- මනෝ, හකීම්, රිෂාඩ්, තොණ්ඩමාන් සහ සුමන්තිරන් උතුරු-නැගෙනහිර සහ මලයගම් පොදු අර්බුද වෙනුවෙන් හවුල් පෙරමුණක් හදයි
නව ව්‍යවස්ථාව, ඉඩම් ආරවුල් සහ සුළුතර අයිතීන් ඇතුළු ක්ෂේත්‍ර 4ක එකඟතාවක්; කොළඹ පැවැති විශේෂ සාකච්ඡාවෙන් පසු ජාතික ජනබලවේග ආණ්ඩුවට සෘජු දේශපාලන බලකිරීමක්
බලයට පත්වී වසරක් ඇතුළත පළාත් සභා මැතිවරණය පවත්වන බවට ජාතික ජනබලවේග ආණ්ඩුව ලබා දී තිබූ ප්‍රධාන මැතිවරණ ප්‍රතිඥාව මෙතෙක් ඉටු කිරීමට අපොහොසත් වී ඇතැයි චෝදනා කරමින්, ප්‍රමාදයකින් තොරව වහාම ඡන්දය පවත්වන ලෙස බල කිරීමට මෙරට ප්‍රධාන පෙළේ දෙමළ සහ මුස්ලිම් දේශපාලන පක්ෂ 6ක් ඒකාබද්ධව තීරණය කර තිබේ.
කොළඹදී අද (ජූලි 13) පැවැති විශේෂ සාකච්ඡාවකින් අනතුරුව පැවැත්වූ ඒකාබද්ධ මාධ්‍ය හමුවේදී උතුර, නැගෙනහිර සහ මලයගම් (කඳුකර) කලාපීය ජනතාව මුහුණ දෙන පොදු ගැටලුවලදී පොදු වේදිකාවක් ඔස්සේ එක්ව සටන් කිරීමට මෙම පක්ෂ නායකයෝ නිල වශයෙන් ගිවිස ගත්හ.
නව සන්ධානගත වීමේ දේශපාලන හැඩය සහ පක්ෂ
මෙම ඒකාබද්ධ මැදිහත් වීම සඳහා පාර්ලිමේන්තුවේ සහ ඉන් පිටත සිටින ප්‍රධානතම සුළුතර පක්ෂ 6ක නායකයින් සහ ජ්‍යෙෂ්ඨ නියෝජිතයින් එක්ව සිටීම සුවිශේෂී දේශපාලන පෙරළියකි.
එක්වූ ප්‍රධාන බලවේග:
සමස්ත ලංකා මහජන කොංග්‍රසය (ACMC),
ලංකා කම්කරු කොංග්‍රසය (CWC),
ප්‍රජාතන්ත්‍රවාදී දෙමළ ජාතික සන්ධානය (DTNA),
ඉලංකෙයි තමිල් අරසු කච්චි (ITAK),
ශ්‍රී ලංකා මුස්ලිම් කොංග්‍රසය (SLMC) සහ
දෙමළ ප්‍රගතිශීලී සන්ධානය (TPA) මෙයට ඇතුළත් වේ.
සන්ධාන සීමා බිඳවැටීම:
විපක්ෂ නායක සජිත් ප්‍රේමදාස ගේ සමගි ජන බලවේගය සන්ධානයේ ප්‍රධාන කොටස්කරුවන් වන මනෝ ගනේෂන්, රවුෆ් හකීම් සහ රිෂාඩ් බදියුදීන් යන නායකයන් මෙන්ම, එක්සත් ජාතික පක්ෂයෙන් (රනිල් වික්‍රමසිංහ පිලෙන්) පාර්ලිමේන්තුවට තේරී පත් වූ ලංකා කම්කරු කොංග්‍රසයේ මහලේකම් ජීවන් තොණ්ඩමාන් ද සිය දේශපාලන සීමා පසෙකලා මෙම ඒකාබද්ධ සුළුතර පෙරමුණට එක්ව සිටිති.
ප්‍රගතියක් නැති පොරොන්දු:
මාධ්‍ය වෙත අදහස් දැක්වූ හිටපු පාර්ලිමේන්තු මන්ත්‍රී එම්. ඒ. සුමන්තිරන් අවධාරණය කළේ, ආණ්ඩුව වසරක් ඇතුළත පළාත් සභා ඡන්දය දෙන බවට පොරොන්දු වුවද මේ දක්වා ඒ සඳහා කිසිදු ප්‍රායෝගික හෝ සැලකිය යුතු ප්‍රගතියක් පෙන්වා නැති බවයි.
උපායමාර්ගික ක්ෂේත්‍ර 4:
ඉදිරියේදී මෙම පක්ෂ 6 පොදු වේදිකාවක් හරහා අඛණ්ඩව ක්‍රියාත්මක වීමට ක්ෂේත්‍ර 4ක් ඔස්සේ ප්‍රතිපත්තිමය එකඟතාවකට පැමිණ ඇත.
* ප්‍රමාදයකින් තොරව වහාම පළාත් සභා මැතිවරණය පැවැත්වීම.
* සියලු ප්‍රජාවන්ගේ අයිතිවාසිකම් තහවුරු කෙරෙන නව ආණ්ඩුක්‍රම ව්‍යවස්ථාවක් බලාත්මක කිරීම.
* උතුරු-නැගෙනහිර සහ කඳුකරයේ ජනතාව මුහුණ දෙන නිදන්ගත ඉඩම් ගැටලුවලට විසඳුම් සෙවීම.
* සුළුතර ජනකොටස්වලට බලපාන සංවේදී දේශපාලන ගැටලු අන්‍යෝන්‍ය සංවාදයෙන් විසඳා ගැනීම.
