මාරාන්තික වසංගතයෙන් රටේ ජනතාව මුදවා ගැනීම සඳහා කැපවී සිටින සෞඛ්‍ය කාර්ය මණ්ඩලයේ අවශ්‍යතා නැවත නැවතත් නොසලකා හැරීමට එරෙහි වෘත්තීය සමිති ක්‍රියාමාර්ගයක් ගන්නා බවට වසංගත මර්දනයේ
නිරත සුව විරුවන් ජනාධිපතිවරයාට අනතුරු අඟවා තිබේ.
ජනාධිපති ගෝඨාභය රාජපක්ෂ වෙත ලිපියක් යොමු කරමින් සෞඛ්‍ය වෘත්තීය සමිති එකමුතුව දැනුම් දී ඇත්තේ තමන් විසින් ඉදිරිපත් කර තිබෙන ගැටළු විසදීම සදහා කඩිනම් මැදිහත් වීමක් සිදු නොකරන්නේනම් අගෝස්තු පස් වැනි දින සිට සේවයෙන් බැහැර වීමේ වෘත්තීය සමිති ක්‍රියාමාර්ගයට අවතීර්ණ වන බවයි.
මේ වන විට රටේ පවතින වසංගත තත්වය බරපතල අයුරින් ව්‍යාප්ත වෙමින් පවතින අතරතුර කෝවිඩ් මරණ සංඛ්‍යාව දිනෙන් දිනම වැඩි වෙමින් පවතින බව පෙන්වා දෙන සෞඛ්‍ය වෘත්තීය සමිති එකමුතුව ජනාධිපතිවරයාට අවධාරණය කර ඇත්තේ, හඹා ගොස් හෝ අහඹු ලෙස රට තුල සිටින ආසාදිතයන් සොයා ගැනීමක් විද්‍යාත්මකව සිදු නොවන අතර, එම තත්වය යටතේදී පවා හමු වන ආසාදිතයන් ප්‍රමාණය දිනෙන් දිනම වැඩි වෙමින් පවතින බවයි.
සියළුම රෝහල් වල දැරිය හැකි ධාරිතාව ඉක්මවමින් තිබේ.
එසේම සියළුම රෝහල් වල දැරිය හැකි ධාරිතාව ඉක්මවමින් තිබෙන අතර කෝවිඩ් වාට්ටු වල පවතින ඇඳන් සංඛ්‍යාවට වඩා වැඩිපුර රෝගීන් තබා ගනිමින් කලමනාකරණය කර ගැනීම සෞඛ්‍ය කාර්යය මණ්ඩලයේ තනි වගකීමක් වී ඇති බවත් එම ලිපියේ වැඩි දුරටත් සදහන් කර තිබේ.
"නමුත් මේ සඳහා අනුමත ප්‍රතිපාදන වලින් ලබා දිය හැකි සමහරක් අත්‍යාවශ්‍ය පහසුකම් ලබා දීම පවා අතපසු කොට ඇත."
තත්වය මෙසේ තිබියදී ජනාධිපති ලේකම්වරයා විසින් පසුගිය දින නිකුත් කරන ලද චක්‍රලේඛයට අනූව සියළු සෞඛ්‍ය කාර්ය මණ්ඩලය එකවර සේවයට කැඳවීමේ සූදානමක්ද පවතින බව පෙන්වා දෙන සෞඛ්‍ය වෘත්තීය සමිති එකමුතුව, ජනාධිපතිවරයාට දැනුම් දී ඇත්තේ කෝවිඩ් අනතුරු දීමනාව ඇතුළු පහසුකම් සියල්ල කපා හරිමින් “කොවිඩ් වසංගතය අවසන් වූ බවක්” හැඟවෙන ආකාරයෙන් පරිපාලනමය වශයෙන් කටයුතු කිරීමට පියවර ගනිමින් සිටින බවයි.
මෙම තත්වය කිසිසේත්ම රටේ මහජනතාවගේ හෝ සෞඛ්‍ය කාර්ය මණ්ඩලයේ හිතසුව පිණිස නොවන බැවින් පහත ගැටළු විසඳා ගැනීම සඳහා කඩිනම් අවස්ථාවක් ලබා දෙන ලෙස එම එකමුතුව ජනාධිපතිවරයාගෙන් ඉල්ලා තිබේ.
1. සෞඛ්‍ය කාර්ය මණ්ඩලයට කොවිඩ් විශේෂ නිවාඩු ක්‍රමය අඛණ්ඩව ක්‍රියාත්මක කිරීම,2. කොවිඩ් අනතුරු දීමනාව අඛණ්ඩව ලබා දීම,3. සෞඛ්‍ය සේවාවේ වරින් වර මතු වන දීර්ඝකාලීන ගැටළු සඳහා ස්ථිරසාර විසඳුමක් ලෙස සෞඛ්‍ය සේවාව සංවෘත සේවාවන් බවට පත් කිරීමේ අමාත්‍ය මණ්ඩල තීරණය ක්‍රියාත්මක කිරීම,4. බහුකාර්ය සංවර්ධන බලකායේ අයවළුන් සමස්ථ රෝහල් පද්ධතියෙන් ඉවත් කිරීම,5. අතිකාල සීමාවන් ඉවත් කිරීම,6. සියළු බඳවා ගැනීම් සිදු කිරීම හා සියළු පුරප්පාඩු පිරවීම.
ඉහත අවශ්‍යතා විසඳීම සඳහා කඩිනම් මැදිහත්වීමක් සිදු නොකරන්නේ නම් අගෝස්තු 05 වැනි දින සිට සේවයෙන් බැහැර වීමේ වෘත්තීය සමිති ක්‍රියාමාර්ගයට අවතීර්ණ වන බව සෞඛ්‍ය වෘත්තීය සමිති එකමුතුව ජනාධිපතිවරයාට යොමු කළ ලිපියේ වැඩි දුරටත් සදහන්ය.
එම එකමුතුව වෙනුවෙන් රවී කුමුදේශ්, සමන් රත්නප්‍රිය, උපුල් රෝහණ, ඩබ්.ඒ.ඩී විමලරත්න, නාමල් ජයසිංහ, ධර්මකීර්ති ඈපා, දේවිකා කොඩිතුවක්කු, රෝයි ද මැල් හා උදේනි දසනායක යන වෘත්තිය සමිති නායකයන් ලිපියට අත්සන් තබා තිබේ.
එම ලිපියේ පිටපත් සෞඛ්‍ය අමාත්‍යවරිය, සෞඛ්‍ය ලේකම් හා සෞඛ්‍ය සේවා අධ්‍යක්ෂ ජනරාල් වෙතත් යොමු කර ඇත.
THE LEADER TV
කොතලාවල පණතින් ආණ්ඩුව පුපුරයිද ?
දිල්රුක්ෂි ඩයස්ගේ තවත් 'හඬපටක්' එලියට !
