1200 x 80 DMirror
 
 

 ත්‍රස්තවාදී ක්‍රියාවන්ට සම්බන්ධ සැකකරුවන් ලෙස අත්අඩංගුවට ගෙන සිටි බොහෝ තරුණයන් තමා බලයට පැමිණි පසු නිදහස් කළ බව ජනාධිපතිවරයා එක්සත් ජාතීන් හමුවේ ප්‍රකාශ කළ දාට පසුදා වැලිකඩ
බන්ධනාගාරයේ රැඳවියන් පිරිසක් නිදහස ඉල්ලා ආරම්භ කළ විරෝධතාව දෙවැනි දිනයේත් දියත් වෙමින් පවතී.
 
බන්ධනාගාර දෙපාර්තමේන්තුව සඳහන් කරන්නේ සැප්තැම්බර් 21 වැනි අගහරුවාදා දිනයේත් සිරකරුවන් දස දෙනෙක් පමණ නිදහස ඉල්ලා විරෝධතාවයේ නිරතවන බවයි.
 
ජීවිතාන්තය දක්වා සිරදඬුවම් නියම වී සිටින තමන් ද නිදහස් කරන ලෙස බල කරමින් වැලිකඩ බන්ධනාගාරයේ රැඳවියන් පිරිසක් සැප්තැම්බර් 20 වැනි සදුදා බන්ධනාගාර වහළය මත නැග විරෝධතාවය ආරම්භ කර තිබුනි.
 
රැඳවියන්ගේ ඉල්ලීම්වලට සාධනීය පිළිතුරක් දීමට තම දෙපාර්තමේන්තුවට නොහැකි බව පවසන  බන්ධනාගාර දෙපාර්තමේන්තුව ජනමාධ්‍ය වෙත පවසා ඇත්තේ, අදාළ ඉල්ලීම් සම්බන්ධයෙන් මේ වනවිට නීතිපති දෙපාර්තමේන්තුව සහ අධිකරණ අමාත්‍යාංශය දැනුවත් කර ඇති බවයි.
 
සිරකරු දිනය නිමිත්තෙන් සුළු වැරදි සඳහා බන්ධනාගාර ගත කර සිටි රැඳවියන් 89 දෙනෙකු ජනපති පොදු සමාව යටතේ  පසුගියදා නිදහස් කර තිබුනි.
 
මරණ දඬුවම නියම වී සිටින සහ ජීවිතාන්තය දක්වා සිරදඬුවමට ලක්ව සිටින සිරකරුවන් 1,500 දෙනෙකු පමණ වැලිකඩ චැපල් වාට්ටුවේ රඳවා සිටින බව ජනමාධ්‍ය වාර්තා කර තිබේ.
 
අගමැති මහින්ද රාජපක්ෂ ජනාධිපතිධුරය හොබවන සමයේ ඔහුගේ වෘත්තීය සමිති උපදේශකයා වූ  භාරත ලක්ෂ්මන් ප්‍රේමචන්ද්‍ර මරා දැමීමට වරදකරු වී මරණ දඬුවම් ලබා  සිටි ආරක්ෂක අමාත්‍යාංශයේ හිටපු අධීක්ෂණ මන්ත්‍රී දුමින්ද සිල්වා ට ජනාධිපති ගෝඨාභය රාජපක්ෂ විසින් ජනාධිපති සමාව ලබා දී නිවාස සංවර්ධන අධිකාරියේ සභාපති ධුරටයද පත් කරණ ලදී.
 
දුමින්ද සිල්වා ජනාධිපති පොදු සමාව යටතේ නිදහස් කළ අවස්ථාවේත් වැලිකඩ හා මහර ඇතුළු බන්ධනාගාර කිහිපයක සිරකරුවන් පිරිසක් තමන්ටද නිදහස ලබා දෙන ලෙස ඉල්ලමින්  විරෝධතා දියත් කර තිබුනි.
 
 
 
ජනාධිපති ගෝඨාභය රාජපක්ෂ එක්සත් ජාතීන්ගේ සංවිධානයේ මහ ලේකම් අන්ටෝනියෝ ගුටරේස්  19 වැනිදා හමුවූ අවස්ථාවේදී පවසා තිබුනේ දීර්ඝ කාලීනව අත්අඩංගුවේ සිටින ද්‍රවිඩ තරුණයන්ගේ නීති කටයුතු අවසන් වු වහාම එම පිරිසට ජනාධිපති සමාව ලබාදීමට තමා නොපැකිළෙන බවයි.
 
"ත්‍රස්තවාදී ක්‍රියාවන්ට සම්බන්ධ සැකකරුවන් ලෙස අත්අඩංගුවට ගෙන සිටි බොහෝ තරුණයින් තමා බලයට පැමිණි පසු නිදහස් කළ බව පෙන්වා දුන් ජනාධිපතිතුමා, නිදහස් කළ නොහැකි සෙසු පිරිස සම්බන්ධයෙන් නීතිමය කටයුතු කඩිනම් කරන බවත් දිගුකලක් අත්අඩංගුවේ පසුවන ද්‍රවිඩ තරුණයන් පිළිබඳව නීති කෘත්‍ය අවසන් වූ පසු දීර්ඝ කාලයක් ඔවුන් අත්අඩංගුවේ සිටීම පිළිබඳ සැලකිල්ලට ගෙන එම පිරිසට ජනාධිපති සමාව ලබාදීමට තමා නොපැකිළෙන බවත් මහලේකම්වරයා සමග පැවසීය," යි ජනාධිපති මාධ්‍ය අංශය නිවේදනය කර තිබේ.
 
 
THE LEADER TV 
 
ජාතිකවාදීන්ට අවසන් දැනුම්දීමක්! 
 
 
උන් උන්ම නිදොස් කොට නිදහස් 
 
 
 
 

subscribeYT

subscribeYT

WhatsApp Image 2021 09 13 at 13.49.58