'නිදහස උදෙසා කාන්තා ව්‍යාපාරයේ' සංවිධායක ලේකම් හේමමාලි අබේරත්න පැවසුවාය.
" තමන් පීඩාවට පත් වෙන ඕනෑම මොහොතක පීඩිත පන්තිය තමන්ගේ පීඩාවට එරෙහිව සඨන් වැදුණා. ඒක තමයි ඉතිහාසයේ ඇත්ත. එදා 71 අරගලයට පණ පොවපු අපේ ආදරණීය සහෝදරවරු සහෝදරියෝ සඨන් කළෙත් පීඩාවට එරෙහිව. ඔවුන් සඨන් කලේ මේ කොල්ලකාරී ආර්ථික ක්‍රමයට එරෙහිව. අන්න ඒ නිසයි අපි කියන්නේ 71 අරගලය කියන්නේ ශ්‍රේෂ්ඨ අරගලයක් කියලා.''
ඇය එබව සඳහන් කර සිටියේ, 1971 අරගලයට වසර 55ක් සැපිරීම නිමිත්තෙන් පෙරටුගාමී සමාජවාදී පක්ෂය විසින් සංවිධානය කරන අප්‍රේල් විරු සමරුව අමතමිනි.
"අධිරාජ්‍යවාදයට විනාශය - සමාජවාදයට විජයග්‍රහණය" තේමාවෙන් අද, අප්‍රේල් 5 පස්වරුවේ කොළඹ නවනගර ශාලාවේදී පැවති එම සමරු උත්සවයට 71 අප්‍රේල් අරගලයේ පරම්පරාවේ සිට පරම්පරා කිහිපයක ක්‍රියාධරයන් සහභාගී සිටියහ.
සමරු වැඩසටහනට විශේෂ සමරු දේශනයක් සහ සමරු ගීත ප්‍රසංගයක් ඇතුළත් විය.
එහිදී තව දුරටත් අදහස් දැක්වූ නිදහස උදෙසා කාන්තා ව්‍යාපාරයේ සංවිධායක ලේකම් හේමමාලි අබේරත්න,
''සමාජවාදය නැත්තම් මරණය''
අද අපි අධිරාජ්‍යවාද්‍යට විනාශය සමාජවාදයට විජයග්‍රහණය කියන තේමාවෙන් මේ 55 වෙනි අප්‍රේල් විරු සමරුව පවත්වන්නේ තීරණාත්මක මොහොතක. අද අධිරාජ්‍යවාදීන් ඉතිහාසයේ කවරදාටත් වඩා මෙලෙච්ඡ උපක්‍රම භාවිතා කරමින් භූමිය කොල්ල කන්න, ශ්‍රමය කොල්ලකන්න, වෙළඳපළ බලය අත්පත්කරගන්න උත්සහ කරමින් ඉන්නේ. ගාසා තීරයෙන් පටන් ගත්තම, යුක්‍රේනය, ලිබියාවේ ඉඳලා ඉරානය දක්වම අධිරාජ්‍යවාදී උවමනාවන් වෙනුවෙන් ලේ වැගිරීම් වෙනවා. දහස් ගණං අහිංසක ජනතාව මරා දැමෙනවා. මේ සියල්ල වෙන්නේ ඇමරිකාව, ඊශ්‍රායලය ඇතුළු අධිරාජ්‍යවාදීන්ගේ උවමනාවන් නිසා. දැන් මේක හොඳටම ඇති. තෙල් සම්පත කොල්ලකන්න, ඛනිජ නිධි කොල්ලකන්න තියෙන කෑදරකමට පොඩි දරුවන්ගේ ඔළුව උඩට බෝම්බ අතහරින මේ නරුම ක්‍රමය අපි අවසන් කරන්න ඕන.
මේ නරුම බල වියරුව අවසන් කරන්න පුලුවන් එකම එක පාරක් විතරයි අපි ඉස්සරහා තියෙන්නේ. ඒ තමයි සමාජවාදය. ඒ නිසා තමයි එදා කියුබානුවන් අභිමානයෙන් ලෝකයට පේන්න ලිව්වේ සමාජවාදය නැත්තම් මරණය කියලා. ඔව් අපිත් අද හඬගාලා කියන්නේ ඒ අභිමානවත් වාක්‍යම තමයි. අනේ කෑ ගහන්න එපා ඇමරිකාව අපිටත් බෝම්බ ගහයි කියලා නිවට නියාලු වෙලා කොන්දක් පණ නැතුව ඉන්න ආණ්ඩුවක් අද අපිට තියෙන්නේ. කණගාටුවට කාරණය තමයි අද මේ ආණ්ඩුව නියෝජනය කරන ජනතා විමුක්ති පෙරමුණේ සහෝදරවරු තමයි එදා අධිරාජ්‍යවාද්‍යට එරෙහිව 71 අරගලය මෙහෙයව්වේ. එදා සමාජවාදය නැත්තම් මරණය කියලා සඨන් කරපු ඒ සහෝදරවරුන්ගේ දේශපානලන අභිලාශයන් සියල්ල මේ ආණ්ඩුව පාවා දීලා ඉවරයි.
''අනුර - මෝදි හොර ගිවිසුම් අත්සන් කර අදට වසරයි!''
ගිය අවුරුද්දේ අප්‍රේල් 5 වෙනිදා මේ ආණ්ඩුව ඉන්දියාව එක්ක හොර ගිවිසුම් ගණනාවක් අත්සන් කළා. ඒ ගිවිසුම්වල තියෙන්නේ අපේ රටේ ආරක්ෂාව, බලශක්ති ස්වාධීපත්‍ය, නිදහස් සෞඛ්‍යය අයිතිය වනසන යෝජනා. අනිත් පැත්තෙන් ආණ්ඩුව ඇමරිකානු න්‍යාපත්‍රයක් තමයි කර තියාගෙන යන්නේ. ගාසා තීරයේ ළමයි මරණකොට, ඉරානයේ පාසල්වලට බෝම්බ ගහනකොට. ඒවට එරෙහිව ආණ්ඩුව එක වචනයක් කිව්වේ නෑ. අඩුමතරමින් සමාජවාදී කියුබාවට සම්බාධක දමමින් කියුබාව ආක්‍රමණය කරන්න ඇමරිකාව කරනු ලබන අයුක්ති සහගත මැදිහත්වීම් හෙළා දකින්නවත් බැරි තරමට මේ ආණ්ඩුව ඇමරිකානු ගැති වෙලා. මේක ඉතාම අවාසනාවන්ත තත්වයක්.
හෘද සාක්ෂියට එකඟව මේ නරුමත්වය ඉදිරියේ නිහඬව ඉන්න අපිට පුලුවන් කමක් නැහැ. ඒ නිසා එදා 71 විරුවන් ගිය පාරේ යන්න අපි මොහොතකටවත් පසුබට වෙන්නේ නැහැ. මේ අධිරාජ්‍යවාදී බල වියරුවට එරෙහිව ජාත්‍යන්තර වශයෙන් වැඩකරන පන්තියේ ජනතා බලයක් ගොඩනගන්න අපි සූදානම්. අපි සඨන් කරන්නේ ඒ වෙනුවෙන්. අපි මේ රටේ සියලු ජනතාවටත් ආරාධනා කරනවා මේ අරගලය වටා එකතුවෙමු කියලා. "
''අපි මේ අවුරු 55කට පස්සෙත් 71 අරගලය ගැන සිහිපත් කරන්නේ ඇයි ?''
| පෙරටුගාමී සමාජවාදී පක්ෂයේ සංවිධායක ලේකම් සේනාධීර ගුණතිලක
මෙම සමරුවේදී අදහස් දැක්වූ පෙරටුගාමී සමාජවාදී පක්ෂයේ සංවිධායක ලේකම් සේනාධීර ගුණතිලක,
" ඇයි අපි මේ අවුරු 55කට පස්සෙත් 71 අරගලය ගැන සිහිපත් කරන්නේ. එදා 71 අරගලයට සම්භන්ධ වුණු අපේ සහෝදරවරු සඨන් කළේ අධිරාජ්‍යවාද්‍යට විරුද්ධව. " අධිරාජ්‍යවාද්‍යට විනාශය සමාජවාදයට විජයග්‍රහණය" කියන එක තමයි ඔව්න්ගේ තේමව වුණේ. අද අපි ජීවත් වෙන්නේ ඉතිහාසයයේ කවරදාටත් වඩා අධිරාජ්‍යවාදී නරුමත්වයෙන් බැට කන යුගයක. අන්න ඒ නිසා තමයි 71 අරගලය අදටත් අපිට දේශපානලනිකව වැදගත් වෙන්නේ.
ඔවුන් එදා ගත්තු දේශපානලනික ක්‍රියාමාර්ග ගැන මොනතරම් විවේචන තිබුණත් ඒ සහෝදරවරුන්ගේ අභිලාශයන්ගේ උදාර බව එක බිඳකින්වත් ඒ නිසා අඩු වෙන්නේ නැහැ. මොකද එදා තමන්ගේ ජීවිතේ පරදුවට තියලා මුළු මහත් සමාජයක් වෙනුවෙනුයි ඒ සහෝදරවරු සඨන් වැදුණේ.
අපි දන්නවා මේ අරගලයට නායකත්වය දුන්නේ, මේ අරගලය වටා එකතු වුණේ රෝහණ විජේවීර සහෝදරයා නායකත්වය දුන්නු ජනතා විමුක්ති පෙරමුණ විතරක් නෙවෙයි. මේ කොල්ලකාරී ආර්ථික ක්‍රමය හමුවේ පීඩාවට පත් වෙලා හිටපු මුළු මහත් සමාජයක්ම 71 අරගලය එක්ක ආධ්‍යාත්මිකව බැඳිලා හිටියා. එදා 71 සහෝදරවරුන්ට තිබුණේ එකම අරමුණයි. ඒ තමයි රාජ්‍ය බලය අත්පත් කරගැනීමේ අරමුණ. එතනින් මෙහා ව්‍යාජ විසඳුම් ඔව්න්ට තිබුණේ නැහැ.
අද පැලවත්තේ ටිල්වින්ලා අවධි තුලින් විප්ලවය කරන්න පුලුවන් වගේ අතිෂයින් මෝඩ න්‍යායයික අදහස් පතුරවමින් යනවා. අපි ඔවුන්ට කියනවා නැවත මාක්ස්ගේ ලෙනින්ගේ ඉගැන්වීම් කියවගන්න කියලා. අපිට අවධි කතාවක් නැහැ. විප්ලවවාදියාට තියෙන්න ඕන රාජ්‍ය බලය ලබා ගැනීමේ අරමුණ විතරයි.
''මේ අධිරාජ්‍යවාදී බල වියරුවෙන් මුළු මහත් සමාජයක් නිදහස් කරගැනීමේ අවස්ථාව''
එදා මැදපෙරදිග කලාපයේ රටවල් එක්ක පෙට්‍රෝ ඩොලර් සම්මුතිය අත්සන් කරලා එක්සත් ජනපදය මුළු ලෝකෙම තෙල් සම්පත තමන්ගේ අතට ගත්තා. මුළු ලෝකෙ පුරාම ඩොලරය ව්‍යාප්ත කිරීම තුළින් ඔවුන්ට පුලුවන් කම ලැබුණා ලෝක ආර්ථිකයෙන් වැඩි පංගුවක් කොල්ලකා ගන්න. මේ කොල්ලකෑම තීවෘ වෙන්න වෙන්න බිලියනපතියන්, ට්‍රිලියනපතියන් වර්ධනය වෙන්න ගත්තා. මුළු මහත් සමාජයක් එකතුවෙලා නිෂ්පාදනය කරන දේවල්වල සියලු වටිනාකම් මේ විදිහට සුළු පිරිසක් විසින් කොල්ල කද්දි සමාජයේ බහුතරයක් දුප්පත්කමට ඇදවැටෙන එක නවත්වන්න පුලුවන් කමක් නෑ. ඒ වගේම තමයි එහෙම දුප්පත් කමට ඇද වැටුණු සමාජයක්, පීඩාවට පත් වුණු සමාජයක් තවදුරත් ඉවසන්නේ නැහැ. අන්න ඒක දන්න නිසයි ඇමරිකාව ඇතුළු අධිරාජ්‍යවාදී රටවල්. පාලක පන්තිය අපිට එරෙහිව ආයුධ මුවහත් කරන්නේ.
''එදා 71 ජීවත් වුණු පරම්පරාව විස්වාස කළේ මුහුණු මාරුවක් නෙවෙයි''
ඒ නිසා අධිරාජ්‍යවාදී උගුලට එරෙහිව, ආර්ථිකේ පීඩනයට එරෙහිව, වගේම මනුෂ්‍යත්වය වනසන නරුම යුද වියරුවට එරෙහිවත් වැඩකරන පන්තියේ ජනතා බලයක් අපි ගොඩනැගිය යුතුයි. අන්න ඒ සඳහා නායකත්වය දෙන්න පෙරටුගාමී සමාජවාදී පක්ෂය විදිහට අපි සූදානම්. අද අපිට තියෙන එකම විකල්පය සමාජවාදය විතරයි. අන්න ඒ සමාජවාදී සමාජය නිරමාණය කරන්න එකතුවෙමු කියලා අපි මේ රටේ සියලු ජනතාවට ආරාධනා කරනවා.
