරණ ඇමති හර්ෂණ නානායක්කාරගෙන් පාර්ලිමේන්තුවේදී ප්‍රතිචාරයක්
මීගමුව බන්ධනාගාරයේ මෑතකදී උද්ගත වූ ලේවැකි ගැටුමට සහ මෙරට සිරගෙවල්වල පවතින අතිශය දරුණු තදබදයට ප්‍රධානතම හේතුවක් වී ඇති 2022 අංක 41 දරන සංශෝධිත මත්ද්‍රව්‍ය පනතේ "54 වැනි වගන්තිය" වහාම වෙනස් කළ යුතු බව හිටපු අධිකරණ අමාත්‍ය, ජනාධිපති නීතිඥ අලි සබ්රි පවසයි.
දැනට පවතින නීතිමය ක්‍රමවේදය හේතුවෙන් සුළු මත්ද්‍රව්‍ය ප්‍රමාණයක් ළඟ තබා ගන්නා පරිශීලකයන් පවා ඇප ලබාගත නොහැකිව වසර එකහමාරකට ආසන්න කාලයක් රක්ෂිත බන්ධනාගාර ගතව සිටීමට සිදුවීම බරපතළ මානුෂීය සහ පරිපාලනමය අර්බුදයක් බව ඔහු පෙන්වා දෙයි.
අලි සබ්රි යෝජනා කරන ඇප සහ පුනරුත්ථාපන සහනය
'දිවයින' පුවත්පත සමඟ අදහස් දක්වමින් හිටපු අමාත්‍යවරයා සඳහන් කළේ, වත්මන් තදබදය වැළැක්වීම සඳහා ඇප ලබාදීමේ සීමාවන් ලිහිල් කළ යුතු බවයි.
ග්‍රෑම් 2 සීමාව ග්‍රෑම් 5 දක්වා ඉහළට:
දැනට මත්ද්‍රව්‍ය ග්‍රෑම් 02ට අඩු නම් පමණක් මහෙස්ත්‍රාත් අධිකරණයෙන් ඇප දිය හැකි අතර, එම සීමාව ග්‍රෑම් 05 දක්වා වැඩි කළ යුතුය. තමා ඇමති ධුරයෙන් ඉවත්වන විට ග්‍රෑම් 5ට අඩු නම් මහෙස්ත්‍රාත් අධිකරණයෙන් ද, ග්‍රෑම් 5ත් 10ත් අතර මහාධිකරණයෙන් ද, ග්‍රෑම් 100ට වැඩි නම් අභියාචනාධිකරණයෙන් ද ඇප දිය හැකි පරිදි පනත සකස් කරමින් සිටි බව ඔහු හෙළි කළේය.
සිරගත කිරීම වෙනුවට පුනරුත්ථාපනය:
මත්ද්‍රව්‍යවලට ඇබ්බැහි වූවන් සිරගෙවල්වල ලැගුම් කරවනු වෙනුවට ඔවුන්ව සෘජුවම පුනරුත්ථාපන මධ්‍යස්ථාන වෙත යොමු කිරීමේ අවශ්‍යතාව ඔහු අවධාරණය කරයි.
රසපරීක්ෂක කාර්යක්ෂමතාව:
තමා 2020 ධුරය භාරගන්නා විට 29,000ක් වූ රැඳවියන් පිරිස සේවා මුර දෙකක් (Shifts) දමා රසපරීක්ෂක වාර්තා කඩිනම් කිරීම හරහා 18,000 දක්වා අඩු කළ බවත්, දැනුත් නිලධාරීන්ට අතිකාල දීමනා දී එම ක්‍රමයම ක්‍රියාත්මක කළ යුතු බවත් ඔහු පැවසීය.
වත්මන් ඇමති හර්ෂණ නානායක්කාරගේ පාර්ලිමේන්තු ප්‍රකාශය
මීගමුව බන්ධනාගාරයේ ඇති වූ තත්ත්වය පිළිබඳව පාර්ලිමේන්තුවේදී විශේෂ ප්‍රකාශයක් කරමින් වත්මන් අධිකරණ අමාත්‍ය හර්ෂණ නානායක්කාර ද පිළිගත්තේ 2022 විෂ වර්ග, මත්ද්‍රව්‍ය සහ අබිං පනතේ සංශෝධන සිරගෙවල් පිරීමට සෘජුවම බලපා ඇති බවයි.
වසර එකහමාරක ප්‍රමාදය:
පනත අනුව ග්‍රෑම් 2ට වැඩි නඩුවල ඇප බලය මහාධිකරණයෙන් ඉවත් කර අභියාචනාධිකරණයට පැවරීම නිසා රට වටේම සිටින ජනතාවට කොළඹ ඒමට සිදුව ඇත. රසපරීක්ෂක වාර්තාව එනතෙක් මත්ද්‍රව්‍යවල "ශුද්ධ බර" (Pure weight) සෙවිය නොහැකි බැවින් ඊට වසරක් ද, නීති කටයුතුවලට තවත් මාස 6ක් ද වශයෙන් වසර එකහමාරක් සැකකරුවන් රිමාන්ඩ් වේ. අප බලයට එන විට රසපරීක්ෂක දෙපාර්තමේන්තුවේ පුරප්පාඩු 118ක් පවතී.
ආණ්ඩුවේ නව විසඳුම:
රසපරීක්ෂක වාර්තාව එනතෙක් බලා නොසිට, මත්ද්‍රව්‍යවල "ශුද්ධ බරට" නොව පොලීසිය අත්අඩංගුවට ගන්නා "දළ බරට" (Gross weight) අනුව ඇප සඳහා උසාවිය තෝරා ගැනීමට හැකි වන පරිදි නව සංශෝධනයක් වහාම ගෙන ඒමට රජය කටයුතු කරමින් සිටී. ඊට අමතරව පවතින බන්ධනාගාරවල ඉඩකඩ වැඩි කිරීමට නව ඉදිකිරීම් ද ආරම්භ කර ඇත.
පොලිස් අත්අඩංගුවට ගැනීම්වලදී සිදුවන ඇතැම් අනිසි ක්‍රියාකාරකම් සහ රසපරීක්ෂක වාර්තා ප්‍රමාදය නිසා නිර්දෝෂී හෝ සුළු වැරදිකරුවන් දීර්ඝ කාලයක් සිරගතව සිටීම නිසා පද්ධතියම බිඳ වැටී ඇති බැවින්, මෙම නීතිමය සංශෝධන කඩිනම් කිරීම අත්‍යවශ්‍ය වී තිබේ.
