පහනක් හෝ දල්වා වසර තිහක් පුරා යුද්ධයෙන් මරා දැමුවන් අනුස්මරණය කිරීමට බාධා නොතකා
එක්වන ලෙස කතෝලික සභාව උතුරු නැගෙනහිර ජනතාවගෙන් ඉල්ලීමක් කොට තිබේ.
කතෝලික සභාවේ උතුරු නැගෙනහිර පළාත් නියෝජනය කරන රදගුරුවරුන් නිවේදනයක් නිකුත් කරමින් ඉල්ලා සිටින්නේ එළඹෙන නොවැම්බර් 20 වැනිදා යුද්ධයෙන් මියගිය, අතුරුදහන් කළවුන් සිහි කරමින් දේවස්ථාන වල පුජා පවත්වන ලෙසත්, එසේ නැතහොත් තම නිවෙස් වල සිටම පහනක් දල්වා ඊට එක්වන ලෙසයි.
මන්නාරම ෆිඩලිස් ප්‍රනාන්දු, යාපනය ජස්ටින් ඥාණප්‍රකාශම්, ත්‍රිකුණාමලය නොයෙල් එම්මානුවෙල්, මඩකළපුව ජෝශප් පොන්නයියා රදගුරුවරුන් විසින් නිකුත් කළ නිවේදනයේ සඳහන් වන්නේ තිස් වසක් පැවති යුද්ධයෙන් දෙමළ ජනයා බරපතල ලෙස පිඩාවත් පත්ව, ලක්‍ෂ ගණනක් මිය ගොස් හෝ අතුරුදහන් කර හෝ ඇති බවයි.
``යුද්ධයෙන් මිය ගියවුන් සිහිපත් කිරීමේදී නොයෙකුත් බාධා ඇති වුවද, මිය ගිය හා අතුරුදහන් කළවුන් සිහිපත් කිරීමට උතුරු නැගෙනහිර රදගුරුවරුන් ලෙස පෙළ ගැසී සිටින බැවින්, කිසිදු බේදයකින් තොරව සියලු ආගමික සිද්ධස්ථාන වල පුද පුජා පවත්වා, පහන් දල්වා යුද්ධයෙන් මියගිය අය සිහිපත් කරන්න,``යැයි ඔව්හු ඉල්ලා සිටිති.
තවත් බොහෝ පිරිසක් යුද්ධය නිසා ආබාධිතයන් වූ අතර, තවත් කොටසක් කිසිදු නීතිමය ක්‍රියාමාර්ගයකින් තොරව හිරේ විලංගුවේ දමා තිබෙන අතර, තවත් ජනතාවක් රට හැර ගොස් ඇතැයි උතුරු නැගෙනහිර කතෝලික සභා නායකයෝ පවසති.
